মঙলবাৰে গুৱাহাটী উচ্চ ন্যায়ালয়ে অসম চৰকাৰক গছ কটা আৰু স্থানান্তৰন প্ৰক্ৰিয়া সম্পৰ্কে এছ অ’ পি (ষ্টেণ্ডাৰ্ড অপাৰেটিং প্ৰচিডিউৰ) দাখিল কৰিবলৈ নিৰ্দেশ দিয়ে।
উৰণীয়া সেঁতু নিৰ্মাণৰ নামত গুৱাহাটীৰ দীঘলীপুখুৰী আৰু আমবাৰী অঞ্চলৰ গছসমূহ কাটি পেলোৱা আৰু স্থানান্তৰনৰ বিৰোধিতাৰে সাংবাদিক মহেশ ডেকা আৰু সমাজকৰ্মী জয়ন্ত গগৈয়ে উচ্চ ন্যায়ালয়ত দাখিল কৰা জনস্বাৰ্থ জড়িত আবেদনৰ শুনানিৰ সময়ত মুখ্য ন্যায়াধীশ আশুতোষ কুমাৰ আৰু ন্যায়াধীশ মাইকেল জোথানখুমাৰ বিচাৰপীঠে এই নিৰ্দেশ জাৰি কৰিছে।
এই গোচৰৰ শুনানিৰ সময়ত বাদীৰ অধিবক্তা কমল নাৰায়ণ চৌধুৰীয়ে উৰণীয়া সেঁতু নিৰ্মাণৰ ফলত অসংখ্য গছৰ ক্ষতি হোৱাৰ সম্ভাৱনাৰ বিষয়ে আদালতক অৱগত কৰে। ইয়াৰ উত্তৰত অসমৰ চৰকাৰৰ মহাধিবক্তা দেৱজিৎ লন শইকীয়াই আদালতক আশ্বাস দিয়ে যে গছ কটা বা স্থানান্তৰন এৰাই চলিবলৈ উৰণীয়া সেঁতুৰ প্ৰকল্পটোৰ পৰিকল্পনা সংশোধন কৰা হ’ব। লগতে, বাদীৰ অধিবক্তা কমল নাৰায়ণ চৌধুৰীয়ে নিশ্চিত কৰে যে চৰকাৰে উৰণীয়া সেঁতু প্ৰকল্পৰ সংশোধনীৰ প্ৰাৰম্ভিক প্ৰক্ৰিয়া আৰম্ভ কৰি বিষয়টো সমাধানৰ বাবে আগুৱাই আহিছে।
কিন্তু পূৰ্ণবয়স্ক গছৰ স্থানান্তৰন সন্দৰ্ভত এক আশংকাৰ উদয় হোৱাৰ বিষয়ে আদালত জনোৱা হয়। ইয়াৰ পিছত অসম চৰকাৰ মহাধিবক্তাগৰাকীয়ে কয় যে দীঘলীপুখুৰী-আমবাৰী অঞ্চলৰ ৭৭ জোপা গছৰ ভিতৰত ৭৬ জোপা গছ সফলতাৰে স্থানান্তৰ কৰা হৈছে। গছ স্থানান্তৰনৰ এই সফলতাৰ কথা স্বীকাৰ কৰি আদালতে গছ স্থানান্তৰ আৰু কটাৰ বাবে বিশদ এছ অ’ পি আনুষ্ঠানিকভাৱে দাখিল কৰিবলৈ নিৰ্দেশ দিয়ে। লগতে, ভৱিষ্যতে গছ স্থানান্তৰ আৰু কটাৰ ক্ষেত্ৰত এই এছ অ’ পি যাতে কঠোৰভাবে মানি চলে সেয়াও নিশ্চিত কৰিবলৈ আদালতে কয়।
মহাধিবক্তা শইকীয়াই আদালতক আশ্বাস দিয়ে যে পৰৱৰ্তী শুনানিৰ ভিতৰত এছ অ’ পিৰ বিশদ বিৱৰণ আৰু নিৰ্মাণৰ সময়ত গছ সংৰক্ষণৰ বাবে গ্ৰহণ কৰা ব্যৱস্থাসমূহৰ বিষয়ে শপতনামা দাখিল কৰা হ’ব।
উচ্চ ন্যায়ালয়ৰ বিচাৰপীঠে উন্নয়ন আৰু পৰিৱেশৰ মাজত ভাৰসাম্য ৰক্ষাৰ কথা ভাবি সকলো সাৱধানতা উল্লেখ কৰিবলৈও নিৰ্দেশ দিয়ে।
উল্লেখ্য যে শুনানিৰ সময়ত বিচাৰপীঠে আবেদনকাৰীক ‘বিৰোধী হিচাপে নহয়, উত্তৰ প্ৰজন্মৰ বাবে মাতৃ প্ৰকৃতিক সংৰক্ষণ কৰাৰ প্ৰচেষ্টা’ হিচাপে উল্লেখ গণ্য কৰে।
এই গোচৰৰ পৰৱৰ্তী শুনানি অহা ৪ আগষ্ট, ২০২৫ত অনুষ্ঠিত হ’ব।
