ভাৰতৰ প্ৰাক্তন মুখ্য ন্যায়াধীশ ৰঞ্জন গগৈয়ে ৰাজ্যসভাৰ পৰা অৱসৰ গ্ৰহণ কৰিছে। তেওঁ ৰাজ্যসভাৰ মনোনীত সদস্য আছিল। সোমবাৰে ৰাজ্যসভাৰ অধ্যক্ষ চি পি ৰাধাকৃষ্ণনে গগৈক বিদায় জনাই কয়, “এজন বিশিষ্ট আইনবিদ হিচাপে তেওঁ ৰাজ্যসভাৰ আলোচনাত অতুলনীয় আইনী জ্ঞান আৰু অভিজ্ঞতা কঢ়িয়াই আনিছিল। ৰাজ্যসভাত তেওঁৰ এই কাৰ্য্যই বিধান প্ৰক্ৰিয়া আৰু জনস্বাৰ্থৰ প্ৰতি তেওঁৰ গভীৰ বুজাবুজি প্ৰতিফলিত কৰে। তেওঁৰ বুদ্ধিমান পৰামৰ্শ, সংযত বাক্য আৰু যি মৰ্যাদা তেওঁ সদনলৈ আনিছিল সেয়া অপূৰণীয় হৈ থাকিব।”
২০২০ চনৰ ১৬ মাৰ্চত কেন্দ্ৰীয় চৰকাৰে গগৈক ৰাজ্যসভালৈ মনোনীত কৰে। তেওঁৰ মনোনয়নৰ বাবে সেই সময়ত এক বৃহৎ বিতৰ্কৰ সৃষ্টি হৈছিল। কাৰণ উচ্চতম ন্যায়ালয়ৰ মুখ্য ন্যায়াধীশ হিচাপে অৱসৰ লোৱাৰ মাত্ৰ চাৰি মাহৰ পিছতে তেওঁ ৰাজ্যসভাৰ সদস্য হিচাপে মনোনীত হৈছিল।
মুখ্য ন্যায়াধীশৰ কাৰ্যকালত অনুকূল ৰায়দানৰ পুৰস্কাৰ হিচাপে চৰকাৰে তেওঁক ৰাজ্যসভাৰ সদস্য কৰি দিয়াৰ অভিযোগ উত্থাপন কৰিছিল বিৰোধীয়ে। আনহাতে, উচ্চতম ন্যায়ালয়ৰ বাৰ কাউন্সিলে এক বিবৃতিত গগৈক ৰাজ্যসভালৈ প্ৰেৰণৰ সিদ্ধান্তক সমৰ্থন কৰি কৈছিল যে ইয়াৰ ফলত ন্যায়পালিকাৰ আৰু বিধায়িনী দলৰ মাজত সমন্বয়ৰ সৃষ্টি হ’ব। ৰাজ্যসভা সমৃদ্ধিশালী হ’ব।
কিন্তু ৰাজ্যসভাৰ অভিলেখত কোৱা হৈছে যে ছবছৰত গগৈয়ে উচ্চ সদনৰ সদস্য হিচাপে এটাও প্ৰশ্ন কৰা নাছিল। তেওঁ মাত্ৰ এটা বিতৰ্কত অংশ লৈছিল। ৰাজ্যসভাত তেওঁৰ উপস্থিতি আছিল ৫৩ শতাংশ। যিটো অতি কম বুলি গণ্য কৰা হয়।
সেই অৰ্থত এই ছবছৰত ৰাজ্যসভাক বিশেষ গুৰুত্ব দিয়া নাছিল প্ৰাক্তন মুখ্য ন্যায়াধীশগৰাকীয়ে। বহুতে প্ৰশ্ন উত্থাপন কৰিছে যে দেশৰ প্ৰাক্তন মুখ্য ন্যায়াধীশজনৰ এটাও প্ৰশ্ন নাছিল নেকি? নাইবা চৰকাৰলৈ? নে চৰকাৰক কোনো ধৰণে বিব্ৰত কৰিব নিবিচৰাৰ বাবে মৌন হৈ থাকিল?
দিল্লী সেৱা বিধেয়কৰ বিতৰ্কৰ সময়ত ৰাজ্যসভাত দিয়া ভাষণে এক বৃহৎ বিতৰ্কৰ সৃষ্টি কৰিছিল। অভিযোগ উত্থাপন হৈছিল যে উচ্চতম ন্যায়ালয়ৰ এটা গোচৰত তেওঁ ৰাজ্যসভাত একেটা বিতৰ্কতে কেন্দ্ৰ আৰু ৰাজ্য চৰকাৰৰ ক্ষমতা আৰু অধিকাৰৰ ওপৰত বিপৰীত ৰায় দিছিল।
দিল্লী সেৱা আইনত যি ক্ষমতা ৰাজ্য চৰকাৰৰ হাতত আছিল, সেই ক্ষমতা কেন্দ্ৰই লয়। দিল্লী এখন পূৰ্ণাংগ ৰাজ্য নহয়। আৰক্ষীকে ধৰি কেইবাটাও বিভাগ পোনপটীয়াকৈ কেন্দ্ৰীয় চৰকাৰৰ হাতত। গগৈয়ে এনে এটা গোচৰত কেন্দ্ৰীয় হস্তক্ষেপৰ বিৰোধিতা কৰি ৰায় দিছিল। কিন্তু ৰাজ্যসভাত দিয়া ভাষণত তেওঁ দিল্লী সেৱা আইন সন্দৰ্ভত মোডী চৰকাৰৰ সিদ্ধান্তক সমৰ্থন কৰিছিল।
