পুনৰ ব্যয়বহুল হৈ পৰিল ইন্ধনৰ দাম। সোমবাৰে প্ৰতি লিটাৰ পেট্ৰ’লৰ মূল্য ২.৬১ টকা আৰু প্ৰতি লিটাৰ ডিজেলৰ মূল্য ২.৭১ টকা বৃদ্ধি পাইছে। আজিৰ পৰা গ্ৰাহকে বৃদ্ধি পোৱা মূল্যত পেট্ৰ’ল-ডিজেল ক্ৰয় কৰিব লাগিব।
পশ্চিম এছিয়াৰ সংঘাতৰ মাজতে দুসপ্তাহত চাৰিবাৰকৈ মূল্যবৃদ্ধিৰ লগে লগে অত্যাৱশ্যকীয় সামগ্ৰীৰ মূল্য বৃদ্ধিৰ আশংকা কৰিছে বহুতে। মধ্যবিত্ত শ্ৰেণীৰ মূৰত মাধমাৰ পৰিল। মন কৰিবলগীয়া যে ইয়াৰ পূৰ্বে শনিবাৰে (২৩ মে’) পেট্ৰ’লৰ মূল্য ৮৭ পইচা আৰু ডিজেলৰ মূল্য ৯৭ পইচা বৃদ্ধি কৰা হৈছিল।
মূল্যবৃদ্ধিৰ বাবে ৰাজধানী দিল্লীত ইন্ধনৰ মূল্য ১০০ৰ সীমা অতিক্ৰম কৰিছে। প্ৰতিলিটাৰ পেট্ৰ’লৰ মূল্য ১০২.১২ টকা। আৰু প্ৰতিলিটাৰ ডিজেলৰ মূল্য ৯৫.২০ টকা বৃদ্ধি পাইছে। চেন্নাইত এক লিটাৰ পেট্ৰ’ল ১০৭.৭৭ টকাত বিক্ৰী হৈছে আৰু ডিজেলৰ মূল্য ৯৫.৫৫।
কলকাতাত এক লিটাৰ পেট্ৰল ১১৩.৫১ টকাত কিনিব লগা হৈছে। আৰু প্ৰতিলিটাৰ ডিজেলৰ নতুন মূল্য ৯৯.৮২ টকালৈ বৃদ্ধি কৰা হৈছে। দেশৰ বাণিজ্যিক ৰাজধানী মুম্বাইতো দেখা গৈছে একেই ছবি। প্ৰতি লিটাৰৰ মূল্য ২.৭২ টকা বৃদ্ধি পাইছে। ফলত পেট্ৰ’লৰ মূল্য ১১১.২১ টকা। আৰু ডিজেল বিক্ৰী হৈছে ৯৭.৮৩ পইচাত।
গুৱাহাটীত এক লিটাৰ পেট্ৰলৰ মূল্য ১০৩.৯৪ টকা হৈছে। ডিজেলৰ মূল্য ৯৪.৫০ টকা হৈছে।
সচেতন মহলৰ এটা অংশই বিশ্বাস কৰে যে মূল্যবৃদ্ধিৰ বাবে মধ্যবিত্ত শ্ৰেণীয়ে আটাইতকৈ বেছি ক্ষতিগ্ৰস্ত হ’বলৈ গৈ আছে। ব্যক্তিগত গাড়ী আৰু বাইকত পেট্ৰ’ল ভৰোৱাৰ বাবে অতিৰিক্ত ধন খৰচ কৰাই নহয়, বাছ আৰু টেক্সিৰ ভাড়া বৃদ্ধিৰ সম্ভাৱনাও আছে। ইয়াতেই শেষ নহয়, বহুতে আশংকা কৰিছে যে পেট্ৰল-ডিজেলৰ দাম বৃদ্ধিয়ে দৈনন্দিন প্ৰয়োজনীয় সামগ্ৰীৰ দামও বৃদ্ধি কৰিব।
পশ্চিম এছিয়াৰ উত্তেজনাৰ মাজতে ইতিমধ্যে প্ৰধানমন্ত্ৰী নৰেন্দ্ৰ মোদীয়ে দেশবাসীক পেট্ৰল-ডিজেলৰ ব্যৱহাৰ হ্ৰাস কৰাৰ বাৰ্তা প্ৰদান কৰিছে। ইয়াৰ ভিতৰত আছে ইন্ধন তেল, ৰন্ধন গেছ, খাব পৰা তেল, সোণ, তাম, ৰাসায়নিক সাৰ। তেতিয়াৰ পৰাই মূল্যবৃদ্ধিৰ বিষয়ে জল্পনা-কল্পনা চলি আহিছে।
সংশ্লিষ্ট সূত্ৰৰ এটা অংশৰ মতে, ভৱিষ্যতে এই মূল্য আৰু বৃদ্ধি পাব পাৰে। মন কৰিবলগীয়া যে পশ্চিম এছিয়াৰ অশান্তিৰ মাজতে বিগত ১১ মাহত পেট্ৰ’ল-ডিজেলৰ মূল্যৰ সামান্য পৰিৱৰ্তন হোৱা দেখা গৈছে। অৱশ্যে যোগানৰ ক্ষেত্ৰত আশংকা সৃষ্টি হৈছিল। তেতিয়াৰ পৰাই চৰকাৰী তেল কোম্পানীসমূহে কেন্দ্ৰীয় চৰকাৰক মূল্য বৃদ্ধিৰ বাবে অনুৰোধ জনাই আহিছে।
ইয়াৰ পিছতে শুকুৰবাৰে (১৫ মে’) পেট্ৰ’ল-ডিজেলৰ মূল্য গড়ে ৩টকা প্ৰতি লিটাৰ আৰু চিএনজিৰ মূল্য ২ টকা বৃদ্ধি পায়।১৯ মে’ত পুনৰ মূল্য বৃদ্ধি হয়। পেট্ৰ’লৰ মূল্য আৰু ৯০ পইচা বৃদ্ধি। ইয়াৰ পিছত শনিবাৰে (২৩ মে’) পেট্ৰ’লৰ মূল্য ৮৭ পইচা আৰু ডিজেলৰ মূল্য ৯১ পইচা বৃদ্ধি কৰা হয়।
