এইবাৰ ৰবটৰ নিৰ্দেশত চলিব মানুহ। মোবাইল গেম প্ৰস্তুত কৰা চীনা কোম্পানী নেটড্ৰেগন ৱেবছফ্টে এনে এক অবিশ্বাস্য ঘটনাকে বাস্তৱত পৰিণত কৰিছে। কোম্পানীটোৱে শেহতীয়াকৈ কৃত্ৰিম বুদ্ধিমত্তা (এ আই) থকা এজন ভাৰ্চুৱেল মেন (ৰবট)ক জেনেৰেল মেনেজাৰ হিচাপে নিযুক্তি দিছে। বিশ্বত এই প্ৰথমবাৰৰ বাবে এনে ঘটনা ঘটিছে।
হিউমেনইড ৰবটটোৰ নাম হৈছে ‘টাং য়ু’। যোৱা মাহত নিযুক্তিৰ পিছত মিছ টাং য়ু ফুজিয়ানে নেটড্ৰেগন ৱেবছফ্টত তেওঁৰ কাম আৰম্ভ কৰি দিছে।
কোম্পানীটোৱে প্ৰকাশ কৰা বিবৃতি অনুসৰি, এই ৰবটটোৱে কোম্পানীটোৰ দৈনন্দিন কাৰ্যকলাপত বিভিন্ন সিদ্ধান্ত লোৱাত সহায় কৰিব। এনেদৰে টাং য়ুৱে সমস্যাবহুল-ব্যৱস্থাপনা প্ৰণালীটো অধিক কাৰ্যকৰী কৰাৰ বাবে কাম কৰিব।
ৰবটটোৱে কোম্পানীৰ বোৰ্ডৰ বাবে এক ৰিয়েল টাইম ডাটা চেন্টাৰ আৰু এনালেটিকছ টুল হিচাপেও কাম কৰিব।
নেটড্ৰেগন ৱেবছফ্টৰ প্ৰতিষ্ঠাপক ড০ ডেজিয়ান লিউৱে কয়, “আমি বিশ্বাস কৰোঁ যে এ আই হৈছে কৰ্পোৰেট মেনেজমেণ্টৰ ভৱিষ্যত।‘’
তেওঁ কয় যে কোম্পানীটোৰ ভৱিষ্যতৰ কৌশলগত বিকাশৰ কথা মনত ৰাখিয়েই এই পদক্ষেপ লোৱা হৈছে।
