শোকাৱহ: পবিতৰা অভয়াৰণ্যত বন বিভাগৰ হাতীৰ গচকত মৃত্যু মাউতৰ
ৰঙালীৰ আনন্দত ৰাজ্যবাসী মতলীয়া হৈ থকাৰ সময়তে পবিতৰা বন্যপ্ৰাণী অভয়াৰণ্যত আজি সংঘটিত হৈছে শোকাৱহ ঘটনা।
পবিতৰা অভয়াৰণ্যত পৰ্যটকৰ হাতী ছাফাৰীৰ বাবে থকা বিক্ৰম নামৰ মখনা হাতীটোৱে আজি ইয়াৰ মাউতকে গচকি মৃত্যু ঘটায়।
শোকাৱহ ঘটনাটো সংঘটিত হয় আজি বিয়লি প্ৰায় তিনি বজাত ।
প্ৰাপ্ত খবৰ অনুসৰি বন বিভাগৰ মখনা হাতী বিক্ৰমৰ মাউত হিচাবে মাত্ৰে তিনি মাহ পূৰ্বে যোগদান কৰিছিল ৰাজু দাস নামৰ প্ৰায় ২৭ বছৰীয়া যুৱক জনে।
হাতীটোৰ মাউত হিচাবে প্ৰশিক্ষণৰত অৱস্থাত থকা ৰাজু দাসে হাতীটোক বিগত দিন কেইটাত একপ্ৰকাৰ বুজি উঠিবলৈ সক্ষম হৈছিল যদিও আজি হঠাতে মাউত ৰাজু দাসৰ ওপৰত ক্ষুদ্ধ হৈ পৰে বিক্ৰম নামৰ মখনা হাতীটো।
হাতীটোৱে মাউত ৰাজু দাসক হঠাতে আক্ৰমণ কৰে আৰু গচকি গুৰুতৰ বাবে আহত কৰে।
হাতীটোৰ আক্ৰমণত মাউত ৰাজু দাসৰ থিতাতে মৃত্যু ঘটে।
নিহত মাউত ৰাজু দাস বন বিভাগৰ এজন সাময়িক ভিত্তিত নিযুক্ত কৰ্মচাৰী আছিল।
নিহত মাউত জনৰ ঘৰ মৰিগাঁও জিলাৰ দিপ্ৰাং গাওঁৰ গৰঙা মন্দিৰৰ ওচৰত বুলি জানিব পৰা গৈছে।
নিজে পৰিচৰ্যা কৰা হাতীৰ আক্ৰমণতে মৃত্যুক সাৱটি লোৱা ৰাজু দাসৰ এটি ডেৰ বছৰীয়া পুত্ৰ সন্তান আছে।
মাউত ৰাজু দাসৰ এনে শোকাৱহ মৃত্যুৱে পবিতৰা অভয়াৰণ্যত কৰ্মৰত বন বিভাগৰ কৰ্মীসকলৰ লগতে দিপ্ৰাং গাঁওত ঘভাৰ শোকৰ ছাঁ পেলাইছে।