কাজিৰঙা ৰাষ্ট্ৰীয় উদ্যানত ঢেকীয়াপতীয়া বাঘৰ চতুৰ্থ পৰ্যায়ৰ বিভাগীয় সমীক্ষাৰ শুভাৰম্ভ

কাজিৰঙা ৰাষ্ট্ৰীয় উদ্যানত বুধবাৰৰ পৰা আৰম্ভ হৈছে ঢেকীয়াপতীয়া বাঘৰ চতুৰ্থ সমীক্ষাৰ কাম৷

বুধবাৰৰ দিনা ৰাষ্ট্ৰীয় উদ্যানৰ অগৰাতলী বনাঞ্চলত উদ্যান সঞ্চালক পি শিৱকুমাৰে আনুষ্ঠানিকভাৱে এই সমীক্ষাৰ কামৰ শুভাৰম্ভ কৰে৷

কেন্দ্ৰীয় ব্যাঘ্ৰ সংৰক্ষণ প্ৰাধিকৰণৰ নীতি নিৰ্দেশনাৰে আৰম্ভ হোৱা এই সমীক্ষাত কাজিৰঙাৰ বিভিন্ন প্ৰান্তৰত প্ৰতি দুই বৰ্গ কিলোমিটাৰত স্বয়ংচালিত কেমেৰা স্থাপন কৰি ঢেকীয়াপতীয়া বাঘৰ ফটো সংগ্ৰহৰ চেষ্টা কৰা হ’ব৷

উল্লেখ্য যে কেন্দ্ৰীয় ব্যাঘ্ৰ সংৰক্ষণ প্ৰাধিকৰণৰ নিৰ্দেশ মতে ৰাষ্ট্ৰীয় উদ্যানখনৰ বাঘৰ পৰিসংখ্যাৰ লগতে প্ৰতিটো বাঘৰ আলোক চিত্ৰ থকাটো অতি গুৰুত্বপুৰ্ণ৷

বাঘ সমীক্ষাৰ প্ৰথম দ্বিতীয় আৰু তৃতীয় পৰ্যায়ত ঢেকীয়াপতীয়া বাঘৰ আৱাস, উপস্থিতি, খাদ্য আৰু আচৰণৰ বিভিন্ন ক্ষেত্ৰ ভিত্তিক তথ্য সংগ্ৰহৰ পিচত চতুৰ্থ পৰ্যায়ত কেমেৰাৰে বাঘৰ আলোকচিত্ৰ সংগ্ৰহৰ কাম কৰা হয়৷

বুধবাৰে আনুষ্ঠানিকভাৱে এই কাৰ্যৰ শুভাৰম্ভ কৰা হয়৷ এই উপলক্ষে অগৰাতলি বনাঞ্চলত কেমেৰা স্থাপন কৰি সঞ্চালক পি শিৱকুমাৰে এই কাৰ্য আৰম্ভ কৰে৷

অনুষ্ঠানত কাজিৰঙাৰ ডি এফ অ’  ৰমেশ গগৈ, গৱেষণা বিষয়া ৰবীন্দ্ৰ শৰ্মা, সহকাৰী বন সংৰক্ষক ঋতু পৱণ বৰা, বনাঞ্চলিক বিষয়া বিদ্যুৎ বিকাশ বৰাৰ লগতে কেমেৰা ট্ৰেপৰ কাৰ্যৰ সৈতে জড়িত সকলো বনকৰ্মী উপস্থিত থাকে৷

উল্লেখ্য যে কাজিৰঙা ৰাষ্ট্ৰীয় উদ্যানত বিভাগীয় তথ্য মতে সম্প্ৰতি ২২১ টা ঢেকীয়াপতীয়া বাঘ আছে আৰু এই বাঘ বোৰৰ প্ৰতিটোৰে আলোক চিত্ৰ সংগ্ৰহ কৰি নামকৰণো কৰিছে উদ্যান কৰ্তৃপক্ষই৷

বাৰিষাৰ আগে আগে চতুৰ্থ বাঘ সমীক্ষাৰ কাম ৰাষ্ট্ৰীয় উদ্যানৰ সকলো বনাঞ্চলৰ লগতে ব্ৰহ্মপুত্ৰ নদীৰ ষষ্ঠ সংযোজনতো সম্পন্ন কৰিব বুলি বিভাগীয় সুত্ৰত প্ৰকাশ।