গোলাঘাট আৰক্ষীয়ে আজি এক অভিযান চলাই গাড়ী চুৰি চক্ৰৰ লগত জড়িত চাৰিজনক গ্ৰেপ্তাৰ কৰিবলৈ সক্ষম হয়। লগতে এখন চুৰি স্কুটীও উদ্ধাৰ কৰিবলৈ সক্ষম হয়। আটকাধীন লোককেইজনক ক্ৰমে দীপমণি গগৈ, দীপক শইকীয়া, জয়ন্ত বৰা আৰু উদয় শইকীয়া বুলি আৰক্ষীয়ে চিনাক্ত কৰিছে।
মন কৰিব লগীয়া যে আটকাধীন দীপমণি গগৈ অসম সংগ্ৰামী যুৱ ছাত্ৰ পৰিষদৰ গোলাঘাট জিলা সমিতিৰ সভাপতি বুলি জানিব পৰা গৈছে। দীপমণি গোলাঘাট জিলাৰ জোনাকী নগৰৰ নিৱাসী। আৰক্ষীয়ে পুৱা দীপমণিক জোনাকী নগৰৰ ঘৰৰ পৰাই গ্ৰেপ্তাৰ কৰাৰ লগতে এখন চুৰি স্কুটীয়ো উদ্ধাৰ কৰে।
আনহাতে দীপক শইকীয়া আৰু উদয় শইকীয়াক আৰক্ষীয়ে যোৰহাটৰ পৰা গ্ৰেপ্তাৰ কৰাৰ লগতে জয়ন্ত বৰাক গোলাঘাট জিলাৰ হালিকীহাটৰ পৰা গ্ৰেপ্তাৰ কৰে। গোলাঘাট জিলাৰ লগতে বিভিন্ন ঠাইৰ পৰা মটৰচাইকেল চুৰি কৰি নাগালেণ্ডত বিক্ৰী কৰি অহা বুলি আৰক্ষীৰ আগত আটকাধীন আটাইকেইজনে স্কীকাৰোক্তি প্ৰদান কৰিছে।