দেশৰ পৰৱৰ্তী গৰাকী কম্প্ট্ৰলাৰ জেনেৰেল অৱ ইণ্ডিয়া, চমুকৈ ‘কেগ’ৰ দায়িত্ব অৰ্পণ কৰা হৈছে জম্মু-কাশ্মীৰৰ প্ৰাক্তন উপ-ৰাজ্যপাল গিৰীশ চন্দ্ৰ মূৰ্মুক।
মূৰ্মুৱে বৰ্তমানৰ কেগ ৰাজীৱ মহৰ্ষিৰ পৰা কাৰ্যভাৰ গ্ৰহণ কৰিব।
১৯৭৮ বেটছৰ ৰাজস্থান কেডাৰৰ আই এ এছ বিষয়া ৰাজীৱ মহৰ্ষিয়ে ৭ আগষ্টত অৱসৰ গ্ৰহণ কৰাৰ সূত্ৰেই গিৰীশ চন্দ্ৰ মূৰ্মুক সেই পদবীত অধিস্থিত কৰা হৈছে।
কিছুদিন পূৰ্বে মূৰ্মুৱে কাশ্মীৰৰ উপ-ৰাজ্যপাল পদৰ পৰা পদত্যাগ কৰিছিল।
তেওঁৰ ঠাইত বিজেপিৰ নেতা তথা প্ৰাক্তন কেন্দ্ৰীয় মন্ত্ৰী মনোজ সিনহাক কাশ্মীৰৰ উপ-ৰাজ্যপাল হিচাবে নিযুক্তি দিয়া হৈছিল।
নতুন কেগ হিচাবে দায়িত্ব লাভ কৰা গিৰীশ চন্দ্ৰ মূৰ্মু ১৯৮৫ চনৰ গুজৰাট কেডাৰৰ আই এ এছ বিষয়া।
নৰেন্দ্ৰ মোডী গুজৰাটৰ মুখ্যমন্ত্ৰী হৈ থকাৰ সময়ত মূৰ্মুই ৰাজ্যখনৰ গৃহ বিভাগত কৰ্মৰত আছিল।
পৰৱৰ্তী সময়ত তেওঁ গুজৰাটৰ মুখ্য সচিবৰ দায়িত্বতো অধিস্থিত হৈছিল।
১৯৫৯ চনৰ ২১ নৱেম্বৰত ওড়িশাৰ ময়ূৰভঞ্জ জিলাৰ বেননতি অঞ্চলত জন্মগ্ৰহণ কৰা মূৰ্মুই উৎকল বিশ্ববিদ্যালয়ৰ পৰা ৰাজনীতি বিজ্ঞান বিষয়ত স্নাতকোত্তৰ ডিগ্ৰী গ্ৰহণ কৰিছিল।
এগৰাকী সুদক্ষ প্ৰশাসনিক বিষয়া হিচাবে তেওঁৰ বেছ সুনাম আছে।
