গুৱাহাটী মহানগৰীৰ হোটেল ৰেডিশ্যন ব্লুত অনুষ্ঠিত হোৱা উত্তৰ-পূব বৈদ্যুতিক মোবিলিটি সমাৰোহত অংশগ্ৰহণ কৰি অসম ৰাজ্যিক পৰিবহণ নিগমৰ অধ্যক্ষ অশোক কুমাৰ ভট্টৰায়ে ৪ নবেম্বৰৰ পৰা গুৱাহাটী মহানগৰীৰ ৰাজপথত বৈদ্যুতিক বাছৰ চলাচল আৰম্ভ হ’ব বুলি মন্তব্য কৰে।
পৰিবহণ নিগমৰ অধ্যক্ষ গৰাকীয়ে প্ৰথমতে পৰীক্ষামূলকভাৱে ১৫ খন বাছ চলোৱা হ’ব বুলিও সমাৰোহত উল্লেখ কৰে।
অনুষ্ঠানত অশোক কুমাৰ ভট্টৰায়ৰ উপৰিও নীতি আয়োগৰ মিছন সঞ্চালক অনিল শ্ৰীবাস্তৱ, অসম ৰাজ্যিক পৰিবহণ নিগমৰ উপাধ্যক্ষ হৰিচৰণ বড়ো, পৰিচালন সঞ্চালক আনন্দ প্ৰকাশ টিৱাৰীকে ধৰি ভালেসংখ্যক সমল ব্যক্তি উপস্থিত থাকে।
উল্লেখযোগ্য যে, অসম ৰাজ্যিক পৰিবহণ নিগমে অনুষ্ঠিত কৰা সমাৰোহখনিত উত্তৰ-পূবৰ বিভিন্ন প্ৰান্তৰ পৰা অহা প্ৰতিনিধিয়ে অংশগ্ৰহণ কৰে।
মূলত প্ৰদূষণ মুক্ত অসম গঢ়াৰ ক্ষেত্ৰত অসম ৰাজ্যিক পৰিবহণ নিগমৰ ভূমিকা সম্পৰ্কত পৰ্যালোচনাৰে সমাৰোহখনি অনুষ্ঠিত হয়।
সমাৰোহত যান-বাহন আইন, প্ৰদূষণ ৰোধৰ ক্ষেত্ৰত বৈদ্যুতিক বাহন আদিৰ প্ৰসংগত বিস্তৃতভাৱে আলোচনা কৰা হয়।