এতিয়াৰে পৰা অধিক সংখ্যক কৰ্মচাৰী ভৱিষ্যৎ সঞ্চয় আৰু সামাজিক সুৰক্ষাৰ আওতালৈ অহাৰ পথ মুকলি হ’ল। কেন্দ্ৰীয় চৰকাৰে এপিএফঅ’ অৰ্থাৎ এমপ্লয়িজ প্ৰভিডেণ্ট ফাণ্ড অৰ্গেনাইজেশ্যনৰ বাধ্যতামূলক অন্তৰ্ভুক্তিৰ বাবে থকা দৰমহাৰ সীমা ১৫ হাজাৰৰ পৰা ২৫ হাজাৰ টকালৈ বৃদ্ধি কৰাৰ প্ৰস্তাৱত অনুমোদন জনাইছে। বুধবাৰে কেন্দ্ৰীয় মন্ত্ৰীসভাই শ্ৰম আৰু নিয়োগ মন্ত্ৰালয়ৰ এই প্ৰস্তাৱত সন্মতি দিয়ে।
নতুন নিয়ম কাৰ্যকৰী হ’লে মাহে ১৫ হাজাৰৰ পৰা ২৫ হাজাৰ টকালৈ দৰমহা লাভ কৰা বহু কৰ্মচাৰী বাধ্যতামূলকভাৱে এপিএফঅ’ৰ আওতালৈ আহিব। চৰকাৰৰ হিচাপ অনুসৰি, ইয়াৰ ফলত ৫১ লাখতকৈ অধিক নতুন কৰ্মচাৰী এই সামাজিক সুৰক্ষা ব্যৱস্থাৰ অন্তৰ্ভুক্ত হ’ব পাৰে।
বৰ্তমান কোনো কৰ্মচাৰীয়ে চাকৰিত যোগদান কৰাৰ সময়ত মাহে ১৫ হাজাৰতকৈ অধিক দৰমহা লাভ কৰিলে তেওঁক স্বয়ংক্ৰিয়ভাৱে এপিএফঅ’ৰ আওতাত অন্তৰ্ভুক্ত কৰা নহয়। কিন্তু নতুন সীমা কাৰ্যকৰী হ’লে এই বাধ্যতামূলক অন্তৰ্ভুক্তিৰ সীমা ২৫ হাজাৰ টকালৈ বৃদ্ধি পাব। ফলত অধিক সংখ্যক কৰ্মচাৰীৰ ভৱিষ্যৎ সঞ্চয় গঢ়ি উঠাৰ লগতে নিয়ম অনুসৰি পেঞ্চন আৰু জীৱন বীমাৰ সুবিধাও লাভ কৰাৰ সুযোগ সৃষ্টি হ’ব।
দীৰ্ঘদিন ধৰি এপিএফঅ’ৰ দৰমহাৰ সীমাত কোনো পৰিৱৰ্তন হোৱা নাছিল। ২০০৪ চনৰ পৰা ২০১৪ চনলৈ এই সীমা একেই আছিল। ২০১৪ চনৰ ছেপ্টেম্বৰ মাহত শেষবাৰৰ বাবে এই সীমা বৃদ্ধি কৰি ১৫ হাজাৰ টকা কৰা হৈছিল। ইয়াৰ পাছত যোৱা ১২ বছৰত দেশত দৰমহা আৰু আয়ৰ পৰিমাণ বৃদ্ধি পোৱাৰ লগতে আনুষ্ঠানিক চাকৰিৰ পৰিসৰো বিস্তৃত হৈছে। বহু ৰাজ্য আৰু কৰ্মক্ষেত্ৰত ন্যূনতম মজুৰিও ১৫ হাজাৰ টকাৰ ওচৰ চাপিছে বা তাৰ ওপৰলৈ গৈছে। এই পৰিস্থিতিতে পুৰণি সীমা সলনি কৰাৰ সিদ্ধান্ত লোৱা হৈছে।
কেন্দ্ৰীয় চৰকাৰৰ তথ্য অনুসৰি, এই নতুন ব্যৱস্থা ৰূপায়ণ কৰিবলৈ বছৰি প্ৰায় ১১,৩৩৯ কোটি টকাৰ ব্যয় হ’ব। বৰ্তমান এই ক্ষেত্ৰত বছৰি প্ৰায় ১০,২৫০ কোটি টকাৰ বাজেট সহায় আগবঢ়োৱা হয়। পাঁচ বছৰত এই নতুন ব্যৱস্থাৰ মুঠ আনুমানিক ব্যয় প্ৰায় ৫৬,৬৯৬ কোটি টকা হ’ব বুলি ধাৰণা কৰা হৈছে।
এই প্ৰস্তাৱক লৈ বিভিন্ন মন্ত্ৰালয়ৰ মাজত দীঘলীয়া আলোচনা চলিছিল। ২০২৬ চনৰ ১৬ জুনত অনুষ্ঠিত এক্সপেনডিচাৰ ফাইনেন্স কমিটীৰ বৈঠকতো এই প্ৰস্তাৱ অনুমোদনৰ বাবে আগবঢ়োৱাৰ পৰামৰ্শ দিয়া হৈছিল।
শেহতীয়া এপিএফঅ’ৰ তথ্য অনুসৰি, সংস্থাটোত প্ৰায় ৭.৯৮ কোটি সদস্য আৰু প্ৰায় ৭.৬৮ লাখ প্ৰতিষ্ঠান নিয়মিতভাৱে জড়িত হৈ আছে। একে সময়তে এমপ্লয়িজ পেঞ্চন স্কিমৰ অধীনত প্ৰায় ৮২ লাখ পেঞ্চনভোগী আছে। নতুন দৰমহাৰ সীমা কাৰ্যকৰী হ’লে এপিএফঅ’ৰ সদস্য সংখ্যা আৰু অধিক বৃদ্ধি পোৱাৰ সম্ভাৱনা আছে।
কেন্দ্ৰীয় চৰকাৰৰ মতে, এই সিদ্ধান্তই কৰ্মচাৰীৰ অৱসৰকালীন আৰ্থিক সুৰক্ষা অধিক শক্তিশালী কৰাৰ লগতে আনুষ্ঠানিক চাকৰিৰ পৰিসৰ বৃদ্ধিতো সহায় কৰিব পাৰে। নিয়োগকৰ্তাৰ ক্ষেত্ৰতো কৰ্মচাৰী ধৰি ৰখা আৰু চাকৰিৰ স্থিৰতা বজাই ৰখাত ইয়াৰ প্ৰভাৱ পৰিব বুলি আশা কৰা হৈছে।
