ৰাজ্যখনৰ শৈক্ষিক ক্ষেত্ৰৰ উন্নয়নত অধিক গুৰুত্ব আৰোপ কৰি অসম চৰকাৰে দ্বাদশ শ্ৰেণীৰ শিক্ষাৰ্থীসকলক বিনামূলীয়াকৈ পাঠ্যপুথি যোগানৰ বাবে লোৱা আঁচনি অনুসৰি আজি চিৰাং জিলাতো বিনামূলীয়াকৈ দ্বাদশ শ্ৰেণীৰ পাঠ্যপুথি বিতৰণ কাৰ্যসূচীৰ শুভাৰম্ভ কৰা হয়।
এই উপলক্ষে জিলাখনৰ ঢালিগাঁও হাইস্কুলৰ সভাকক্ষত সম্পূৰ্ণ ক’ভিড বিধি মানি এক অনুষ্ঠানৰ আয়োজন কৰা হয়।
চিৰাং জিলা বিদ্যালয়সমূহৰ পৰিদৰ্শক বিজয় বৈষ্ণৱৰ সঞ্চালনত অনুষ্ঠিত অনুষ্ঠানত মুখ্য অতিথি হিচাপে উপস্থিত থাকি জিলা উপায়ুক্ত নৰেন্দ্ৰ কুমাৰ শ্বাহে বিনামূলীয়া পাঠ্যপুথি বিতৰণ কাৰ্যসূচীৰ শুভাৰম্ভ কৰে।
উল্লেখ্য যে আজি জিলাখনৰ ৯ খন উচ্চতৰ মাধ্যমিক বিদ্যালয়ৰ মাজত দ্বাদশ শ্ৰেণীৰ পাঠ্যপুথি সমূহ আনুষ্ঠানিক ভাৱে বিতৰণ কৰা হয়।
অনুষ্ঠানত বিজনী বিদ্যাপীঠ উচ্চতৰ মাধ্যমিক বিদ্যালয়, বিজনী বান্ধৱ উচ্চতৰ মাধ্যমিক বিদ্যালয়, আমগুৰি উচ্চতৰ মাধ্যমিক বিদ্যালয়, বড়ো বজাৰ উচ্চতৰ মাধ্যমিক বিদ্যালয়, টুক্ৰাঝাৰ উচ্চতৰ মাধ্যমিক বিদ্যালয়, বেংতল উচ্চতৰ মাধ্যমিক বিদ্যালয়, নেতাজী সুভাষ বিদ্যা নিকেতন উচ্চতৰ মাধ্যমিক বিদ্যালয়,বাসুগাঁও উচ্চতৰ মাধ্যমিক বিদ্যালয় আৰু চিদলী-কাশীকোত্ৰা উচ্চতৰ মাধ্যমিক বিদ্যালয়ৰ শিক্ষাৰ্থীসকলৰ বাবে বিনামূলীয়া পাঠ্যপুথিসমূহ আনুষ্ঠানিক ভাবে বিতৰণ কৰা হয়।
অনুষ্ঠানৰ শেষত শলাগৰ শৰাই আগবঢ়ায় চিৰাং জিলাৰ একাডেমীক কাউন্সিলৰ সচিব নীলকমল বসুমতাৰীয়ে।