তিনিচুকীয়াত ৬০.২১ কোটি টকা ব্যয়সাপেক্ষে নিৰ্মাণ কৰা হ’ব ঘাইপথ সংযোগী ৰে’লৱে উৰণীয়া সেতু। আজি মুখ্য মন্ত্ৰী সৰ্বানন্দ সোণোৱালে তিনিচুকীয়া নগৰত উক্ত উৰণীয়া সেতুৰ আধাৰশিলা স্থাপন কৰে।
এই উপলক্ষে তিনিচুকীয়াৰ গোলাপ চন্দ্ৰ ৰবী চন্দ্ৰ নাট্যমন্দিৰত অনুষ্ঠিত সভাত ভাষণ দি সোণোৱালে কয়, ‘চৰকাৰে তিনিচুকীয়াক এখন অত্যাধুনিক চহৰ হিচাপে গঢ়িবলৈ বিভিন্ন পদক্ষেপ লৈছে’।
উল্লেখযোগ্য যে কেন্দ্ৰীয় আৰু ৰাজ্য চৰকাৰৰ ৫০:৫০ অনুপাতৰ আৰ্থিক সাহায্যৰে নিৰ্মাণ হ’বলগীয়া উৰণীয়া সেঁতুখনৰ মুঠ দৈৰ্ঘ হৈছে ৫৬৩.৪০ মিটাৰ।
মুখ্য মন্ত্ৰীৰ সৈতে আধাৰশিলা স্থাপন কাৰ্যসূচীত অংশগ্ৰহণ কৰি ৰাজ্যৰ গড়কাপ্টানি তথা বিত্ত আৰু স্বাস্থ্য বিভাগৰ মন্ত্ৰী হিমন্ত বিশ্ব শৰ্মাই কয় যে ৰাইজে দীৰ্ঘ দিনৰ পৰা দাবী জনাই অহা উৰণীয়া সেতুৰ কাম বৰ্তমানৰ চৰকাৰে আৰম্ভ কৰিছে।
তেওঁ লগতে জনাই যে অসম চৰকাৰে কেন্দ্ৰীয় চৰকাৰৰ সহযোগত ৰাজ্যৰ ২৬খন ৰে’লৱে উৰণীয়া সেঁতু নিৰ্মাণৰ বাবে পদক্ষেপ গ্ৰহণ কৰিছে।
আজিৰ উক্ত সভাত কেন্দ্ৰীয় খাদ্য প্ৰস্তুতকৰণ উদ্যোগ বিভাগৰ ৰাজ্যিক মন্ত্ৰী ৰামেশ্বৰ তেলী, তিনিচুকীয়াৰ বিধায়ক সঞ্জয় কীশান, মাৰ্ঘেৰিটাৰ বিধায়ক ভাস্কৰ শৰ্মা, দুলিয়াজনৰ বিধায়ক তেৰশ গোৱালা, গড়কাপ্টানি বিভাগৰ আয়ুক্ত সচিব, তিনিচুকীয়া জিলাৰ উপায়ুক্তকে ধৰি বহু স্থানীয় লোক উপস্থিত থাকে।
