ফুড ছেফটি এণ্ড ষ্টেণ্ডাৰ্ডছ অথৰিটি অফ ইণ্ডিয়াই (FSSAI) গ্ৰহণ কৰিছে এক গুৰুত্বপূৰ্ণ সিদ্ধান্ত। মঙলবাৰে এফ এছ এছ এ আইয়ে এক নিৰ্দেশনা জাৰি কৰে। তেওঁলোকে কয় যে এতিয়াৰ পৰা কোনো নিৰ্মাতা বা ব্ৰেণ্ডে তেওঁলোকৰ সামগ্ৰীত ORS (Oral Rehydration Salts) লেবেল ব্যৱহাৰ কৰিব নোৱাৰিব। যদিহে প্ৰডাক্টটো বিশ্ব স্বাস্থ্য সংস্থাৰ (WHO) অনুমোদিত হয়, তেতিয়াহে ইয়াত ORS ব্যৱহাৰ কৰিব পৰা যাব।
ইউনিচেফ (United Nations Children’s Fund)ৰ তথ্য অনুসৰি নিমখ আৰু চেনিৰ মিশ্ৰণ প্ৰস্তুত কৰি পানীত সেৱন কৰা হয়। সেয়া হ’ল অ’ আৰ এছ। ডায়েৰিয়া, হিট ষ্ট্ৰোক বা অন্যান্য শাৰীৰিক ৰোগৰ বাবে অতিৰিক্ত পানী প্ৰায়ে শৰীৰৰ পৰা ওলাই যায়। সেই সময়ত শৰীৰ ডিহাইড্ৰেশ্যন হৈ পৰে। সেই সময়ত শৰীৰত পানীৰ শুন্যতা পূৰণ কৰিবলৈ ORS সেৱন কৰা হয়।
আমেৰিকাৰ স্বাস্থ্য ৱেবছাইট হেল্থলাইনে সকীয়াই দিছে যে সাধাৰণতে চিকিৎসকৰ পৰামৰ্শ অনুসৰি অ’ আৰ এছ সেৱন কৰিব লাগে। ইয়াৰ ভুল ব্যৱহাৰ বিপদজনক হ’ব পাৰে।
ইয়াৰ পূৰ্বে ২০২২ চনৰ ১৪ জুলাই আৰু ২০২৪ চনৰ ২ ফেব্ৰুৱাৰীৰ কেন্দ্ৰীয় নিৰ্দেশনা অনুসৰি ব্ৰেণ্ড নামৰ আগত বা পিছত অ’ আৰ এছ শব্দটো ব্যৱহাৰ কৰিবলৈ অনুমতি দিয়া হৈছিল। এতিয়ালৈকে বহু ব্ৰেণ্ডে বিভিন্ন ফলৰ ৰসৰ পানীয়, নন-কাৰ্বনেটেড পানীয় আৰু ৰেডি টু ড্ৰিংক পানীয়কে ধৰি বহু সামগ্ৰীত অ’ আৰ এছ শব্দটো ব্যৱহাৰ কৰিছিল। কিন্তু তেওঁলোকে এই শব্দটো ব্যৱহাৰ কৰিব পাৰিছিল যদিহে প্ৰডাক্টটোত লিখা থাকে যে WHOৰ পৰামৰ্শ অনুসৰি প্ৰডাক্টটো ORS ফৰ্মুলাৰ নহয়। কিন্তু এতিয়া এই পুৰণি নিৰ্দেশনাবোৰ বাতিল কৰা হৈছে।
শিশু চিকিৎসক ডাঃ শিৱৰঞ্জনী সন্তোষে কেন্দ্ৰৰ এই পদক্ষেপক প্ৰশংসা কৰি ছ’চিয়েল মিডিয়াত পোষ্ট কৰিছে। তেওঁ লিখিছে, “আজিৰ পৰা WHO অনুমোদিত ফৰ্মুলা নাথাকিলে কোনেও নিজৰ লেবেলত ORS ব্যৱহাৰ কৰিব নোৱাৰিব। কোনোৱে বিক্ৰীও কৰিব নোৱাৰিব।”
