তিনিচুকীয়া জিলাৰ মাৰ্ঘেৰিটাৰ লিডুত পূজা আয়োজনৰ নামত শতাধিক পৰিয়ালৰ পৰা ধন সংগ্ৰহ কৰি এগৰাকী প্ৰবঞ্চক অন্তৰ্ধান হোৱাৰ বাতৰিয়ে অঞ্চলটোত চাঞ্চল্যৰ সৃষ্টি কৰিছে।
উল্লেখযোগ্য যে গাঁৱৰ ৰাইজৰ মাজত থকা অত্যাধিক অন্ধবিশ্বাসৰ সুযোগ লৈ কয়লানগৰী খ্যাত লিডুৰ শতাধিক পৰিয়ালক সমীৰ দত্ত নামৰ এগৰাকী ব্যক্তিয়ে এই কাণ্ড সংঘটিত কৰে।
স্থানীয় ৰাইজে জনোৱা অনুসৰি প্ৰায় এসপ্তাহৰ আগত নিজকে সমীৰ দত্ত বুলি পৰিচয় দিয়া এজন লোকে আহি গাঁওবাসীক সপোনত মা শীতলা দেখা পোৱা বুলি কৈছিল। সপোনত মা শীতলাই গাঁওখনত পূজা আয়োজনৰ নিৰ্দেশ দিয়া বুলি কৈ তেওঁ পূজা আয়োজনৰ নামত ১০৮ টা পৰিয়ালৰ পৰা ১০ হাজাৰতকৈ অধিক টকা সংগ্ৰহ কৰে।
নিৰ্ধাৰিত দিন অনুযায়ী আজি মা শীতলা পূজা আয়োজনৰ কথা, আনকি পূজাৰ ভোগো প্ৰস্তত হ’ল। কিন্তু পূজাৰ আগদিনাৰ পৰা ৰাইজৰ বৰঙণি নিজৰ হাতত মজুত ৰখা সমীৰ দত্তৰ কোনো খবৰ নাই। আনকি তেওঁৰ মোবাইলত ফোন কৰিলেও চুইচ অফ দেখায়।
আনহাতে নিজকে জাগুনৰ বুলি পৰিচয় দিয়া ব্যক্তিজনৰ ঠিকনা অনুযায়ী খা-খবৰ কৰিবলৈ গৈ ভুক্তভোগী ৰাইজে গম পালে, ‘তেনে নামৰ কোনো ব্যক্তি জাগুনৰ মিৰি গাৱঁত নাই’।
অৱশ্যে মা শীতলাক সপোনত দেখা প্ৰবঞ্চক সমীৰ দত্তক বিচাৰি নাপালে যদিও গাঁৱৰ ৰাইজে মিলি পূজাখন সম্পুৰ্ণ কৰে।