এক মৰ্মান্তিক দুৰ্ঘটনা। ৰে’লপথ চাফা কৰি থাকোঁতে হঠাতে চলন্ত ৰে’লৰ খুন্দা। এই ভয়ংকৰ দুৰ্ঘটনাত একেলগে প্ৰাণ হেৰুৱালে ৰে’লৱেৰ চাৰিজন চাফাই কৰ্মীয়ে। আৰক্ষীয়ে মৃতকসকলৰ তিনিজনৰ মৃতদেহ উদ্ধাৰ কৰিবলৈ সক্ষম হৈছে।
সৰ্বভাৰতীয় সংবাদ মাধ্যমৰ সূত্ৰ অনুসৰি শনিবাৰে বিয়লি কেৰালাৰ পলাক্কাড জিলাত সংঘটিত হয় এই দুৰ্ঘটনা। শোৰানুৰ ষ্টেচনৰ সমীপত চলন্ত ৰে’লে খুন্দা মাৰে চাৰিজন চাফাই কৰ্মীক।
বিয়লি প্ৰায় ৩ বজাত শোৰানুৰ ৰে’ল দলঙৰ সমীপত ৰে’ল লাইনৰ পৰা জাবৰ নিষ্কাশন কৰি আছিল ৰে’ল চাফাই কৰ্মীকেইজনে। ঠিক তেনেতে পিছফালৰ পৰা তীব্ৰ বেগেৰে আহিল তিৰুৱানন্তপুৰম অভিমুখী কেৰালা এক্সপ্ৰেছ। ৰে’লৰ খুন্দাত চাৰিওজনে ৰে’লপথত ছিটিকি পৰে। থিতাতে মৃত্যু হয় আটাইকেইজনৰে।
লগতে পঢ়কঃ ISL 2024-25: ঘৰুৱা খেলপথাৰত আজি ওড়িশাৰ বিৰুদ্ধে কঠিন যুঁজত অৱতীৰ্ণ হ’ব নৰ্থইষ্ট ইউনাইটেড এফচি
দুৰ্ঘটনাৰ খবৰ পাই ততাতৈয়াকৈ সেই স্থানত উপস্থিত হয় আৰক্ষী আৰু ৰে’লৱেৰ বিষয়া। আৰক্ষীয়ে জনোৱা মতে, নিহতসকলৰ ভিতৰত দুগৰাকী মহিলা আৰু দুজন পুৰুষ আছে। ঘটনাস্থলীৰ পৰা উদ্ধাৰ হৈছে তিনিটা মৃতদেহ। আন এজন ব্যক্তিৰ সন্ধানত অভিযান অব্যাহত আছে।
ৰে’ল দলঙৰ পৰা তলৰ ভৰতপুৰা নদীত আন এটা মৃতদেহ পৰিব পাৰে বুলি আৰক্ষীয়ে সন্দেহ প্ৰকাশ কৰিছে। ডুবাৰুক নদীত নমাই অনুসন্ধান চলোৱা হ’ব। চাফাই চলি থকাৰ মাজতে হয়তো এক্সপ্ৰেছ ট্ৰেইনৰ শব্দ শুনা নাছিল। ৰে’লখন ওচৰ চাপি অহাৰ লগে লগে পলাব নোৱাৰি তেওঁলোক দুৰ্ঘটনাৰ সন্মুখীন হ’বলগীয়া হয়। ঘটনাৰ তদন্ত অব্যাহত আছে।
