ৰাষ্ট্ৰীয় নাগৰিক পঞ্জীৰ চুড়ান্ত তালিকা প্ৰকাশৰ পূৰ্বে বা তাৰ পাছত এনআৰচিক পেলনীয়া কাগজ আখ্যা দিয়া প্ৰাক্তন মুখ্য মন্ত্ৰী তৰুণ গগৈয়ে অসমত ১০ লাখ বিদেশী ওলালে ৰাজনৈতিক জীৱন ত্যাগ কৰাৰ হুংকাৰ দিছে।
‘’৫০ লাখ বিদেশী অসমত নাই, সেইটো মই প্ৰত্যাহ্বান জনাইছো। যদি ১০ লাখ বিদেশী উলিয়াই দিয়ে তেনেহলে মই ৰাজনীতি এৰিম আৰু মাফো খুজিম।‘’ বৃহস্পতিবাৰে নিউ মিনিষ্টাৰ কলনীত সম্বোধন কৰা সংবাদমেলত বিজেপিৰ বিৰুদ্ধে প্ৰত্যাহ্বান জনাই এই হুংকাৰ দিয়ে প্ৰাক্তন মুখ্য মন্ত্ৰীগৰাকীয়ে।
গগৈৰ মতে ’১০ লাখো বিদেশী অসমত নাই। আছে যদি উলিয়াই দিয়ক।‘
ইপিনে, এনআৰচিয়ে সমস্যা সমাধান কৰাৰ বাদে নতুন নতুন সমস্যা সৃষ্টি হয় হৈছে বুলি উল্লেখ কৰি গগৈৰ প্ৰশ্ন ‘বিজেপিয়ে কিয় বিদেশীমুক্ত কৰিব নোৱাৰিলে?’
‘’বিদেশী চিনাক্তকৰণ নহৈ ভাৰতীয় লোকৰ নাম বাদ হে পৰিল। ভাৰত চৰকাৰে তদন্ত কৰিব লাগে যে লাখ লাখ ভাৰতীয়ৰ নাম কাৰ কাৰণে বাদ পৰিল। অসমীয়া খিলঞ্জীয়াৰ নামো ইয়াত বাদ পৰিল। যি সকল প্ৰকৃত খিলঞ্জীয়া তেওঁলোকৰ কাগজ পত্ৰ ইমানকৈ চোৱাৰ দৰকাৰ নাছিল। যি সকলে এই মানুহ বোৰৰ নাম বাদ পেলালে, যি সকলে তেওঁলোকৰ জীৱন অন্ধকাৰ কৰিলে তেওঁলোকৰ ওপৰত কেচ দিব লাগে,’’- সংবাদমেলত গগৈয়ে কয়।
গগৈৰ প্ৰশ্ন, ‘‘খিলঞ্জীয়া লোক সকলক অপমান কৰাৰ অধিকাৰ বিজেপি চৰকাৰক কোনে দিলে? তেওঁলোকক হাৰাশাস্তি কৰাৰ অধিকাৰ কত পালে?’’
আনহাতে, উক্ত সংবাদমেলৰ জৰিয়তে গগৈয়ে এনআৰচিৰ চূড়ান্ত তালিকাৰ পৰা বাদ পৰা প্ৰায় ১৯ লাখ লোকৰ নথি-পত্ৰৰ পুনৰীক্ষণ দাবী কৰে। অৱশ্যে ১০০ শতাংশ পুনৰীক্ষণ কৰিব নালাগে বুলি গগৈয়ে সংবাদমেলত কয়।
‘’’নাম বাদ পৰা খিনিৰ পুনৰীক্ষণ লাগে বুলি উচ্চতম ন্যায়ালয় আৰু ভাৰত চৰকাৰক কৈছোঁ। 100% verification ৰ কাম কৰিব নালাগে নহ’লে আৰু বহু বছৰ লাগিব,’’- সংবাদমেলত গগৈৰ মন্তব্য।
ইপিনে, এনআৰচিয়ে বিদেশী নেখেদি স্বদেশীকহে বিদেশী সজালে বুলি উল্লেখ কৰি গগৈয়ে কয়, ‘’যদি বিদেশীৰ নাম সোমাইছে তেনেহলে অভিযোগ দাখিল কৰক। মিডিয়াত এতিয়ালৈকে ৩-৪ টা বিদেশীৰ নাম হে ওলাইছে।‘’
আনহাতে, সেই একেখন সংবাদমেলতে গগৈয়ে বুঢ়া আৰক্ষী চকীত সংঘটিত কাণ্ডক ‘অমানৱীয়’ আখ্যা দিয়ে। লগতে আৰক্ষী বিষয়াজনক গ্ৰেপ্তাৰৰ দাবী কৰাৰ উপৰিও গগৈয়ে এই ঘটনাৰ ন্যায়িক তদন্ত দাবী কৰে।
‘’বুঢ়া আৰক্ষীৰ বিষয়া জনক নিলম্বন কৰাত মই সুখী নহয়। তেওঁৰ শাস্তি হোৱাটো বিচাৰো। আৰক্ষী বিষয়াজনক গ্ৰেপ্তাৰ কৰিব লাগে। মুখ্যমন্ত্ৰীৰ সিদ্ধান্তত আমি সন্তুষ্ট নহয়। ইয়াত যাতে তেওঁক ৰক্ষণাবেক্ষণ দিব নোৱাৰে গতিকে ইয়াৰ বাবে ন্যায়িক তদন্ত দিব লাগে যাতে পিছত এনেকুৱা নহয়,’’- গগৈয়ে কয়।
