ভাৰতে ক’ৰ’ণা ভাইৰাচৰ ভেকচিন প্ৰস্তুতৰ ক্ষেত্ৰত সকলো ধৰণৰ আন্ত:ৰাষ্ট্ৰীয় বিধি মানি চলিছে। এই ঘোষণা কৰিছে ইণ্ডিয়ান কাউন্সিল অৱ মেডিকেল ৰিচাৰ্ছে।
শনিবাৰে এই ঘোষণা কৰি ইণ্ডিয়ান কাউন্সিল অৱ মেডিকেল ৰিচাৰ্ছে কয় যে ভাৰত বায়’টেক ইল্টাৰনেশ্যনেল লিমিটেডে দেশৰ ১২ টা স্থানত ক’ৰ’ণা ভাইৰাছৰ ভেকচিন ক’ভাক্সিনৰ পৰীক্ষণ কৰিছে।
সোমবাৰৰ পৰা পুনৰ প্ৰথম পৰ্যায়ত ৩৭৫, দ্বিতীয় পৰ্যায়ত ৭০০ লোকৰ দেহত এই ভেকচিনৰ পৰীক্ষণ কৰা হ’ব বুলি আই চি এম আৰে কৈছে।
ইণ্ডিয়ান কাউন্সিল অৱ মেডিকেল ৰিচাৰ্ছৰ তত্বাৱধানত ভাৰত বায়’টেক ইল্টাৰনেশ্যনেল লিমিটেডে প্ৰস্তত কৰা কৰ’না ভাইৰাছৰ ভেকচিনৰ ইতিমধ্যে বহু স্থানত পৰীক্ষণ সম্পন্ন কৰা হৈছে।
দেশৰ কোটি কোটি জনতাক মাৰাত্মক কৰ’না ভাইৰাচৰ পৰা মুক্ত কৰি ৰাখিবলৈ ভাৰতে সাজু কৰা ভেকচিন ১৫ আগষ্টৰ ভিতৰত বজাৰত মুকলি কৰি দিয়াৰ বাবে সাজু হৈছে ভাৰত।
ইণ্ডিয়ান কাউন্সিল অৱ মেডিকেল ৰিচাৰ্ছৰ সঞ্চালক প্ৰধান বলৰাম ভাৰ্গভে প্ৰকাশ কৰা তথ্য অনুসৰি ভাৰত বায়’টেক ইন্টাৰনেশ্যনেল লিমিটেডে প্ৰস্তত কৰা কৰ’না ভাইৰাছৰ ভেকচিন বি বি ভি ১৫২ কোভিড ১৫ আগষ্টৰ ভিতৰত সাধাৰণ জনতাৰ বাবে মুকলি কৰি দিয়া হব।
তেওঁ লগতে কয় যে পুনেৰ ইনষ্টিটিউট অৱ ভাইৰ’ল’জিয়ে পৃথকীকৰণ কৰা ছাৰছ কভ-২ৰ সাৰাংশ লৈ ভাৰত বায়’টেক ইন্টাৰনেশ্যনেল লিমিটেডে প্ৰস্তত কৰিছে কৰ’না ভাইৰাছৰ ভেকচিন বি বি ভি ১৫২। এই ভেকচিনক লৈ এতিয়া সমগ্ৰ দেশৰ লগতে বিশ্ব আশাবাদী।