আগন্তুক ঘৰুৱা ক্ৰিকেট ছিজনত অসমৰ ছিনিয়ৰ ক্ৰিকেট দলটোৰ প্ৰদৰ্শন যাতে বিগত ছিজন সমূহৰ তুলনাত উন্নতমানৰ হয় তাৰ প্ৰতি লক্ষ্য ৰাখি অসম ক্ৰিকেট সন্থা (এ চি এ)ই নিযুক্তি দিব এগৰাকী বেটিং প্ৰশিক্ষক। ইয়াৰ বাবে ইতিমধ্যে দেশৰ প্ৰায় ৪০ গৰাকীয়ে ছিনিয়ৰ দলটোৰ প্ৰশিক্ষকৰ দায়িত্ব ল’বলৈ আগ্ৰহ প্ৰকাশ কৰা পৰিলক্ষিত হৈছে।
প্ৰশিক্ষকৰ দায়িত্ব ল’বলৈ আগ্ৰহ প্ৰকাশ কৰা ৪০ গৰাকীৰ ভিতৰত দুজন প্ৰাক্তন আন্তঃৰাষ্ট্ৰীয় ক্ৰিকেটাৰৰ নামেই এতিয়া শীৰ্ষত থকা বুলি অসম ক্ৰিকেট সন্থাৰ এক সূত্ৰই জানিবলৈ দিয়ে। ইয়াৰে এজন হৈছে দীনেশ মংগিয়া আৰু আন এজন হৈছে অজয় ৰাত্ৰা।
অসম ক্ৰিকেট সন্থাই প্ৰশিক্ষক নিযুক্তিৰ বাবে যোৱা ৭ জুনৰ পৰা আয়োজন কৰা সাক্ষাৎকাৰত এই দুগৰাকী প্ৰাক্তন খেলুৱৈৰ উপৰি জাকাৰিয়া জাফ্ৰিয়েও অংশগ্ৰহণ কৰে। মুঠ ৬০ গৰাকীয়ে আবেদন জনাইছিল যদিও ৪০ গৰাকীহে সাক্ষাৎকাৰত অংশগ্ৰহণ কৰিছে।
বাকী ২০ গৰাকীৰ বাবে অহা ১৪ জুনত পুনৰ সাক্ষাৎকাৰ অনুষ্ঠিত কৰিব বুলি এ চি এৰ তৰফৰ পৰা জানিবলৈ দিয়ে। আৰু ইয়াৰ পিছতে অৰ্থাৎ ১৫ জুনত অসমৰ ছিনিয়ৰ ক্ৰিকেট দলৰ প্ৰশিক্ষকৰ নাম আনুষ্ঠানিকভাৱে ঘোষণা কৰাৰ সম্ভাৱনা আছে।
উল্লেখযোগ্য যে প্ৰশিক্ষকৰ দৌৰৰ শীৰ্ষত থকা তথা এ চি এৰ পচন্দ দীনেশ মংগিয়াই ভাৰতৰ হৈ ৫৭ খন এদিনীয়া মেচত অংশ লৈ ৪টা অৰ্ধশতক আৰু এটা শতকেৰে মুঠ ১২৩০ ৰান সংগ্ৰহ কৰিছিল। মন কৰিব লগীয়া যে মংগিয়াই কেৰিয়াৰৰ একমাত্ৰ শতকীয় ইনিংছটো খেলিছিল গুৱাহাটীত। জিম্বাব’ৱেৰ বিৰুদ্ধে গুৱাহাটীৰ নেহৰু ষ্টেড়িয়ামত অনুষ্ঠিত মেচখনত তেওঁ ১৫৯ ৰানৰ বিস্ফোৰক ইনিংছ খেলিছিল।
আনহাতে অজয় ৰাত্ৰাই ভাৰতৰ হৈ ছয়খন টেষ্ট আৰু ১২খন এদিনীয়া মেচ খেলিছিল। আন্তঃৰাষ্ট্ৰীয় কেৰিয়াৰত বিশেষ সফলতা অৰ্জন কৰিবলৈ সক্ষম নোহোৱা ৰাত্ৰাই ফাৰ্ষ্টক্লাছ কেৰিয়াৰত কিছু পৰিমানে সফল হ’বলৈ সক্ষম হয়।
এতিয়া এই দুগৰাকী প্ৰাক্তন আন্তঃৰাষ্ট্ৰীয় ক্ৰিকেটাৰৰ মাজৰ পৰা কোনজনক অসম ক্ৰিকেট দলৰ প্ৰশিক্ষকৰ দায়িত্বভাৰ অৰ্পণ কৰে সেয়া লক্ষ্যণীয় হ’ব।
