আজি গৰু বিহু: প্ৰতিকূল বতৰ নেওচি ৰাইজে আদৰিলে হেঁপাহৰ ৰঙালীক
নেৰানেপেৰা বৰষুণ, মূল্যবৃদ্ধিৰ ৰামটাঙোন। হ’লেও হেঁপাহৰ বিহুটি কিদৰে নপতাকৈ থাকিব পাৰি! প্ৰতিকূল বতৰ নেওচি আজি সমগ্ৰ ৰাজ্যবাসীয়ে আদৰিলে আদৰৰ ৰঙালীক।
ৰাজ্যৰ আকাশে-বতাহে গুঞ্জৰিত হ’ল আজি ‘লাও খা, বেঙেলা খা’ ধ্বনি। আজি গৰু বিহু।
বছৰেকৰ বিহুৰ এই পবিত্ৰ দিনটোত অসমৰ গ্ৰাম্য চহা জীৱনৰ সকলোতকৈ অবিচ্ছেদ্য অংগ গৰুৰ গা নোৱাই-ধুৱাই, দীঘলতি, মাখিয়তি পাতেৰে গৰুৰ গাত কোবাই,লাও-বেঙেনাৰ ‘চাট’ মাৰি গৰুৰ সুস্বাস্থ্যৰ কামনাৰে ৰাজ্যবাসীয়ে পালন কৰিলে গৰুবিহু।
নদ-নদী, জান-জুৰি বা পথাৰতেই হওক সমূহীয়াভাৱে গৰুৰ গা ধুৱাই বছৰেকৰ কৃষিকৰ্মৰ বাবে সাজু হৈছে গঞা কৃষিজীৱী ৰাইজ।
গৰুৰ গা ধুওৱাৰ লগতে সকলোৱে আনন্দমনেৰে জুৰিছে এফাঁকি বিহুনাম, কোনোৱে দিছে ঢোলত ৰগৰ।
উল্লেখ্য যে যোৱা দুই বছৰে ক’ভিদ মহামাৰীৰ বাবে ৰাজ্যত অনুষ্টুপীয়াকৈ পালন কৰিবলগীয়া হৈছিল ব’হাগ বিহু।
সেয়েহে এইবাৰ সকলোৱে মুকলিমুৰীয়াকৈ পালন কৰিছে ৰঙালী বিহু।
নৰ্থইষ্ট নাওৰ পৰিয়ালৰ পৰা সদৌ অসমবাসীলৈ জনাইছো হেঁপাহৰ ৰঙালী বিহুটিৰ অলেখ শুভকামনা।