চৰকাৰ প্ৰশাসনে বৃক্ষৰোপণৰে ৰাজ্যখনত সেউজীয়াকৰণৰ আঁচনি ৰূপায়ণ কৰি থকাৰ সময়তে একেখন চৰকাৰৰ বন বিভাগে চোৰাং কাঠ ব্যৱসায়ীৰ লগত মিতিৰালি কৰি ধ্বংস কৰিছে এখনৰ পিছত আন এখন বনাঞ্চল।
গোৱালপাৰা জিলাৰ কৃষ্ণাই মধ্য আঞ্চলিক বন বিভাগৰ আঞ্চলিক বন বিষয়াৰ ছত্ৰছায়াত কৃষ্ণাইত বন ধ্বংসৰ অভিযান চলিছে। ইপিনে দিনৰ পোহৰত বনাঞ্চল ধ্বংস কৰাৰ খবৰ দিয়াৰ পিছতো বিভাগটোৱে কোনো ব্যৱস্থা গ্ৰহণ নকৰাত স্থানীয় লোকে আৰক্ষীৰ সহায় ল’ব লগা ঘটনা সংঘটিত হৈছে।
ঘটনা অনুসৰি কৃষ্ণাইৰ মোনাকোচাত এদল চোৰাং বিপাৰীয়ে শাল গছ কাটি থকাৰ খবৰ পোৱাৰ পিছতো বন বিভাগ নীৰৱে থাকিল। অৱশেষত স্থানীয় লোকৰ অভিযোগৰ ভিত্তিত আৰক্ষীয়ে মোনাকোচা বনাঞ্চলত অভিযান চলাই বৃহৎ পৰিমানৰ শাল কাঠ উদ্ধাৰ কৰে ৷
অৱশ্যে, আৰক্ষী আগমনৰ বতৰা লাভ কৰি চোৰাং বেপাৰীৰ দলটোৱে পলায়ন কৰিবলৈ সক্ষম হয় ৷ আৰক্ষীয়ে উদ্ধাৰ কৰা শালকাঠখিনি বন বিভাগক গতাই দিয়ে।
উল্লেখযোগ্য যে কৃষ্ণাই মধ্য আঞ্চলিক বন বিভাগৰ আঞ্চলিক বন বিষয়াৰ বিৰুদ্ধে এনে অভিযোগ বহুত পুৰণি আৰু অভিযোগ অনুসৰি অঞ্চলটোৰ বিভিন্ন স্থানত কাঠফলা মিল বহুৱাই প্ৰতি মাহে লাখ লাখ টকা সংগ্ৰহ কৰি আহিছে।
ইপিনে এই বন ধ্বংস যজ্ঞ চলি থকাৰ মাজতে জিলা প্ৰশাসনে অঞ্চলটোৰ বিভিন্ন স্থানত আৰক্ষীৰ সহযোগিতাত লক্ষাধিক গছ পুলি ৰোপণ কৰে।
