বিশ্বত ক’ৰ’না ভাইৰাছৰ সংহাৰে জীৱনশৈলী যথেষ্ট পৰিমানে সলনি কৰি দিছে। সুৰক্ষিত থকাৰ স্বাৰ্থত বহুতো ডাঙৰ ডাঙৰ কাৰ্য্যসূচী বাতিল কৰা হৈছে।
ভাইৰাছ প্ৰতিৰোধৰ বাবে সামাজিক দূৰত্ব অতি গুৰুত্বপূৰ্ণ। সেয়ে এইবাৰ ভাৰতৰ গণৰাজ্য দিৱসৰ কাৰ্যসূচীও অইন বছৰ সমূহৰ তুলনাত যথেষ্ট সাল সলনি ঘটোৱা হৈছে।
ভাৰতত যোৱা ৫৫ বছৰৰ ইতিহাসত প্ৰথমবাৰৰ বাবে গণৰাজ্য দিৱসৰ পেৰেড অনুষ্ঠানত মুখ্য অতিথিৰূপে কোনো লোক উপস্থিত নাথাকে।
দৰাচলতে, এইবাৰ বৃটিছ প্ৰধান মন্ত্ৰী বৰিছ জনছনক গণৰাজ্য দিৱসৰ অনুষ্ঠানত মুখ্য অতিথি হিচাপে আমন্ত্ৰণ জনোৱা হৈছিল।
কিন্তু মঙলবাৰে বৰিছ জনছনে ভাৰতৰ প্ৰধান মন্ত্ৰী নৰেন্দ্ৰ মোদীক ফোন কৰি গণৰাজ্য দিৱস উদযাপনৰ অনুষ্ঠানত মুখ্য অতিথিৰূপে উপস্থিত থাকিব নোৱাৰিব বুলি জনায়।
বৃটেইনত দেখা দিয়া ক’ৰ’না ভাইৰাছৰ নতুন সংক্ৰমণৰ বাবে দেশজুৰি পুনৰ এবাৰ লকডাউন ঘোষণা কৰিছে আৰু সেয়ে তেওঁ ভাৰতলৈ নহাৰ সিদ্ধান্ত গ্ৰহণ কৰিছে।
বৰিছ জনছনৰ ভাৰত ভ্ৰমণ বাতিল হোৱাৰ পিছত এতিয়া আৰু ভাৰতে কোনো লোককে মুখ্য অতিথিৰূপে আমন্ত্ৰণ জনোৱা নাই।
উল্লেখ্য যে ইয়াৰ পূৰ্বে, ১৯৬৬ চনৰ ১১ জানুৱাৰিত প্ৰধান মন্ত্ৰী লাল বাহাদুৰ শাস্ত্ৰীৰ মৃত্যুৰ বাবে কোনো লোকক আমন্ত্ৰণ জনোৱা হোৱা নাছিল।
শাস্ত্ৰীৰ মৃত্যুৰ পিছত ইণ্ডিৰা গান্ধীৰ নেতৃত্বত নতুন চৰকাৰে ১৯৬৬ চনৰ ২৪ জানুৱাৰিত অৰ্থাৎ গণৰাজ্য দিৱসৰ পেৰেডৰ মাত্ৰ দুদিন পূৰ্বে শপত লৈছিল। সেয়ে উক্ত বছৰত কোনো লোক গণৰাজ্য দিৱসত উপস্থিত নাছিল।
আৰু এইবছৰ মহামাৰী ক’ৰ’নাৰ বাবে গণৰাজ্য দিৱস সমাৰোহত কোনো লোক উপস্থিত নথকাটো প্ৰায় খাটাং হৈ পৰিছে।
দৰাচলতে, গণৰাজ্য দিৱসত মুখ্য অতিথি হিচাপে ভাৰত ভ্ৰমণৰ আমন্ত্ৰণ বিদেশী গণ্য-মান্যৰ বাবে এক বিশেষ সন্মান।
উল্লেখ্য যে ইয়াৰ পূৰ্বে ২০১৩ চনত ওমান চুলতান কবুছ বিন চৈইদে বিশেষ কাৰণৰ বাবে গণৰাজ্য দিৱসত উপস্থিত থাকিব নোৱাৰাত তেওঁৰ স্থানত ভুটানৰ ৰজা জিগ্মে খেচৰক আমন্ত্ৰণ জনোৱা হৈছিল।
আনহাতে ২০১৯ত আমেৰিকাৰ ৰাষ্ট্ৰপতি ড’নাল্ড ট্ৰাম্প উপস্থিত থাকিব নোৱাৰাত দক্ষিণ আপ্ৰিকাৰ ৰাষ্ট্ৰপতি চিৰিল ৰামফোচা উপস্থিত আছিল।
কিন্তু এইবাৰ ক’ভিড-১৯ৰ বাবে গণৰাজ্য দিৱসত বিকল্প নেতাৰ উপস্থিতিৰ সম্ভাৱনা প্ৰায় নাই বুলিয়েই ক’ব পাৰি।