ৰাছিয়াৰ এখন প্ৰসিদ্ধ মেডিকেল ইউনিভাৰ্চিটিৰ হোষ্টেলত ছুৰীৰে আক্ৰমণৰ ঘটনাই চাঞ্চল্যৰ সৃষ্টি কৰিছে। উফা চহৰৰ ষ্টেট মেডিকেল ইউনিভাৰ্চিটিৰ হোষ্টেলত শনিবাৰে সংঘটিত হোৱা এই ঘটনাত ৪ ভাৰতীয় ছাত্ৰ আৰু দুজন আৰক্ষী সহ মুঠ ৮ জন লোক গুৰুতৰভাৱে আহত হয়।
ঘটনাস্থলীৰ পৰাই আৰক্ষীয়ে গ্ৰেপ্তাৰ কৰে অভিযুক্ত এটি ১৫ বছৰীয়া কিশোৰক। আহত আটাইকেইজন স্থানীয় চিকিৎসালয়ত চিকিৎসাধীন হৈ আছে। ৰাছিয়াৰ তদন্ত সংস্থাই এই ঘটনাৰ তদন্ত আৰম্ভ কৰিছে।
উফা আৰক্ষীৰ সূত্ৰ অনুসৰি শনিবাৰে হোষ্টেলৰ ক্ৰীড়া হলত ছাত্ৰ-ছাত্ৰীৰ সমাগম হৈছিল। সেই সময়ত কিশোৰগৰাকী হঠাতে তাত সোমাই পৰে। প্ৰথমতে তেওঁৰ উপস্থিতিত বিশেষ সন্দেহ কোনেও কৰা নাছিল। অভিযোগ অনুসৰি, অলপ সময়ৰ ভিতৰতে তেওঁ ছুৰী উলিয়াই নিৰ্বিচাৰে আঘাত কৰিবলৈ আৰম্ভ কৰে। নিমিষতে গোটেই হলঘৰটোত আতংক বিয়পি পৰে। ছুৰীৰ আঘাতত ৰক্তাক্ত হৈ মজিয়াত পৰি ৰয় ৬ জন লোক।
ঘটনাৰ খবৰ পোৱাৰ পিছতে আৰক্ষীয়ে ততাতয়াকৈ আহি হোষ্টেলত উপস্থিত হয়। অভিযুক্তই তেতিয়াও এই হুলস্থুলীয়া পৰিৱেশৰ সৃষ্টি কৰিছিল। চাৰিজন আৰক্ষী বিষয়াই তেওঁক ঘেৰি ধৰে। পৰিস্থিতি প্ৰতিকূল বুলি উপলব্ধি কৰি কিশোৰগৰাকীয়ে পলাবলৈ চেষ্টা কৰে। সেই সময়ত যেতিয়া দুজন আৰক্ষী বিষয়াই তেওঁক বাধা দিবলৈ আগবাঢ়ি আহিল, তেতিয়া তেওঁলোককো ছুৰীৰে আক্ৰমণ কৰে। গুৰুতৰভাৱে আহত হয় আৰক্ষী বিষয়া দুজনো। শেষত বহু চেষ্টাৰ অন্তত অভিযুক্তক গ্ৰেপ্তাৰ কৰা হয়।
আৰক্ষীয়ে জনোৱা মতে, গ্ৰেপ্তাৰৰ সময়ত অভিযুক্ত নিজেও গুৰুতৰভাৱে আহত হয়। সংকটজনক অৱস্থাত তেওঁক স্থানীয় চিকিৎসালয়ত ভৰ্তি কৰোৱা হৈছে। যদিও অভিযুক্তৰ বয়স ১৫ বছৰ, তথাপিও তেওঁ নাবালক হোৱাৰ বাবে তেওঁৰ নাম প্ৰকাশ কৰা হোৱা নাই। ৰাছিয়াৰ গৃহ মন্ত্ৰালয়ৰ মুখপাত্ৰ মেজৰ জেনেৰেল ইৰিনা ভল্কে কয় যে, ‘গ্ৰেপ্তাৰৰ সময়ত অভিযুক্তই তীব্ৰ প্ৰতিৰোধ কৰিছিল। সেই সময়ত দুজন আৰক্ষী বিষয়াক ছুৰীৰে আঘাত কৰা হৈছিল। অভিযুক্তই নিজেও নিজকে আঘাত কৰিছিল।”
এই আক্ৰমণৰ প্ৰত্যক্ষদৰ্শীয়ে দাবী কৰে যে সমগ্ৰ হোষ্টেলৰ মজিয়া তেজেৰে ৰাঙলী হৈ পৰিছে। ছাত্ৰ-ছাত্ৰীসকল আতংকিত হৈ পৰে। ৰেন টিভিয়ে এম্বুলেন্সত আহতসকলক চিকিৎসালয়লৈ লৈ যোৱাৰ ভিডিঅ’ ফুটেজ প্ৰকাশ কৰে। আহত ছাত্ৰ-ছাত্ৰী আৰু আৰক্ষী বিষয়াক স্থানীয় ক্লিনিকেল হস্পিতালত ভৰ্তি কৰোৱা হৈছে। ৰাছিয়াৰ তদন্ত সংস্থাই এই ঘটনাৰ আঁৰৰ কাৰণ নিৰ্ণয় কৰিবলৈ তদন্ত আৰম্ভ কৰিছে।
