‘’বিজেপি হটাও আৰু দেশ বচাওক, সৰ্বানন্দ হিমন্তক হটাওক অসম বচাওক।‘’ মুখ্য মন্ত্ৰী সৰ্বানন্দ সোণোৱালৰ সংবাদমেলৰ পাছতে শুকুৰবাৰে গুৱাহাটীৰ ৰাজীৱ ভৱনত এক সংবাদমেল পাতি এইদৰে সৰব হৈ পৰে প্ৰাক্তন মুখ্য মন্ত্ৰী তৰুণ গগৈ।
ইপিনে, অসমৰ ছাত্ৰ সমাজ, বুদ্ধিজীৱী, কৰ্মচাৰীৰ বিজেপি চৰকাৰৰ প্ৰতি অনিহা আহিছে বুলি মন্তব্য কৰি গগৈয়ে লগত কয়, ‘’সৰ্বানন্দৰ আজিৰ এই অৱস্থাৰ বাবে তেওঁ নিজেই দায়ী। অসমৰ ৰাইজ আজি জাগ্ৰত হৈছে। চৰকাৰে জ্বলি থকা জুই কুৰা নুমোৱাতকৈ ঘিউ হে ঢালি আছে।‘’
গগৈয়ে লগতে কয়,‘’অসমৰ লগতে ভাৰতবৰ্ষৰ বিভিন্ন ৰাজ্যত কা বিৰোধী আন্দোলন বিয়পি পৰিছে। আমাৰ অধিকাৰ খৰ্ব কৰিব বিচাৰিছে। অসমৰ মানুহ সাম্প্ৰদায়িক নহয়। জাতি ধৰ্ম বৰ্ণ নিৰ্বিশেষে এই বিল খনৰ বিৰুদ্ধে থিয় হৈছে। হিন্দু মুছলমান উভয়ে এই বিলৰ বিৰোধিতা কৰিছে।‘’
ইপিনে, পূৰ্বৰ সৰ্বানন্দ সোণোৱাল আৰু মুখ্য মন্ত্ৰী হোৱাৰ পাছত সৰ্বানন্দৰ স্থিতি সম্পূৰ্ণ ওলোটা হ’ল বুলি দাবী কৰি গগৈয়ে কয়, ‘’সৰ্বানন্দ সোণোৱালে IMDT বাতিল কৰোঁতে উচ্চতম ন্যায়ালয়ত ৫০-৬০ লাখ বিদেশী থকা বুলি কৈছিল। এতিয়া তেওঁ নগণ্য সংখ্যক বিদেশী থকা বুলি কৈছে। ভাৰত চৰকাৰে দিয়া শপতনামাত ভাৰতলৈ শৰণাৰ্থী অহাৰ কাৰণ উল্লেখ আছিল তাত কিন্তু ধৰ্মীয় নিৰ্যাতনৰ কথা উল্লেখ নাছিল।‘’
‘‘’ভোটৰ আশাত তেওঁলোকে এই বিলখন আনিছে। অসমৰ অৰ্থনীতি দিনক দিনে বেয়া হৈ অহা কথাটো ঢাকিবৰ বাবে তেওঁলোকে ধৰ্মীয় আবেগ সৃষ্টি কৰিবলৈ এই বিল খন আনিছে। অসমৰ কোনেও এই বিলখন বুজা নাই, বুজিছে কেৱল হিমন্ত সৰ্বানন্দ। অসমৰ মানুহক বুৰ্বক বুলি ভাবিছে যদি তেওঁলোকে মূৰ্খৰ স্বৰ্গত বাস কৰিছে,‘’- গগৈয়ে সংবাদমেলত কয়।
ইপিনে, ‘কা’ৰ সমৰ্থনত বিজেপিৰ শান্তি যাত্ৰাই ৰাজ্যলৈ শান্তি নানে বুলি দাবী কৰি গগৈৰ মন্তব্য ‘বিলখন বাতিল কৰিলেহে অসমলৈ শান্তি ঘুৰি আহিব।‘
আনহাতে, সেই একেখন সংবাদমেলত উপস্থিত থাকি ভাৰতীয় জাতীয় কংগ্ৰেছৰ সাধাৰণ সম্পাদক হৰিশ ৰাৱাটে সমগ্ৰ দেশ অসমৰ ভাৱনাৰ সৈতে একমত হৈ আছে বুলি মন্তব্য কৰে।
‘’কা ৰ বিৰুদ্ধে সমগ্ৰ দেশতে প্ৰতিবাদ হৈছে। কংগ্ৰেছে কেবৰ বিৰোধিতা কৰিছে লোকসভা আৰু ৰাজ্যসভাত। কংগ্ৰেছে এই বিল কেতিয়াও প্ৰয়োগ নকৰে। কংগ্ৰেছ কেব বিৰোধী আন্দোলনৰ পক্ষত আছে।‘’
তদুপৰি, চৰকাৰে নিজৰ জনসাধাৰণৰ ওপৰত স্বৈৰতন্ত্ৰ চলোৱা কাৰ্য্য কেতিয়াও গ্রহণযোগ্য নহয় বুলি মন্তব্য কৰি তেওঁ কয়, ‘’এয়া গৰিহণাযোগ্য। পীড়িত লোকৰ পক্ষত অসম প্ৰদেশ কংগ্ৰেছ কমিটি সদায় থিয় দি আহিছে।‘’
‘কা’ বাতিল নোহোৱা পৰ্যন্ত সমগ্ৰ দেশতে আন্দোলন চলি থাকিব বুলি উল্লেখ কৰে ৰাৱাটে।
