স্বাধীনতাৰ অমৃত মহোৎসৱৰ লগত সংগতি ৰাখি বঙাইগাঁও জিলাত জনস্বাস্থ্য কাৰিকৰী বিভাগৰ অধীনত ‘স্বচ্চতাই সেৱা’ আৰু স্বচ্চ সৰ্বেক্ষণ গ্ৰামীণ ২০২১ কাৰ্যসূচী চলি আছে।
বঙাইগাঁও জিলাৰ উপায়ুক্ত ডা:এম এচ লক্ষ্মী প্ৰিয়াই ইতিমধ্যে এই কাৰ্যসূচীৰ অধীনত ভিডিঅ কনফাৰেন্সৰ জৰিয়তে পঞ্চায়ত প্ৰতিনিধিৰ সৈতে ‘স্বচ্চতা সংবাদ’ কাৰ্যসূচী সম্পন্ন কৰিছে।
ইয়াৰ অন্তৰ্গত কাৰ্যসূচী হিচাপে বঙাইগাঁও জিলা পৰিষদৰ সভাকক্ষত গাঁও-পঞ্চায়তৰ সভাপতি তথা সচিবৰ লগত উপায়ুক্ত ডা:এম এচ লক্ষ্মী প্ৰিয়াই এখন সভাত মিলিত হয় আৰু তেওঁলোকক বঙাইগাঁও জিলাখন আটাইতকৈ পৰিস্কাৰ-পৰিচন্ন জিলা হিচাপে গঢ়ি তোলাত অৰিহণা যোগাবৰ বাবে সক্ৰিয়ভাবে কাম কৰিবলৈ আহ্বান জনায়।
জিলাখনৰ চহৰাঞ্চলত পৌৰসভাৰ অধীনত জাৱৰ সংগ্ৰহৰ বাবে যেনেকুৱা ব্যৱস্থা লোৱা হৈছে গ্ৰাম্যাঞ্চলতো তেনেকুৱা ব্যৱস্থা কৰিব লাগিব বুলি উপায়ুক্তগৰাকীয়ে কয় ।
চহৰাঞ্চলত মানুহৰ ঘৰৰ চৌহদ সিমান আহল-বহল নহয়, কিন্তু গ্ৰাম্যাঞ্চলত প্ৰতিঘৰ পৰিয়ালৰে ঘৰৰ চৌহদ আহল-বহল। গতিকে গাঁও অঞ্চলৰ প্ৰতিটো পৰিয়ালে নিজৰ ঘৰৰ জাৱৰখিনি চৌহদতে গাঁত খান্দি পুতি থব পাৰে। ভিজা আৱৰ্জনাখিনি এনেদৰে গাঁতত পুতি থৈ পচন সাৰ কৰিব পাৰে আৰু সেইবোৰ খেতি-বাতিত দিব পাৰে। গোটা আৱৰ্জনাখিনি পুনৰাই ব্যৱহাৰযোগ্য সামগ্ৰী হিচাপে বনাবলৈ আমি জাৱৰ সংগ্ৰহ কৰা লোকক দিব পাৰো। ইয়াৰ বাবে পঞ্চায়তৰ সভাপতি-সচিবক ই-কাৰ্ট আৰু হেণ্ড কাৰ্ট দিয়াৰ ব্যৱস্থা কৰা হৈছে ৷
আজি জিলাখনৰ মূলাগাঁও গাঁও-পঞ্চায়ত,বড়িগাঁও গাঁও-পঞ্চায়ত আৰু চাপৰাকাটা গাঁও-পঞ্চায়তৰ সভাপতিৰ হাতত আনুষ্ঠানিকভাৱে ই-কাৰ্ট আৰু আন পঞ্চায়তত তিনিচকীয়া বাহন ( হেণ্ড কাৰ্ট) প্ৰদান কৰা হয়। লগতে জাৱৰ সংগ্ৰহৰ কাৰণে প্লাষ্টিকৰ ডাষ্টবিনো প্ৰদান কৰে ৷
পৰ্যায়ক্ৰমে সকলো গাঁও-পঞ্চায়ততে ই-কাৰ্ট আৰু হেণ্ড কাৰ্ট প্ৰদান কৰা হ’ব। এই বাহনসমূহত সেউজীয়া আৰু নীলা ৰঙৰ পৃথক খোটালি থাকিব,তাৰে ভিতৰত সেউজীয়া খোটালীত ভিজা জাৱৰ আৰু নীলা খোটালিত গোটা জাৱৰ ৰাখিব লাগিব। আনহাতে উপায়ুক্তগৰাকীয়ে প্ৰতিখন গাঁও-পঞ্চায়ততে সমূহীয়া টয়লেট বনোৱাৰ বাবে ২ অক্টোবৰৰ আগতে আধাৰশিলা স্থাপন কাৰ্য সম্পন্ন কৰিবলৈ আহ্বান জনায়। সভাত জনস্বাস্থ্য কাৰিকৰী বিভাগৰ কাৰ্যবাহী অভিযন্তা শান্তনু সূত্ৰধাৰে কয় যে আমাৰ বঙাইগাঁও জিলা ইতিমধ্যে মুকলিত মলত্যাগমুক্ত জিলা হিচাপে স্বীকৃত হৈছে।
কিন্তু আমি অকল মুকলিত মলত্যাগমুক্ত জিলা হিচাপে স্বীকৃত হ’লে নহ’ব। আমাৰ চৌপাশ পৰিস্কাৰ-পৰিচন্নও হ’ব লাগিব।তাৰ বাবে আমি বজাৰ এলেকা,আমাৰ ৰাজহুৱা স্থান,আমাৰ ঘৰৰ চৌহদ পৰিস্কাৰকৈ ৰাখিব লাগিব।তেতিয়াহে আমি আচল অৰ্থত স্বচ্চ বুলি ক’ব পাৰিম।
তদুপৰি স্বচ্চতাৰ প্ৰতি আমাৰ সৰ্বসাধাৰণ জনতাক সজাগ কৰিবলৈ দেৱাল লিখন, পত্ৰিকা বিতৰণ, বেনাৰ স্থাপন, মাইকযোগে প্ৰচাৰ আদি কৰা হ’ব বুলি কাৰ্যবাহী অভিযন্তা শান্তনু সূত্ৰধাৰে জানিবলৈ দিয়ে।ইয়াৰ উপৰিও মোবাইল এপযোগে স্বচ্চতা সম্পৰ্কত কিছুমান প্ৰশ্নৰ উত্তৰ দি সকলোৱে এই স্বচ্চতা অভিযানত অৰিহণা যোগাব পাৰিব। ইপিনে এই সন্দৰ্ভত জিলা উপায়ুক্তগৰাকীয়ে সংবাদ মাধ্যমৰ আগত কয় যে জনস্বাস্থ্য কাৰিকৰী বিভাগে গ্ৰাম্যাঞ্চলৰ এলেকাবোৰত স্বচ্ছতা মিছনেই হওক বা জল জীৱন মিছনেই হওক বহু ভাল কাম কৰি আছে ৷
আমি গাঁও পঞ্চায়তৰ সভাপতিসকলৰ সৈতে লগ হৈ কাম কৰি আছো ,যাৰ কাৰণে বৰ্তমানলৈকে আমাৰ ফলাফল বহু ভাল হৈছে ৷ অকল বঙাইগাঁও জিলাৰ গ্ৰামাঞ্চল পৰ্যায়ত জাৱৰ সংগ্ৰহৰ কাম আৰম্ভ কৰা হৈছে ৷
বড়িগাঁও ,মূলাগাঁও আৰু চাপৰাকাটা এই তিনিটা গাঁও পঞ্চায়তত ইয়াৰ বাবে যাৱতীয় কাম প্ৰায় শেষেই হৈছে ৷ চৰকাৰে জাৱৰ সংগ্ৰহৰ কাৰণে বৰ্তমান পাঁচখন ই- ৰিক্সা আৰু প্ৰতিটো গাঁও পঞ্চায়তৰ কাৰণে দুখনকৈ হেণ্ড কাৰ্ট দিছে ৷ এইবোৰ বিতৰণ কৰি থকা হৈছে ৷ লগতে প্ৰতিটো গাঁও পঞ্চায়তত জাৱৰ সংগ্ৰহৰ কাৰণে ডাষ্টবিন দিছে ৷
আমি দুই অক্টোৱৰৰ কাৰণে প্ৰস্তুতি চলাই আছো আৰু আশা ৰাখিছো উক্ত দিনা জিলাখনৰ প্ৰতিটো গাঁও পঞ্চায়তত সভাপতিসকলে জাৱৰ সংগ্ৰহ কেন্দ্ৰৰ আধাৰশিলা স্থাপন কৰিব আৰু উক্ত দিনাৰ পৰাই এই তিনিটা গাঁও পঞ্চায়তত জাৱৰ সংগ্ৰহৰ কাম আৰম্ভ কৰিম ৷
জিলা উপায়ুক্তগৰাকীয়ে কয় যে বৰ্তমানলৈকে অসমৰ কোনো এখন জিলাত গাঁও পৰ্যায়ত জাৱৰ সংগ্ৰহৰ কাম আৰম্ভ হোৱা নাই ৷ কেৱল বঙাইগাঁও জিলাতে আৰম্ভ হ’ব ৷
