আজি সন্ধিয়া অৰুণাচল প্ৰদেশত সংঘটিত হৈছে এক চাঞ্চল্যকৰ হত্যাকাণ্ড। ৰাজ্যখনৰ ভাৰত-ম্যানমাৰ সীমান্তৰ টিৰাপ জিলাত উগ্ৰপন্থীয়ে গুলীয়াই হত্যা কৰিছে খোছা (পশ্চিম)ৰ প্ৰাক্তন বিধায়ক ইউমচেম মাটেয়ক।
সূত্ৰ অনুসৰি, লাজু থানাৰ অন্তৰ্গত ৰাহো গাঁৱত অনুষ্ঠিত হোৱা এক অনুষ্ঠানত অংশগ্ৰহণ কৰি থকা অৱস্থাত অচিনাক্ত ব্যক্তিয়ে তেওঁক অপহৰণ কৰি লৈ যায়।
ইয়াৰ পিছত তেওঁক ভাৰত-ম্যানমাৰ সীমান্তৰ দিশত লৈ যোৱা হয় আৰু উক্ত স্থানতে তেওঁৰ মৃতদেহ উদ্ধাৰ হয়।প্ৰাৰম্ভিক বাতৰি অনুসৰি, নগা উগ্ৰপন্থীয়ে তেওঁক হত্যা কৰা বুলি সন্দেহ কৰা হৈছে।
টিৰাপ জিলা আৰক্ষীৰ এগৰাকী বিষয়াই এই সন্দৰ্ভত তদন্ত চলি থকা বুলি জানিবলৈ দিয়ে। উল্লেখ্য যে, মাটেয়ে ২০০৯ চনৰ পৰা ২০১৪ চনলৈ কংগ্ৰেছ দলক প্ৰতিনিধিত্ব কৰি খোংছা (পশ্চিম)ৰ বিধায়ক হিচাপে কাৰ্যনিৰ্বাহ কৰিছিল।
পিছত ২০১৫ চনত তেওঁ বিজেপিত যোগদান কৰে। আগন্তুক ২০২৪ চনৰ ৰাজ্যিক বিধানসভা নিৰ্বাচনৰ বাবে তেওঁ একেটা সমষ্টিৰ পৰাই টিকট প্ৰত্যাশী আছিল বুলি জানিব পৰা গৈছে।
