প্ৰাক্তন ভাৰতীয় ক্ৰিকেট তাৰকা অংশুমান গাইকোৱাডৰ দেহাৱসান

টিম ইণ্ডিয়াৰ প্ৰাক্তন ক্ৰিকেটাৰ তথা ৰাষ্ট্ৰীয় দলৰ প্ৰাক্তন মুখ্য প্ৰশিক্ষক অংশুমান গাইকোৱাডৰ দেহাৱসান ঘটিছে। গাইকোৱাডে বুধবাৰে শেষ নিশ্বাস ত্যাগ কৰে। কিছুদিন ধৰি তেওঁ মাৰাত্মক কেন্সাৰ ৰোগত আক্ৰান্ত হৈ আছিল। মৃত্যুৰ সময়ত তেওঁৰ বয়স আছিল ৭১ বছৰ। স্বাভাৱিকতে গাইকোৱাডৰ মৃত্যুত ভাৰতীয় ক্ৰিকেট জগতত শোকৰ ছাঁ পৰিছে।

গাইকোৱাডক চিকিৎসাৰ বাবে বিমানেৰে লণ্ডনলৈ লৈ যোৱা হৈছিল। কেইমাহমান আগতে তেওঁ ইংলেণ্ডৰ পৰা বৰোদালৈ উভতি আহিছিল। তাতেই তেওঁৰ চিকিৎসা চলি আছিল। অৱশ্যে বুধবাৰে জীৱন যুদ্ধত পৰাস্ত হয় তাৰকা ক্ৰিকেটাৰগৰাকী।

প্ৰধানমন্ত্ৰী নৰেন্দ্ৰ মোদীয়ে টিম ইণ্ডিয়াৰ প্ৰাক্তন তাৰকাগৰাকীৰ মৃত্যুত শোক প্ৰকাশ কৰিছে। বি চি চি আইৰ সম্পাদক জয় শ্বাহেও গাইকোৱাডৰ মৃত্যুত শোক প্ৰকাশ কৰে। তেওঁ টুইটযোগে অংশুমানৰ পৰিয়াললৈ সমবেদনা জ্ঞাপন কৰে। কিছুদিন পূৰ্বে বিচিচিআইয়ে গাইকোৱাডৰ চিকিৎসাৰ বাবে প্ৰাক্তন তাৰকাগৰাকীক ১ কোটি টকা দিয়াৰ সিদ্ধান্ত লৈছিল।

লগতে পঢ়কঃ অলিম্পিক পদক জয়ৰ দিশে ধাৱমান লাভলীনা বৰগোহাঁই; নৰৱেৰ প্ৰতিদ্বন্দ্বীক হৰুৱাই কোৱাৰ্টাৰ ফাইনেলত প্ৰৱেশ

অংশুমান গাইকোৱাডে ১৯৭৫ চনৰ পৰা ১৯৮৭ চনৰ ভিতৰত ভাৰতৰ হৈ ৪০ খন টেষ্ট আৰু ১৫ খন এদিনীয়া আন্তৰ্জাতিক মেচ খেলিছিল। টেষ্টত তেওঁ গড়ে ৩০.০৭ ১৯৮৫ ৰান সংগ্ৰহ কৰে। ২ টা শতক আৰু ১০টা অৰ্ধশতক অৰ্জন কৰে। টেষ্টত গাইকোৱাডৰ ব্যক্তিগত ইনিংছ সৰ্বাধিক ২০১ ৰানৰ। টেষ্ট ক্ৰিকেটত তেওঁৰ ২টা উইকেটো আছে।

এদিনীয়া ক্ৰিকেটত অংশুমানে ২০.৬৯ গড়ে ২৬৯ ৰান সংগ্ৰহ কৰে। তেওঁ এটা অৰ্ধশতক অৰ্জন কৰে। দেশৰ জাৰ্চিত এদিনীয়া ক্ৰিকেটত গাইকোৱাডৰ সৰ্বোচ্চ ব্যক্তিগত ইনিংছ ৭৮ নট আউট। এদিনীয়া ক্ৰিকেটত ১ টা উইকেটো দখল কৰিছে।

অংশুমান গাইকোৱাডে ঘৰুৱা ক্ৰিকেটত বৰোদাৰ হৈ খেলিছিল। ২০৬ খন প্ৰথম শ্ৰেণীৰ মেচত তেওঁৰ ১২১৩৬ ৰান কৰে। লগতে ১৪৩টা উইকেটো দখল কৰে। অংশুমানৰ পিতৃ দত্তজিৰাও গাইকোৱাডে ভাৰতৰ হৈ ১১খন টেষ্ট খেলিছিল। অংশুমান গাইকোৱাডে ১৯৯৭ চনৰ পৰা ১৯৯৯ চনলৈ ভাৰতীয় দলৰ প্ৰশিক্ষক হিচাপে কাম কৰিছিল। তেওঁৰ পিতৃ দত্তজিৰাও ১৯৭৮ চনত ভাৰতৰ প্ৰশিক্ষক হয়।

লগতে পঢ়কঃ ইউপিএছচিয়ে বাতিল কৰিলে পূজা খেডকাৰৰ প্ৰাৰ্থীত্ব; ভৱিষ্যতে পৰীক্ষাত অৱতীৰ্ণ হোৱাৰ পৰা নিষেধাজ্ঞা

অংশুমান গাইকোৱাডো ৰাষ্ট্ৰীয় নিৰ্বাচক হিচাপেও কাৰ্যনিৰ্বাহ কৰিছিল। টেষ্টত পাকিস্তানৰ বিৰুদ্ধে গাইকোৱাডে সৰ্বাধিক ব্যক্তিগত ইনিংছ খেলিছিল। ১৯৮২-৮৩ চনৰ ছিজনৰ সেই ইনিংছত তেওঁ ক্ৰীজত ৬৭১ মিনিট সময় কটাই ৪৩৬টা বল খেলিছিল।