অসম সীমান্তৰ গাতে লাগি থকা নাগালেণ্ডৰ ওৱাখা জিলাৰ মেনকিৰঙৰ অঞ্চলৰ পৰা নিৰাপত্তা বাহিনীয়ে চাৰিজন এনএছচিএন-আইএমৰ সদস্যক গ্ৰেপ্তাৰ কৰিছে।
ৰাজ্যখনৰ আৰক্ষী আৰু নিৰাপত্তা বাহিনীৰ এক যৌথ অভিযানত এনএছচিএন-আইএমৰ সদস্য চাৰিজনক গ্ৰেপ্তাৰ কৰা হয়।
বাতৰি অনুসৰি, এনএছচিএন-আইএমৰ সদস্যৰ উপস্থিতিৰ বিষয়ে চোৰাংচোৱা সূত্ৰৰ পৰা লাভ কৰা তথ্যৰ ভিত্তিত আছাম ৰাইফলছৰ সেনাই অঞ্চলটোৰ জংঘলত পুৱতি নিশা এক অভিযান চলাইছিল।
‘’এক বিশেষ তথ্যৰ ভিত্তিত নিৰাপত্তা বাহিনীয়ে ৰাজ্যৰ আৰক্ষীৰ সৈতে নাগালেণ্ডৰ ওৱাখা জিলাৰ মেনকিৰঙৰ অঞ্চলত অভিযান চলাই এটা অবৈধ শিৱিৰ ধ্বংস কৰে আৰু এনএছচিএন-আইএমৰ চাৰিজন সদস্যক আটক কৰাৰ লগতে চাৰিটা এ কে ৰাইফলছ, এটা এম-১৬ ৰাইফল, তিনি জাই গুলীৰে সৈতে এটা ৯এমএম পিষ্টল, ৭.৬২ এমএমৰ ৪৪৬জাই সজীৱ গুলী ছয় যোৰ সেনাৰ পোছাক উদ্ধাৰ কৰে,’’-এক বিবৃতিত কোৱা হৈছে।
আনহাতে, গ্ৰেপ্তাৰ কৰা এনএছচিএন-আইএমৰ সদস্যকেইজনক উদ্ধাৰ হোৱা সামগ্ৰীখিনিৰ সৈতে পৰৱৰ্তী অনুসন্ধানৰ বাবে ওৱাখা জিলাৰ ভাণ্ডাৰী আৰক্ষী থানাক চমজাই দিয়া হয়।
