নাগালেণ্ডত কুকুৰৰ মাংস বিক্ৰী আৰু খোৱাৰ ওপৰত থকা নিষেধাজ্ঞা উঠাই লয় গুৱাহাটী উচ্চ ন্যায়ালয়ৰ কোহিমা বিচাৰপীঠে ।
নাগালেণ্ড চৰকাৰে ২০২০ চনত কুকুৰৰ মাংসৰ ব্যৱসায়ৰ আৰু কুকুৰৰ মাংস ভক্ষণ কৰাৰ ওপৰত নিষিদ্ধ কৰিছিল।
এই অধিসূচনা বাতিল কৰাৰ সময়তে ২ জুনত ন্যায়াধীশ মাৰ্লি ভাংকুঙৰ একক ন্যায়াধীশ বিচাৰপীঠে ৰায় দিছিল যে চৰকাৰে কুকুৰৰ মাংস নিষিদ্ধ কৰিব নোৱাৰিলেহেঁতেন যদিহে কোনো আইনী সমৰ্থনকাৰৰী ব্যক্তি থাকিলেহেতেঁন।
শুকুৰবাৰে আদালতে পৰ্যবেক্ষণ কৰে যে ২০১১ চনৰ খাদ্য সুৰক্ষা আৰু মানদণ্ড নিয়মৰ অধীনত কুকুৰ খোৱাৰ বিষয়ে স্পষ্টভাৱে উল্লেখ কৰা হোৱা নাই।
উল্লেখযোগ্য যে নিষেধাজ্ঞাৰ সন্দৰ্ভত আইনী ভিত্তি আৰু অধিকাৰক্ষেত্ৰক প্ৰত্যাহ্বান জনাই কোহিমা পৌৰ পৰিষদে এক আবেদন দাখিল কৰে।
ন্যায়াধীশগৰাকীয়ে আঙুলিয়াই দিলে যে “জীৱ-জন্তু”ৰ সংজ্ঞাত কুকুৰক বিশেষভাৱে নিৰ্দিষ্ট কৰা হোৱা নাছিল, আৰু কুকুৰৰ মাংস খোৱাটো উত্তৰ-পূবৰ ৰাজ্যসমূহৰ বিশেষ অংশত সীমাবদ্ধ।
আবেদনকাৰীসকলে কুকুৰ পৰিবহণ আৰু কুকুৰৰ মাংস বিক্ৰী কৰি জীৱিকা নিৰ্বাহ কৰিছিল। কিন্তু চৰকাৰে কুকুৰৰ মাংস মানুহৰ খোৱাৰ উপযোগী নহয় বুলি দোহাই দি কুকুৰৰ মাংস নিষিদ্ধ কৰিছিল।
কিন্তু এতিয়া ন্যায়ালয়ে কুকুৰৰ মাংসৰ ওপৰত থকা নিষেধাজ্ঞা উঠাই লোৱাৰ পিছতে উৎফুল্লিত হৈ পৰিছে কুকুৰৰ ব্যৱসায়ী সকল। আনহাতে, ইয়াৰ বিপৰীতে হতাশ হৈ পৰিছে পশুপ্ৰেমী সকল।
