আজি ঘোষিত হাইস্কুল শিক্ষান্ত পৰীক্ষাৰ ফলাফলত বৰপেটা জিলাৰ চাৰিগৰাকীকৈ শিক্ষাৰ্থীয়ে প্ৰথম দহটা স্থানৰ ভিতৰত স্থান দখল কৰি সমগ্ৰ বৰপেটা জিলালৈ গৌৰৱ কঢ়িয়াই আনিবলৈ সক্ষম হৈছে।
জিলাখনৰ বৰপেটা চৰকাৰী উচ্চতৰ মাধ্যমিক বিদ্যালয়ৰ পৰা দুগৰাকীকৈ ছাত্ৰীয়ে স্থান দখল কৰিছে। ষষ্ঠ স্থান দখল কৰা ছাত্ৰী দুগৰাকী হ’ল ৰাজশ্ৰী পাঠক আৰু অভিপ্সা দাস। ছাত্ৰী দুগৰাকীয়ে সৰ্বমুঠ ৫৮৮ নম্বৰ লাভ কৰি ষষ্ঠ স্থান দখল কৰে।
আনহাতে জিলাখনৰে অন্যতম পাঠশালা নগৰৰ পাঠশালা শিক্ষাপীঠ আদৰ্শ হাইস্কুলৰ পৰা নৱম স্থান দখল কৰি গৌৰৱ কঢ়িয়াই আনিছে হিৰকজ্যোতি চৌধুৰীয়ে। হিৰকজ্যোতিয়ে সৰ্বমুঠ ৫৮৫ নম্বৰ লাভ কৰিছে।
ইয়াৰ উপৰি উত্তৰ বজালী হাইস্কুলৰ পৰা এজন ছাত্ৰই শীৰ্ষ দহটা স্থানৰ ভিতৰত স্থান দখল কৰিবলৈ সক্ষম হৈছে। বিদ্যালয়খনৰ ছাত্ৰ উদ্দীপ্ত কলিতাই মুঠ ৫৮৩ নম্বৰেৰে দশম স্থান দখল কৰে।
উল্লেখ্য যে শীৰ্ষস্থান দখল কৰাৰ ক্ষেত্ৰত জিলা হিচাপত বৰপেটাই গুৱাহাটী মহানগৰ জিলাৰ সৈতে যুটীয়াভাৱে তৃতীয় স্থানত থাকে।
