গোলাঘাট জিলাৰ মেৰাপানীৰ এজন সাহসী যুৱক ৰূপম গগৈয়ে এক বিশেষ লক্ষ্য বুকুত বান্ধি শ্ৰীলংকাৰ কলম্বো অভিমুখে ৭০০০ কিলোমিটাৰৰ এক দীঘলীয়া চাইকেল যাত্ৰা আৰম্ভ কৰিছে। বুধবাৰে অসম নগালেণ্ড সীমান্তৰ ঐতিহাসিক গুৰুত্ব থকা মেৰাপানীৰ গোমৰিগৰিৰ পৰা তেওঁ এই অভিযানৰ যাত্ৰা আৰম্ভ কৰে। হাতত ভাৰতীয় ত্ৰিৰংগা লৈ পৰিৱেশ সংৰক্ষণ আৰু এক প্ৰদূষণমুক্ত পৃথিৱী গঢ়াৰ আহ্বান জনাই তেওঁ এই সাহসী পদক্ষেপ হাতত লৈছে।
এই যাত্ৰাৰ জৰিয়তে ৰূপম গগৈয়ে মানুহৰ মাজত পৰিৱেশৰ প্ৰতি সজাগতা সৃষ্টি কৰিব বিচাৰিছে। তেওঁৰ মূল লক্ষ্য হৈছে মানুহক প্ৰকৃতি সুৰক্ষিত কৰিবলৈ আৰু পৰিৱেশ অনুকূল অভ্যাস গঢ়ি তুলিবলৈ অনুপ্ৰাণিত কৰা। যাত্ৰা আৰম্ভ কৰাৰ পূৰ্বে তেওঁ সকলোকে অতি কমেও এটাকৈ গছপুলি ৰোপণ কৰিবলৈ আহ্বান জনায়। তেওঁ বিশ্বাস কৰে যে যদি প্ৰতিজন ব্যক্তিয়ে একোটাকৈ পুলি ৰোপণ কৰে তেন্তে আমি সকলোৱে মিলি এক সেউজীয়া আৰু স্বাস্থ্যকৰ পৃথিৱী গঢ়িব পাৰিম।
মেৰাপানীৰ পৰা কলম্বো লৈ এই যাত্ৰা সম্পূৰ্ণ কৰিবলৈ ৰূপমক প্ৰায় চাৰি মাহ সময়ৰ প্ৰয়োজন হ’ব। তেওঁ প্ৰতিদিনে গড়ে ৮০ ৰ পৰা ১০০ কিলোমিটাৰ চাইকেল চলোৱাৰ পৰিকল্পনা কৰিছে। শ্ৰীলংকাত উপস্থিত হোৱাৰ পূৰ্বে তেওঁ ভাৰতৰ বিভিন্ন ৰাজ্যৰ মাজেৰে পাৰ হৈ যাব লাগিব। এই যাত্ৰাৰ সময়ছোৱাত তেওঁ বিভিন্ন ধৰণৰ বতৰ আৰু কঠিন পথৰ প্ৰত্যাহ্বানৰ মুখামুখি হ’ব যদিও নিজৰ লক্ষ্যত উপনীত হ’বলৈ তেওঁ সম্পূৰ্ণৰূপে দৃঢ়প্ৰতিজ্ঞ।
উল্লেখনীয় যে ৰূপম গগৈৰ বাবে এয়া প্ৰথম দীঘলীয়া চাইকেল যাত্ৰা নহয়। ইয়াৰ পূৰ্বে তেওঁ চাইকেলেৰে নেপালৰ কাঠমাণ্ডু আৰু জম্মু-কাশ্মীৰৰ লাডাখ ভ্ৰমণ কৰিছে। পূৰ্বৰ এই সফল যাত্ৰা সমূহে তেওঁৰ মনোবল বৃদ্ধি কৰিছে আৰু সেই অভিজ্ঞতাৰ সহায়তে তেওঁ এইবাৰ এক সমাজ কল্যাণমূলক বাৰ্তা লৈ ইমান বিশাল দূৰত্ব অতিক্ৰম কৰিবলৈ সাজু হৈছে।
