শিৱসাগৰত ‘কেব’ক লৈ চিন্তিত একালৰ ছাত্ৰ নেতা ৰমু ওৰফে প্ৰণৱজিৎ চলিহা। আজি ছাত্ৰ নেতা গৰাকীয়ে নিজৰ আৱেগ প্ৰকাশ কৰি ক্ষুৰধাৰ সমালোচনা কৰে একালৰ সতীৰ্থ আৰু দল সংগঠনক।
“আমাৰ এতিয়া ভগ্ন স্বাস্থ্য যদিও সৈনিকৰ পোচাক খুলি থোৱা নাই, ৰণৰ কুকুৰা ৰণত মৰিম।” এইদৰে মন্তব্য কৰি পুনৰ আন্দোলনত নমাৰ হুংকাৰ দিয়ে একালৰ ছাত্ৰ নেতা ৰমু ওৰফে প্ৰণৱজিৎ চলিহাই।
“অসম আন্দোলনত ১৩ বছৰ জেল খালো। অসমৰ এখনো জেল নাই য’ত মই সোমোৱা নাই।” তেওঁ কয়।
“মোক সকলোৱে কয় মই অসাংবিধানিক শব্দ ব্যৱহাৰ কৰো বুলি।’ উল্লেখ কৰি তেওঁ বদনক বৰফুকনক মাতিব পৰা সাংবিধানিক শব্দ কি আছে বুলি প্ৰশ্ন কৰে।
“সৰ্বানন্দ সোণোৱাল, ৰাস্তাত নচা হিমন্ত বিশ্ব শৰ্মা, অতুল বৰা, কেশৱ মহন্ত, ফণীভূষন চৌধুৰীক সম্বোধন কৰিবলৈ সাংবাধানিক শব্দ মই ব্যৱহাৰ নকৰো” বুলি কৈ ক্ষোভ উজাৰি এক প্ৰকাৰে এই সকল নেতাক আধুনিক অসমৰ বদন বুলিয়েই আখ্যা দিয়ে একালৰ প্ৰতাপী ছাত্ৰ নেতা জনে।
আনহাতে বৰ্তমান আন্দোলন কৰি থকা দল-সংগঠন বিলাকৰ ওপৰতো ক্ষোভ উজাৰি প্ৰণৱজিৎ চলিহাই কয় “আজিৰ আন্দোলন কৰা দল-সংগঠন বিলাকে নিজৰ সংগঠনৰ অস্তিত্ব ৰাখিবলৈ আন্দোলন কৰিছে। সকলো সংগঠনে ‘কেব’ৰ বিৰেধিতা কৰিছে তেন্তে আজিলৈকে কিয় সকলোকে এদিনো একেখন মঞ্চত দেখা নাই। কিয় কাৰোৰে হৃদয়ৰ পৰা ওলাই অহা ‘জয় আই অসম’ শুনা নাই।”
“আন্দোলনত লাচিত লাচিত ক’লে নহব, লাচিত হ’ব পাৰিব লাগিব। লাচিত বৰফুকনে টায়াৰ জ্বলোৱা নাছিলে, লাচিতে ৰাজপথত আন্দোলনো কৰা নাছিলে আৰু অনশনো কৰা নাছিলে।” বুলি উল্লেখ কৰি লাচিতৰ নাম লৈ লাচিত নহ’লে এই বীৰ পুৰুষজনৰ নাম নল’বলৈ আহ্বান জনায় একালৰ প্ৰতাপী ছাত্ৰ নেতাগৰাকীয়ে।
ইফালে তেওঁ একালৰ সতীৰ্থ অতুল বৰা আৰু কেশৱ মহন্তক জন্মগত দেশদ্ৰোহী বুলি কয়। তেওঁ কয় যে সিহঁতি দেশ আৰু জাতিৰ বাবে আন্দোলন কৰাই নাছিল। সিহঁতে কেৱল ক্ষমতা আৰু টকাৰ বাবেহে আন্দোলন কৰিছিল।
অতুল বৰা, কেশৱ মহন্ত, ফণীভূষণ চৌধুৰীয়ে কেৱল ক্ষমতাৰ বাবে ‘কেব’ক সমৰ্থন কৰি ৮৫৫ জন শ্বহীদকে নহয় অসম আন্দোলনত আমাৰ দৰে জীয়াই থকা সকলকো নিৰ্লজ্জভাৱে অপমান কৰিলে বুলি মন্তব্য কৰে একালৰ ছাত্ৰ নেতাগৰাকীয়ে। লগতে ‘কেব’ আহিলে অসম ধ্বংস হ’ব বুলিও তেওঁ কয়।
তাৰোপৰি তেওঁ কয় যে পৃথিৱীত এনেকোৱা কোনখন দেশ আছে যি য়ে বিদেশী আনিম বুলি কয়। একমাত্ৰ এইখনেই দেশ যিখনে বিদেশী আনিম বুলি কয়।
