ক’ৰ’নাই এতিয়া দেশৰ ১১ খন ৰাজ্যত মহাসংহাৰৰ সৃষ্টি কৰিছে।
দেশৰ ৰাজধানী চহৰ দিল্লীত মাত্ৰ এটা দিনৰ ভিতৰতে ক’ৰ’নাথ আক্ৰান্ত হৈছে ১৭ হাজাৰৰো অধিক লোক।
ৰাজধানী চহৰ খনত এতিয়া ক’ৰ’নাত আক্ৰান্ত মুঠ লোকৰ সখ্যা হৈছেগৈ ৭ লাখ ৩৬ হাজাৰ ৭৮৮ গৰাকী।দিল্লীৰ মুখ্যমন্ত্ৰী অৰবিন্দ কেজৰিৱালে লেফটেনেণ্ট গভৰ্নৰ অনিল বাইজালৰ উপৰি ৰাজ্য খনৰ শীৰ্ষ বিষয়াবৰ্গৰ সৈতে ক’ৰ’না পৰিস্থিতি সন্দৰ্ভত ঘনাই বৈঠকত মিলিত হৈছে।
দিল্লীৰ ১৪ খন চিকিৎসালয়ত কোভিড ৰোগীৰ চিকিৎসাৰ বাবে ৩,৫৫৩ খন বিচনা সাজু কৰি তোলা হৈছে।
ৰাজধানী চহৰ খনৰ সকলো বিবাহ ভৱন,বহু বিদ্যালয়, ক্ৰীড়া প্ৰকল্প আদি কোভিড চিকিৎসালয়লৈ ৰূপান্তৰিত কৰা হৈছে।
দিল্লীত নৈশ সান্ধ্য আইন বলবৎ হৈ থকাৰ লগতে বিয়া আদি অনুষ্ঠানত ৫০ গৰাকী আৰু মৃতকৰ সৎকাৰত ২০ গৰাকী লোকক উপস্থিত থকাৰ অনুমতি দিয়া হৈছে।
উল্লেখ্য দেশত কোনোমতে নিয়ন্ত্ৰণত আনিব পৰা হোৱা নাই কৰ’নাৰ সংক্ৰমণ। কৰ’নাত আক্ৰান্তৰ সংখ্যা তীব্ৰ গতিত বৃদ্ধি পাইছে। যোৱা ২৪ ঘন্টাত ভাৰতত কৰ’না আক্ৰান্তৰ সংখ্যাই দেশৰ পূৰ্বৰ সকলো অভিলেখ ভংগ কৰিছে।
বিগত ২৪ঘন্টাত দেশত কৰ’নাত আক্ৰান্ত হৈছে ১লাখ ৮৪ হাজাৰতকৈয়ো অধিক লোক। সেইদৰে মৃত্যুৰ সংখ্যাও এহাজাৰ অতিক্ৰম কৰিছে। দেশত প্ৰথমবাৰৰ বাবে সক্ৰিয় ৰোগীৰ সংখ্যা লক্ষাধিক হৈছে।
সংক্ৰমণ ৰোধৰ বাবে কেইখনমান ৰাজ্যত জাৰি কৰা হৈছে নিশাৰ সান্ধ্য আইন। আনকি মহাৰাষ্ট্ৰত জাৰি কৰা হৈছে জনতা কাৰ্ফিউ।
বুধবাৰে পুৱা সদৰী কৰা কেন্দ্ৰীয় স্বাস্থ্য মন্ত্ৰ্যালয়ৰ তথ্য অনুসৰি, যোৱা ২৪ ঘন্টাত দেশত মুঠ কৰ’না আক্ৰান্তৰ সংখ্যা হৈছে ১লাখ ৮৪ হাজাৰ ৩৭২জন। এইটো পূৰ্বৰ দিনৰ তুলনাত প্ৰায় ২৩ হাজাৰ অধিক।
সেইদৰে যোৱা ২৪ ঘন্টাত কৰ’নাত মৃত্যু হৈছে ১,০২৭জন লোকৰ।
এতিয়ালৈকে দেশত মুঠ কৰ’না আক্ৰান্তৰ সংখ্যা হৈছে ১কোটি ৩৮ লাখ ৭৩ হাজাৰ ৮২৫ জন লোক।
সেইদৰে স্বাস্থ্য মন্ত্ৰ্যালয়ৰ তথ্য অনুসৰি দেশত মুঠ মৃত্যুৰ সংখ্যা হৈছেগৈ ১ লাখ ৭২ হাজাৰ ৮৫ জন ।
আনহাতে, বিগত ২৪ ঘন্টাত দেশত ৮২ হাজাৰ ৩৩৯ জন লোকে কৰ’নাৰ পৰা আৰোগ্য লাভ কৰিছে।
দেশত এতিয়ালৈকে মুঠ ১ কোটি ২৩ লাখ ৩৬হাজাৰ ৩৬ জন লোকে কৰ’নাৰ পৰা আৰোগ্য লাভ কৰিছে।
সেইদৰে, দেশত মুঠ সক্ৰিয় ৰোগীৰ সংখ্যা হৈছে ১৩ লাখ ৬৫হাজাৰ ৭০৪জন।
ইপিনে, দেশত এতিয়ালৈকে মুঠ ১১ কোটি ৭৯ লাখ ৩৩ হাজাৰ ৫৭৮ জন লোকক ভেকচিন প্ৰদান কৰা হৈছে।
