উচ্চতম ন্যায়ালয়ৰ প্ৰাক্তন মুখ্য ন্যায়াধীশ ৰঞ্জন গগৈক ৰাজ্যসভাৰ সদস্য হিচাপে মনোনীত কৰা হৈছে। কেন্দ্ৰীয় চৰকাৰে আজি এক অধিসূচনা জাৰি কৰি এই কথা জনাইছে।
২০১৯ চনৰ ১৭ নৱেম্বৰৰ দিনটোত ৰঞ্জন গগৈয়ে উচ্চতম ন্যায়ালয়ৰ পৰা অৱসৰ গ্ৰহণ কৰিছিল।
উল্লেখ্য যে ভাৰতৰ সংবিধানৰ ধাৰা ৮০ৰ ১ নং অনুচ্ছেদৰ উপ অনুচ্ছেদ (এ) প্ৰদত্ত ক্ষমতা প্ৰয়োগেৰে ৰাষ্ট্ৰপতি ৰামনাথ কোবিন্দে ৰঞ্জন গগৈৰ নামটো ৰাজ্যসভালৈ মনোনীত কৰে।
তেওঁ ২০১০ চনত পাঞ্জাৱ আৰু হাৰিয়ানা উচ্চ ন্যায়ালয়লৈ বদলি হোৱাৰ পূৰ্বে ২০০১ চনত গুৱাহাটী উচ্চ ন্যায়ালয়ৰ ন্যায়াধীশ হিচাপে নিজৰ কেৰিয়াৰ আৰম্ভ কৰিছিল।
২০১৩ চনৰ ২৩ এপ্ৰিলত সৰ্বোচ্চ ন্যায়ালয়লৈ অহাৰ পূৰ্বে তেওঁ ২০১১ চনত পাঞ্জাৱ আৰু হাৰিয়ানা উচ্চ ন্যায়ালয়ৰ মুখ্য ন্যায়াধীশ হিচাপে দায়িত্ব পালন কৰিছিল।
উল্লেখ্য যে তেওঁক ২০১৮ চনৰ ৩ অক্টোবৰত দেশৰ ৪৬ সংখ্যক মুখ্য ন্যায়াধীশ নিযুক্তি দিয়া হৈছিল।
