নগাঁও জিলাৰ বন সংমণ্ডলৰ অধীনৰ শালনা আঞ্চলিক বন কাৰ্যালয়ৰ অন্তৰ্গত উদমাৰী উপ খণ্ড বন কাৰ্যালয়ৰ অধীনৰ ধোল পাহাৰৰ শিলৰ মহলত সোমবাৰে পুনৰ বিস্ফোৰণ ঘটোৱাৰ ফলত স্থানীয় বাসিন্দাৰ মাজত সৃষ্টি হয় তীব্র আতংকৰ।
ৰাইজৰ তীব্ৰ প্ৰতিবাদৰ বাবেই যোৱা ২৯ মাৰ্চৰ পৰা এই শিলৰ মহলতো বন্ধ হৈ আছিল যদিও পুনৰ ধোল পাহাৰৰ শিলৰ মহলদাৰ বিশ্বজিৎ বনিকে বন বিভাগৰ একাংশ শীৰ্ষ মহলক মেনেজ কৰি পুনৰ বিস্ফোৰণ ঘটোৱাৰ ফলত সমগ্ৰ অঞ্চলটোতে জোকাৰণিৰ সৃষ্টি হয়।
শিলৰ মহলত বিস্ফোৰণ ঘটোৱাৰ ফলত শিলৰ টুকুৰা বহু দূৰলৈ ছিটিকি পৰি ৰাইজৰ বিস্তৰ ক্ষতিসাধন কৰাৰ লগতে অঞ্চলবাসীৰ মাজত এক অভাৱনীয় পৰিস্থিতিৰ সৃষ্টি হৈছে।
উল্লেখ্য যে বিগত ২৮ মাৰ্চত উক্ত শিলৰ মহলটোত সংঘটিত কৰা বিস্ফোৰণত স্থানীয় লোকৰ বিস্তৰ ক্ষতি হোৱাৰ লগতে কেইবাজনো শিশু মৃত্যুৰ পৰা কথমপি ৰক্ষা পৰিছিল। সেই ঘটনাৰ পিছতেই স্থানীয় ৰাইজে চামগুৰি আৰক্ষী থানাত মহলদাৰৰ বিৰুদ্ধে এজাহাৰ দাখিল কৰাৰ লগতে নগাঁও বন সংমণ্ডল বিষয়াক লিখিতভাৱে অভিযোগ উত্থাপিত কৰিছিল।
ইয়াৰ পাছৰে পৰা বন্ধ হৈ থকা মহলটোত সোমবাৰৰ পৰা পুনৰ শিলভঙা কাৰ্য আৰম্ভ হয়। এই কাৰ্যত ক্ষুন্ন হৈ স্থানীয় ৰাইজে পুনৰ চামগুৰি আৰক্ষী থানাত মহলদাৰ বিশ্বজিৎ বনিকৰ বিৰুদ্ধে সোমবাৰে এজাহাৰ দাখিল কৰিছে।
এতিয়া বন বিভাগ তথা আৰক্ষী প্ৰশাসনে মহলদাৰ বনিকৰ বিৰুদ্ধে কি ব্যৱস্থা গ্ৰহণ কৰে সেয়া পৰৱৰ্তী সময়ত লক্ষ্যণীয় হ’ব।
