ভাৰতৰ মহাপঞ্জীয়কে অসমৰ ৰাষ্ট্ৰীয় নাগৰিকপঞ্জী (এন আৰ চি)ক আইনী নথি হিচাপে এক জাননী জাৰি কৰিবলৈ বাকী আছে যদিও এখন বিদেশী ন্যায়াধীকৰণে এগৰাকী ব্যক্তিক ভাৰতীয় হিচাপে ঘোষণা কৰাৰ সময়ত এখোপ আগবাঢ়ি গৈ ইয়াক ‘চূড়ান্ত এন আৰ চি’ হিচাপে বৈধতা দিলে।
দ্য হিন্দুত প্ৰকাশিত বাতৰি মতে এন আৰ চিৰ তালিকাত নাম অন্তৰ্ভুক্ত হোৱা জমিৰালা গাঁৱৰ বিক্ৰম সিংহ নামৰ এগৰাকী ব্যক্তিৰ এক গোচৰৰ শুনানিত কৰিমগঞ্জ চহৰৰ বিদেশী ন্যায়াধীকৰণৰ সদস্য শিশিৰ দে’ই কয় যে ২০১৯ত প্ৰকাশ পোৱা অসমৰ এন আৰ চি চূড়ান্ত তাত কোনো সন্দেহ নাই।
উল্লেখ্য যে যোৱা ৪ ছেপ্টেম্বৰত অসম চৰকাৰৰ ৰাজনৈতিক (বি) বিভাগে এক পত্ৰযোগে বিদেশী ন্যায়াধীকৰণসমূহক ‘গুৰুত্বপূৰ্ণ আদেশ/নিৰ্দেশনা’ নিদিবলৈ তথা ‘মন্তব্য’ দিওতে ১৯৬৪চনৰ বিদেশী ন্যায়াধীকৰণে বান্ধি দিয়া নিৰ্দেশনাত অটল থাকিবলৈ কোৱা হৈছিল।
সন্দেহজনক বিদেশী বা সন্দেহজনক ভোটাৰৰ গোচৰত বিদেশী ন্যায়াধীকৰণৰ সদস্যই দিয়া ‘মন্তব্যসমূহৰ’ ৰাজ্যিক ন্যায়িক বিভাগৰ দ্বাৰা কৰা পৰ্যালোচনাৰ পাছতে অসম চৰকাৰে বিদেশী ন্যায়াধীকৰণসমূহক এই পত্ৰ দিছিল।
কিন্তু অসম চৰকাৰৰ এই নিৰ্দেশনাৰ কেইদিন পাছতে বিদেশী ন্যায়াধীকৰণে বিক্ৰমজিৎ সিংহৰ গোচৰত দিয়া মন্তব্যই স্বাভাৱিকতে প্ৰতিক্ৰিয়াৰ সৃষ্টি কৰিছে।
অসম আৰক্ষীৰ সীমান্ত শাখাই যোৱা ২০০৮চনৰ মে’ মাহত কৰিমগঞ্জ জিলাৰ পাথাৰকান্দি বিধানসভা সমষ্টিৰ অন্তৰ্গত জমিৰালা গাঁৱৰ বিক্ৰমজিৎ সিংহৰ বিৰুদ্ধে এটা গোচৰ তৰিছিল।
‘ডি’ ভোটাৰ হিচাপে চিনাক্ত কৰা এই ব্যক্তিগৰাকী ২৮ জুনলৈকে শুংসূত্ৰ নোহোৱাকৈ থকাৰ পাছত দুমাহ পাছত কৰিমগঞ্জ চহৰৰ বিদেশী ন্যায়াধীকৰণত উপস্থিতি হৈ তেওঁ কৰ্মৰত বেংগালুৰুৰ পৰা উভতি অহাৰ বাবে সময় বিচাৰিছিল।
বিক্ৰমজিৎ সিংহই তেওঁৰ নাগৰিকত্ব প্ৰমানৰ বাবে বিদেশী ন্যায়াধীকৰণৰ আগত কেইবাটাও নথি দাখিল কৰিছিল।
ইয়াৰ ভিতৰত তেওঁৰ ককাক মদন কুমাৰ সিংহৰ নামত থকা ১৯৬৮চনৰ মাটিৰ দলিল আৰু তেওঁৰ পিতৃয়ে ১৯৭২চনৰ পৰা ভাৰতীয় বিমান বাহিনীৰ কৰ্মচাৰী হিচাপে ২৯ বছৰ কাম কৰাৰ প্ৰমান পত্ৰও আছে।
যোৱা ১ছেপ্টেম্বৰত বিদেশী ন্যায়াধীকৰণৰ সদস্য শিশিৰ দে’ই লোৱা গোচৰটোৰ শুনানিৰ সময়ত গোচৰীয়া পক্ষৰ অধিবক্তাই যুক্তি দিছিল যে সিংহৰ পৰিয়ালে ১৯৬৬চনৰ পূৰ্বে ভাৰতত বসবাস কৰাটো প্ৰমান কৰিবলৈ কোনো নথি নাই।
অধিবক্তাগৰাকীয়ে ২০১২চনৰ ২০অক্টোবৰত অসম চৰকাৰৰ গৃহ আৰু ৰাজনৈতিক বিভাগে প্ৰকাশ কৰা ‘হোৱাইট পেপাৰ অন ফৰেইনাৰছ ইচ্ছ্যু’ৰ প্ৰংসগ উত্থাপন কৰে য’ত কোৱা হৈছে যে ১৯৫০ চনৰ ২৬জানুৱাৰী আৰু ১৯৮৭চনৰ ১ জুলাইৰ ভিতৰত জন্মগ্ৰহণ কৰা সকলোকে তেওঁৰ পিতৃ-মাতৃৰ জাতীয়তা যিয়েই নহওক জন্মসূত্ৰে ভাৰতীয় হিচৈপে বিবেচনা কৰা হ’ব পাৰে।
বিদেশী ন্যায়াধীকৰণৰ সদস্য শিশিৰ দে’ই উল্লেখ কৰে কৰে যে সিংহৰ নথিয়ে তেওঁৰ পিতৃ তথা ককাক ১৯৬৮চনৰ পূৰ্বে জমিৰালাত গাঁৱত বসবাস কৰাৰ কথাকেই ইংগিত কৰে।
সদস্যগৰাকীয়ে লগতে উল্লেখ কৰে যে উচ্চতম ন্যায়ালয়ৰ নিৰীক্ষণত সম্পন্ন হোৱা এন আৰ চিত সিংহৰ নাম সন্নিৱিষ্ট হৈছে।
‘’চূড়ান্ত এন আৰ চি ২০১৯ৰ ৩১ আগষ্টত প্ৰকাশ পাইছে যিখন এন আৰ চি আছামৰ ৱেবছাইটত উপলব্ধ তাতো ইয়াক ‘চূড়ান্ত এন আৰ চি’ হিচাপে উল্লেখ কৰা হৈছে। এই আইনী অৱস্থান এতিয়াও বাহাল আছে। চূড়ান্ত এন আৰ চিত যিসকলৰ নাম অন্তৰ্ভুক্ত হৈছে সেই নাগৰিকসকলক ৰাষ্ট্ৰীয় পৰিচয় পত্ৰ দিয়া হোৱা নাই। কিন্তু সন্দেহ নাই যে ২০১৯চ প্ৰকাশ পোৱা এন আৰ চি আছাম চূড়ান্ত এন আৰ চিৰ বাহিৰে আন নহয়,’’-নিৰ্দেশটোত এইদৰে কোৱা হয়।
নিৰ্দেশনাটোত স্পষ্ট কৰি দি কোৱা হয়,’’মোৰ বিবেচনা যে বিপক্ষ পাৰ্টি (সিংহ) এগৰাকী বিদেশী নহয় কিন্তু এগৰাকী ভাৰতীয় নাগৰিকহে।‘’
