দিল্লীৰ লালকিল্লাৰ সামীপত সংঘটিত বিস্ফোৰণৰ তদন্তত পোহৰলৈ আহিছে বহুতো চাঞ্চল্যকৰ তথ্য। আৰক্ষীৰ সূত্ৰ অনুসৰি, পেছাগতভাৱে চিকিৎসা বৃত্তিত জড়িত ফৰিদাবাদৰ এটা সন্ত্ৰাসবাদী গোটে ধাৰাবাহিকভাৱে বিস্ফোৰক সামগ্ৰী ক্ৰয় কৰিছিল। এই সন্দেহভাজন সন্ত্ৰাসবাদী গোটে দিল্লী-এনচিআৰ অঞ্চলত একেলগে ছটা স্থানত বিস্ফোৰণ সংঘটিত কৰাৰ পৰিকল্পনা কৰিছিল। আনকি তেওঁলোকে বাবৰি মছজিদ ধ্বংসৰ প্ৰতিশোধ লোৱাৰ নিমিত্তে ৬ ডিচেম্বৰ তাৰিখটো নিৰ্ধাৰণ কৰিছিল। এই দিনটোৱে বিশেষ তাৎপৰ্য বহন কৰে, কাৰণ ১৯৯২ চনৰ ঠিক এই দিনটোতেই অযোধ্যাত বাবৰি মছজিদ ধ্বংস হৈছিল। সেই দিনটোৰ প্ৰতিশোধ হিচাপে দেশৰ ৰাজধানীত একাধিক বিস্ফোৰণ সংঘটিত কৰাৰ পৰিকল্পনা কৰিছিল তেওঁলোকে।
তদন্তকাৰী সূত্ৰই জনোৱা মতে, “ফৰিদাবাদ চিকিৎসক মডিউল” নামেৰে পৰিচিত এই গোটটোৱে প্ৰায় ৩ হাজাৰ কিলোগ্ৰাম বিস্ফোৰক সংগ্ৰহ কৰিছিল। তেওঁলোকে ধাৰাবাহিকভাৱে ছটা স্থান চিহ্নিত কৰি বোমা বিস্ফোৰণৰ পৰিকল্পনা কৰিছিল। এই পৰিকল্পনা জয়েছ-ঈ-মহম্মদ (JeM) সংগঠনৰ সৈতে জড়িত আছিল বুলি সন্দেহ কৰা হৈছে।
প্ৰথমে আগষ্ট মাহত এই বিস্ফোৰণ সংঘটিত কৰাৰ পৰিকল্পনা আছিল, কিন্তু সেই দিনটোত কাৰ্যসিদ্ধি নোহোৱাত, তেওঁলোকে ৬ ডিচেম্বৰত আক্ৰমণ কৰিবলৈ পুনৰ নিৰ্ধাৰণ কৰে। তদন্তকাৰীসকলৰ মতে, বহু বছৰ ধৰি জয়েছ-ঈ-মহম্মদে বাবৰি মছজিদ ভাঙি পেলোৱাৰ বাবে প্ৰতিশোধ লোৱাৰ ভাবুকি দি আহিছে।
অভিযুক্ত চিকিৎসক ওমৰ মহম্মদ ওৰফে ওমৰ-উন-নবী, ফৰিদাবাদৰ আল-ফালাহ বিশ্ববিদ্যালয়ত কৰ্মৰত আছিল। তেওঁক লালকিল্লাৰ ওচৰত সংঘটিত বোমা বিস্ফোৰণৰ মূল ষড়যন্ত্ৰকাৰী বুলি সন্দেহ কৰা হৈছে। তদন্তকাৰীসকলৰ মতে, তেওঁৰ সহযোগী ডাঃ মুজাম্মিল শ্বেখ আৰু শ্বাহীন ছাইদক গ্ৰেপ্তাৰ কৰাৰ পাছত ওমৰ অস্থিৰ হৈ পৰিছিল আৰু হতাশাত বিস্ফোৰণটো সংঘটিত কৰে।
তদন্তত এই কথাও পোহৰলৈ আহিছে যে, ৮ জনীয়া বোমাৰু দলটো আক্ৰমণৰ বাবে সম্পূৰ্ণ প্ৰস্তুত আছিল। এই দলটোৱে দিল্লীৰ ৰেড ফ’ৰ্ট মেট্ৰ’ ষ্টেচনৰ ওচৰত ট্ৰেফিক চিগনেলৰ কাষত এখন বাহনত বিস্ফোৰণ ঘটায়, য’ত ১৩ জন লোকৰ মৃত্যু হোৱাৰ লগতে বহুজন আহত হয়।
বিস্ফোৰণত ব্যৱহৃত গাড়ীখন ওমৰ মহম্মদে নিজে চলাই আহিছিল বুলি তদন্তকৰীসকলে নিশ্চিত কৰিছে॥। ফৰিদাবাদত আৰক্ষীয়ে অভিযান চলাই উদ্ধাৰ কৰা প্ৰায় ২৯০০ কিলোগ্ৰাম বিস্ফোৰক সামগ্ৰী আৰু জব্দ কৰা নথিপত্ৰই এই ষড়যন্ত্ৰ উন্মোচিত কৰিছে।
তদন্তকাৰীসকলৰ মতে, এই চিকিৎসকসকল উচ্চশিক্ষিত আৰু পেচাদাৰী ব্যক্তি হ’লেও, তেওঁলোকে জয়েছ-ঈ-মহম্মদৰ নতুনকৈ গঠিত এটা সন্ত্ৰাসবাদী মডিউলৰ সৈতে জড়িত আছিল। যাৰ লক্ষ্য আছিল ৬ ডিচেম্বৰত ৰাষ্ট্ৰীয় ৰাজধানী অঞ্চলত ধাৰাবাহিক বিস্ফোৰণ ঘটাই দেশক কঁপাই তোলা তথা বাবৰি মছজিদ ধ্বংসৰ প্ৰতিশোধ লোৱা।
