আহমেদাবাদত ভয়ংকৰ বিমান দুৰ্ঘটনা সংঘটিত হৈছে। সূত্ৰ অনুসৰি সেই যাত্ৰীবাহী বিমানখনত আছিল গুজৰাটৰ প্ৰাক্তন মুখ্যমন্ত্ৰী বিজয় ৰূপানী। জানিব পৰা মতে যাত্ৰী তালিকাত তেওঁৰ নাম ১২ নম্বৰত আছিল।
লণ্ডন অভিমুখী এয়াৰ ইণ্ডিয়া বিমানখন আহমেদাবাদত উৰণৰ কিছু সময়ৰ পাছতে দুৰ্ঘটনাগ্ৰস্ত হয়। ২ জন পাইলট আৰু ১০ জন কেবিন ক্ৰুকে ধৰি বিমানখনত আছিল ২৪২ জন যাত্ৰী। শতাধিক যাত্ৰীৰ মৃত্যুৰ আশংকা কৰা হৈছে।
জানিব পৰা মতে, বৃহস্পতিবাৰে দিনৰ ১:১৭ বজাত আহমেদাবাদৰ পৰা লণ্ডনলৈ উৰণৰ সময়তে এই দুৰ্ঘটনা সংঘটিত হয়। বিমানবন্দৰৰ একেবাৰে শেষ প্ৰান্তত গৈ সংঘটিত হয় এই অগ্নিকাণ্ড।
অনুমান কৰা হৈছে যে বিমানখনৰ পিছফালৰ অংশটোৱে উৰণৰ সময়ত গছত খুন্দা মাৰে। সেইবাবেই এই অগ্নিকাণ্ড সংঘটিত হয়। গোটেই অঞ্চলটো ডাঠ ক’লা ধোঁৱাই আৱৰি ধৰে। সম্প্ৰতি জুই নিয়ন্ত্ৰণৰ প্ৰচেষ্টা অব্যাহত আছে। চৰ্দাৰ বল্লভভাই পেটেল আন্তঃৰাষ্ট্ৰীয় বিমানবন্দৰ কৰ্তৃপক্ষই বিমানখনৰ পৰা সকলোকে উদ্ধাৰ কৰি চিকিৎসালয়লৈ নিয়াৰ বাবে কাম কৰি আছে।
এয়াৰ ইণ্ডিয়া বয়িং ৭৮৭-৮ ড্ৰিমলাইনাৰ বিমানখনৰ এই দুৰ্ঘটনাৰ ফলত মেঘানীনগৰ অঞ্চলৰ বিমানবন্দৰৰ আশে-পাশে থকা ঘৰবোৰৰ ক্ষতিসাধন হয়।
জুইৰ তীব্ৰতা ইমানেই বেছি আছিল যে সমগ্ৰ বিমানখন প্ৰায় জ্বলি ছাই হৈ পৰিছে। বিমানখনৰ কিছু অংশ চাৰিওফালে সিঁচৰতি হৈ আছে। যুদ্ধকালীনভাৱে উদ্ধাৰ কাম চলি আছে। আপাততঃ বিমানবন্দৰৰ সকলো পথ আৰু গেট বন্ধ কৰি দিয়া হৈছে।
বিশেষজ্ঞসকলৰ মতে যিহেতু ই লণ্ডনলৈ গৈ আছিল, সেয়েহে বিমানৰ সময়ত যথেষ্ট ইন্ধন আছিল। ইমান ইন্ধনৰ উপস্থিতিৰ বাবে জুইৰ তীব্ৰতা ইমান বেছি।
বিমানখনত জুই লগা আৰু এনেদৰে দুৰ্ঘটনাগ্ৰস্ত হোৱাৰ সঠিক কাৰণ এই সময়ত জানিব পৰা হোৱা নাই। গছত খুন্দা মৰাৰ উপৰিও যান্ত্ৰিক বিকলতাৰ বিষয়টোৰো তদন্ত চলি আছে।
