প্ৰযুক্তিৰ অবিশ্বাস্য উন্নতিৰ বাবে পৃথিৱীত যিমানেই আচৰিত ধৰণৰ কাম-কাজ চলি নাথাকক কিয়, ভোকৰ ৰাজত্ব এতিয়াও শেষ হোৱা নাই। পৃথিৱীৰ বিভিন্ন প্ৰান্তৰ লাখ লাখ মানুহে এতিয়াও ভোকাতুৰ। তেওঁলোকৰ স্বাস্থ্য পুষ্টিহীনতাৰে গ্ৰস্ত।
শেহতীয়াকৈ ৰাষ্ট্ৰসংঘৰ খাদ্য অপচয়ৰ প্ৰতিবেদনত একে কথাই কোৱা হৈছে। প্ৰতিবেদনত প্ৰকাশ পাইছে যে ২০২২ চনত সমগ্ৰ বিশ্বতে উৎপাদিত খাদ্যৰ ২২ শতাংশ অপচয় হৈছিল। অৰ্থাৎ সেই বছৰ ১০৫ মিলিয়ন মেট্ৰিক টন খাদ্য অপচয় হৈছিল। ২০২১ চনত খাদ্য অপচয়ৰ হাৰ আছিল ১৭ শতাংশ।
ৰাষ্ট্ৰসংঘৰ পৰিৱেশ কাৰ্যসূচী (UNEP) আৰু ৱেষ্ট এণ্ড ৰিচ’ৰ্চ একচন প্ৰগ্ৰেম (WRAP)য়ে যৌথভাৱে খাদ্য আৱৰ্জনা সম্পৰ্কে এই প্ৰতিবেদন প্ৰকাশ কৰিছে। মূলতঃ পৰিয়াল, খাদ্য সেৱা আৰু খুচুৰা বিক্ৰেতাসকলৰ তথ্য বিশ্লেষণ কৰি এই প্ৰতিবেদন প্ৰস্তুত কৰা হৈছে।
প্ৰতিবেদনত প্ৰকাশ পাইছে যে পৃথিৱীৰ মুঠ খাদ্য অপচয়ৰ প্ৰায় ৬০ শতাংশই ঘৰতে সংঘটিত হয়। ৰেষ্টুৰেণ্ট আৰু হোটেলত ২৮ শতাংশ খাদ্য অপচয় হয়। ১২ শতাংশ খাদ্য অপচয় হয়& খুচুৰা বিক্ৰেতাসকলৰ ওচৰত।
প্ৰতিবেদন অনুসৰি প্ৰতিজন ব্যক্তিয়ে এবছৰত প্ৰায় ৭৯ কেজি খাদ্য অপচয় কৰে। ইফালে পৃথিৱীৰ ৭৮ কোটিতকৈ অধিক লোকে ভালকৈ খাদ্য গ্ৰহণ কৰিব নোৱাৰে বা তেওঁলোকৰ খাদ্যত পৰ্যাপ্ত পৰিমাণৰ পুষ্টিকৰ উপাদান নাথাকে।
প্ৰতিবেদনত উল্লেখ কৰা হৈছে যে কেৱল মানুহ ভোকত থকাই নহয়, এই পৰিমাণৰ খাদ্য অপচয়ৰ ফলত সেউজ গৃহ গেছৰ পৰিমাণো বৃদ্ধি পাইছে। এই অপচয় হোৱা খাদ্য বিশ্বৰ ৮ৰ পৰা ১০ শতাংশ সেউজ গৃহ গেছৰ নিৰ্গমনৰ বাবে দায়ী।
