বোকাখাতত কংগ্ৰেছৰ সভাত দলীয় কৰ্মীৰ ওপৰত ক্ষোভিত অজন্তা নেওগ
লােকসভা নির্বাচনৰ দিন ওচৰ চাপি অহাৰ লগে লগে ৰাজনৈতিক দলবােৰৰ মাজত বৃদ্ধি পাইছে ৰাজনৈতিক তৎপৰতা। ৰাজ্যৰ বিভিন্ন সমষ্টিৰ লগতে কলিয়াবৰ লোকসভা সমষ্টিৰ বোকাখাত বিধান সভা সমষ্টিতো সক্ৰিয় হৈছে ৰাজনৈতিক দলসমূহ।
৩ এপ্রিলত কলিয়াবৰ লােকসভা সমষ্টিৰ কংগ্ৰেছী প্রার্থী গৌৰৱ গগৈৰ হৈ বােকাখাতত নির্বাচনী প্রচাৰ চলাব নিখিল ভাৰত কংগ্ৰেছ কমিটিৰ সভাপতি ৰাহুল গান্ধীয়ে। এই সম্পর্কত আজি বােকাখাত কংগ্ৰেছ ভৱনত গােলাঘাটৰ বিধায়িকা অজন্তা নেওগৰ উপস্থিতিত মণ্ডল আৰু বুথ পর্যায়ৰ এখন কৰ্মীসভা অনুষ্ঠিত হয়।
সভাত ৰাহুল গান্ধীৰ নির্বাচনী সভালৈ কোন মণ্ডলে কিমান মানুহ আনিব সেই লৈ সকলােৰে মতামত বিচৰাত সকলাে মণ্ডলৰ পৰা ৫০০-১০০০ কৈ মানুহ সভালৈ অনাৰ প্রতিশ্রুতি আহাৰ পিছতে ক্ষোভিত হৈ পৰে বিধায়িকা তথা প্রাক্তন কংগ্ৰেছী মন্ত্রী অজন্তা নেওগ । উপস্থিত সকলােকে মিছা প্রতিশ্রুতিৰ পৰিৱৰ্তে প্রার্থী গৌৰৱ গগৈক বিজয়ী কৰাবৰ বাবে সংকল্প ল’বলৈ দলীয় কৰ্মীক আহ্বান জনায় অজন্তা নেওগে।
আনহাতে কৰ্মীসভাত প্রদেশ কংগ্ৰেছৰ সাধাৰণ সম্পাদক দাদু টায়ে মিত্রজোঁটৰ প্রার্থী মণিমাধৱ নীলা শিয়াল বুলি আখ্যা দি কয় যে ছাত্ৰ সন্থাই ইমান দিনে মণি মাধৱ মহত্তক গাখীৰ খুৱাই সাপ পুহি ৰাখিছিল।