এটা হোৱেটছএপ গ্ৰুপ, যাৰ নাম BJP ASSAM MEDIA DEPARTMENT। সোমবাৰে এই গ্ৰুপতে সাংবাদিকক নিমন্ত্ৰণ জনাই এক বাৰ্তা। বিষয় বিজেপিত যোগদান অনুষ্ঠান।
বাৰ্তাটোত স্পষ্টকৈ লিখা আছে ‘কাইলৈ ২০ অক্টোবৰ মঙ্গলবাৰে ভাৰতীয় জনতা পাৰ্টিৰ হেঙেৰাবাৰী ৰাজ্যিক কাৰ্যালয়ত দিনৰ ১২:oo বজাত কংগ্ৰেছ আৰু এ আই ইউ ডি এফৰ মিত্ৰতাৰ পিছত সংখ্যালঘু ৰাজনীতি মূলৰ পৰা আকৌ এগৰাকী প্ৰাক্তন বিধায়কে ভাৰতীয় জনতা পাৰ্টিৰ অসম প্ৰদেশৰ মাননীয় ৰাজ্যিক সভাপতি ৰণজিৎ দাস ডাঙৰীয়াৰ উপস্থিতিত যোগদান কৰিব।
সেয়েহে যোগদান অনুষ্ঠানৰ সময়চোৱাত বৈদ্যুতিন/ছপা সংবাদ মাধ্যমৰ প্ৰতিনিধিক বাতৰি সংগ্ৰহ কৰি প্ৰচাৰ আৰু প্ৰকাশ কৰিব বাবে উপস্থিতি আন্তৰিকতাৰে কামনা কৰিলোঁ।’
কিন্তু আজিৰ দিনটোত কোনো সংখ্যালঘু প্ৰাক্তন বিধায়ক যোগদানৰ বাবে নাহিল বিজেপিৰ ৰাজ্যিক কাৰ্যালয়লৈ।
উপায়ন্তৰ হৈ ৰাজ্যিক সভাপতি ৰঞ্জিত দাসে বিজেপিৰ হেঙেৰাবাৰীস্থিত কাৰ্যালয়ত এক সংবাদমেল সম্বোধন কৰে।
কাৰ্যসূচী অনুসৰি ১২ বজাৰ পৰা অনুষ্ঠিত হোৱাৰ কথা আছিল যোগদান অনুষ্ঠান। কিন্তু ২ ঘন্টা পলমকৈ অনুষ্ঠিত হ’ল যোগদানৰ পৰিৱৰ্তে সংবাদমেল। বিজেপি অফিচত সাংবাদিকসকলে দুঘন্টা ধৰি দি থাকিল বোন্দাপৰ।
চৰ্চা চলিছে পশ্চিম গোৱালপাৰা সমষ্টিৰ প্ৰাক্তন AIUDFৰ বিধায়ক শেখ শ্বাহ আলমে যোগদান কৰিব বিজেপিত।
সুত্ৰ অনুসৰি তেওঁ ৰাজ্যিক বিজেপিৰ কাৰ্যালয়ত যোগদানৰ বাবে আহিছিল যদিও ৰহস্যজনক কাৰণত যোগদান নকৰিলে বিজেপিত। সাংবাদিকৰ প্ৰশ্ন ‘আজি AIUDFৰ প্ৰাক্তন বিধায়ক যোগদান কৰাৰ কথা আছিল কিন্তু কিয় নকৰিলে?’
উত্তৰত একো নজনাৰ ভাও জুৰিলে সভাপতি ৰঞ্জিত দাসে।
চালে বেৰে কোৱাই ৰঞ্জিত দাসে উত্তৰত কয় ‘কথাটো তেনেকুৱা নহয়, আমি সংখ্যালঘু মৰ্চাৰ কাৰ্যনিৰ্বাহক বৈঠকত সিদ্ধান্ত লৈছিলো যে আমাৰ সংখ্যালঘু এলেকাত হ’বলগীয়া ২০খন সন্মিলনত সংখ্যালঘু নেতা-লোকে যোগদান কৰিব। আমাক এতিয়ালৈকে তেনেকৈ আবেদন কৰা নাই। বিভিন্নজনে সম্পৰ্ক স্থাপন কৰি আছে বিভিন্নজনৰ লগত।’
ইপিনে, পূৰ্বতে বহুকেইজন বিজেপি নেতাই কংগ্ৰেছক মুছলমানৰ দল বা ধৰ্মীয় সংখ্যালঘুৰ দল বুলি কৰা কটাক্ষ এতিয়া যেন অতীত হ’ল। সেই কনচেপ্ট এতিয়া সলনি হ’ল। এতিয়া কংগ্ৰেছ এআইয়ুডিএফ মানেই মুছলমান নহয়। ধৰ্মীয় সংখ্যালঘু ভোটৰে ২১ৰ গাদী দখলৰ কুচকাৱাজ ৰঞ্জিত দাসৰ।
আনহাতে, নৱেম্বৰ মাহত মণ্ডল পৰ্যায়ত ৩২০০ কাৰ্যনিৰ্বাহক সভা অনুষ্ঠিত কৰি ৰেকৰ্ড গঢ়াৰ প্ৰয়াস ৰঞ্জিত দাসৰ।
ইয়াৰোপৰি, নৱেম্বৰ মাহতে ৰাজ্যিক মহিলা মৰ্চাৰ উদ্যোগত মহিলাসকলৰ মাজত ভাষণ প্ৰদানৰ প্ৰতিযোগিতা অনুষ্ঠিত কৰিব আৰু তাৰ পৰা ১২০০ মহিলা নিৰ্বাচিত কৰিব ৰাজ্যিক বিজেপিয়ে।
তাৰ বিপৰীতে শিল্পী কলা-কুশলীক সাংস্কৃতিক অনুষ্ঠান, ভ্ৰাম্যমাণ থিয়েটাৰ অনুষ্ঠিত কৰাত বাধা ৰাজ্য চৰকাৰৰ। যাৰ ফলত চৰম হতাশাত ভুগিছে শিল্পী, সাংস্কৃতিক কৰ্মী বা কলা-কুশলী।
