প্ৰবীণ ৰাজনৈতিক নেতা তথা প্ৰাক্তন মন্ত্ৰী হলিৰাম টেৰাঙে ASDC সভাপতি পদৰ পৰা অব্যাহতি লৈ আজি LDP দলত যোগদান কৰে।
তেখেতক দ’ললৈ আদৰণি জনাই এল ডি পিৰ সভাপতি গুণ গগৈয়ে কয়, ‘হলিৰাম টেৰাং ডাঙৰীয়া এজন দক্ষ প্ৰবীণ জনজাতীয় নেতা। তেখেতৰ যোগদানে দলটোক সঠিক দিশত আগুৱাই নিয়াত সহায় কৰিব’।
ইয়াৰ উপৰি এল ডি পিৰ ৰাজ্যিক সভাপতি গুণ গগৈয়ে তেখেতক দলৰ ৰাজ্যিক অধ্যক্ষ পদৰ দায়িত্ব ল’বলৈও আহ্বান জনায়।
ইফালে এল ডি পি দলত যোগদান কৰি টেৰাঙে কয়, ‘বৰ্তমান দেশ আৰু ৰাজ্যৰ পৰিস্থিতিত সকলো অ-বিজেপি আৰু অ-কংগ্ৰেছী আঞ্চলিকতাবাদী শক্তি একত্ৰিত হোৱাৰ সময় আহি পৰিছে। এখন নতুন অসম গঢ়াৰ লক্ষ্যৰে বৰ্তমান পৰিস্থিতিত LDP দলটো আটাইতকৈ সক্ষম বুলি অনুভৱ কৰিলো’।
উল্লেখ্য যে, ১৯৭৯ৰ পৰা ১৯৮৫ চনলৈ চলা ঐতিহাসিক অসমৰ বিদেশী বহিস্কাৰ আন্দোলন আৰু পাহাৰীয়া জিলা কাৰ্বি আংলং আৰু ডিমা হাচাওৰ বহু আন্দোলনৰ সৈতে জড়িত টেৰাং এজন সুদক্ষ ৰাজনীতিবিদ।
বৈঠলাংছ’ সমষ্টিৰ পৰা টেৰাঙে একেৰাহে ১৯৮৫ ,১৯৯১ আৰু ১৯৯৬ চনত তিনিবাৰকৈ বিধায়ক হিচাপে বিধানসভালৈ নিৰ্বাচিত হৈছিল।
তেওঁ প্ৰফুল্ল কুমাৰ নেতৃত্বাধীন ৰাজ্য চৰকাৰৰ মন্ত্ৰীসভাৰ কৃষি আৰু জলসিঞ্চন মন্ত্ৰী হিচাপে দায়িত্ব পালন কৰিছিল। ১৯৯৭ চনত তেখেতক শ্ৰেষ্ঠ বিধায়ক হিচাবে নিৰ্বাচিত কৰা হয়।
কটন কলেজৰ পৰা দৰ্শন শাস্ত্ৰত ডিগ্ৰীধাৰী টেৰাঙে NTPC ত কৰ্মৰত হৈ থকা অৱস্থাত অসমৰ বিদেশী খেদা আন্দোলনত জঁপিয়াই পৰে।