কাজিৰঙা ৰাষ্ট্ৰীয় উদ্যানৰ অগৰাতলি বনাঞ্চলত বুধবাৰৰ দিনা ম’হৰ আক্ৰমণত এজন বনকৰ্মী আহত হয় ৷
অগৰাতলি বনাঞ্চলৰ ৰজামাৰী বন শিৱিৰ এলেকাত সংঘৰ্টিত হয় এই ঘটনা ৷ আহত বনকৰ্মী জন প্ৰথম ফৰেষ্ট বেটেলিয়নৰ দোলেশ্বৰ ৰেগন ৷
বুধবাৰৰ পুৱা সহকৰ্মীৰে সৈতে বনাঞ্চলত কৰ্তব্য সম্পন্ন কৰাৰ সময়ত বনৰীয়া ম’হে আক্ৰমণ কৰে বনকৰ্মীৰ দলটোক ৷
লগত থকা বনকৰ্মী সকলে কোনোমতে প্ৰাণৰক্ষা কৰে যদিও দোলেশ্বৰ ৰেগনক ম’হে আক্ৰমণ কৰি গুৰুতৰ বাবে আহত কৰে ৷
ম’হৰ আক্ৰমণত দোলেশ্বৰৰ ভৰি ভঙাৰ উপৰিও বুকু আৰু মূৰত আঘাত পায় ৷
আহত বনকৰ্মীজনক বোকাখাত অসামৰিক চিকিৎসালয়লৈ আনি প্ৰাথমিক চিকিৎসা প্ৰদান কৰি উন্নত চিকিৎসাৰ বাবে যোৰহাটলৈ প্ৰেৰণ কৰা হয় ৷
আহত দোলেশ্বৰ ৰেগনৰ ঘৰ তিতাবৰৰ ডফলাটিঙত ৷
