মণিপুৰত ভাৰতীয় সেনাৰ বিশেষ অভিযান চলিছে। মণিপুৰৰ চুৰাচান্দপুৰ জিলাত মঙলবাৰে সেনাই বিদ্ৰোহ দমনৰ বাবে এক বিশেষ অভিযান চলায়। সেই অভিযানত নিষিদ্ধ কুকি উগ্ৰপন্থী সংগঠন ‘ইউনাইটেড কুকি নেশ্যনেল আৰ্মি’ৰ চাৰিজন সদস্য নিহত হয়।
সেনাৰ সূত্ৰৰ পৰা পোৱা তথ্য অনুসৰি চুৰাচান্দপুৰ চহৰৰ পৰা প্ৰায় ৮০ কিলোমিটাৰ দূৰত্বত অৱস্থিত খাঁপি গাঁৱত এই সেনা-উগ্ৰপন্থীৰ সংঘৰ্ষ সংঘটিত হয়। এই অভিযানক আনুষ্ঠানিক নাম দিয়া হৈছে ‘অপাৰেচন খানপি’।
অভিযানৰ সময়ত কুকি উগ্ৰপন্থীসকলে সেনাৰ পৰা পলায়ন কৰিবলৈ অৰণ্যত আশ্ৰয় লৈছিল। হাবিৰ মাজত আত্মগোপন কৰি তেওঁলোকে সেনাবাহিনীৰ ওপৰত গুলীচালনা কৰে। ভাৰতীয় সেনাইও প্ৰত্যুত্তৰ দিয়ে। সেই গুলীয়াগুলিচ চাৰিজন উগ্ৰপন্থী নিহত হয়।
একে সময়তে সেনাই জনাইছে যে উগ্ৰপন্থীৰ পৰা বৃহৎ পৰিমাণৰ অস্ত্ৰ-শস্ত্ৰ আৰু বিস্ফোৰক উদ্ধাৰ কৰা হৈছে। অশান্তি আৰু উত্তেজনা দমনৰ বাবে অঞ্চলটোত অধিক সৈন্য মোতায়েন কৰা হৈছে। কুকি উগ্ৰপন্থী সংগঠনৰ আন সদস্যক বিচাৰি উলিয়াবলৈ অভিযান অব্যাহত আছে। অৱশ্যে নিহত উগ্ৰপন্থীৰ পৰিচয় এতিয়াও সেনাই প্ৰকাশ কৰা নাই।
শেহতীয়াকৈ সেনা-আৰক্ষীয়ে অঞ্চলটোৰ পৰা বৃহৎ পৰিমাণৰ অস্ত্ৰ-শস্ত্ৰ জব্দ কৰিছে। যোৱা কেইমাহমানৰ পৰা ইউ কে এন এ উগ্ৰপন্থী এই অঞ্চলত অতি সক্ৰিয় হৈ পৰিছে। এজন গাঁওবুঢ়াক হত্যা, স্থানীয় ৰাইজক ভয় খুৱাই অঞ্চলটোৰ শান্তি বিঘ্নিত কৰিবলৈ চেষ্টা কৰাৰ অভিযোগ উঠিছে।
চোৰাংচোৱা তথ্যৰ ভিত্তিত মঙলবাৰে চুৰাচান্দপুৰ অঞ্চলত এই অভিযান চলোৱা হয়। দক্ষিণ মণিপুৰৰ পাহাৰীয়া অঞ্চলত অশান্তি দমন কৰি শান্তি ঘূৰাই অনাৰ বাবেই ভাৰতীয় সেনাৰ এই পদক্ষেপ।
