দিল্লীৰ জৱাহৰলাল নেহৰু বিশ্ববিদ্যালয়ত সংঘটিত হোৱা আক্ৰমণৰ ঘটনাৰ বিৰুদ্ধে বুধবাৰে গুৱাহাটী বিশ্ববিদ্যালয়ৰ ছাত্ৰ আৰু শিক্ষকসকলে একেলগে ওলাই আহি প্ৰতিবাদ সাব্যস্ত কৰে।
জৱাহৰলাল নেহৰু বিশ্ববিদ্যালয়ত সংঘটিত হোৱা আক্ৰমণৰ ঘটনাক গুৱাহাটী বিশ্ববিদ্যালয় শিক্ষক সমাজ, স্নাতকোত্তৰ ছাত্ৰ সন্থা আৰু বিশ্ববিদ্যালয় আইন মহাবিদ্যালয় ছাত্ৰ সন্থাই গৰিহণা দি বিশ্ববিদ্যালয় চৌহদত ইয়াৰ বিৰুদ্ধে অৱস্থান ধৰ্মঘট কাৰ্য্যসূচী ৰূপায়ন কৰে।
বিশ্বিবিদ্যালয়খনত শনিবাৰে সন্ধিয়া সংঘটিত হোৱা আক্ৰমণৰ ঘটনাত অসমকে ধৰি দেশৰ বিভিন্ন অঞ্চলৰ প্ৰায় ৪০ গৰাকী ছাত্ৰ-ছাত্ৰী আৰু শিক্ষক আঘাতপ্ৰাপ্ত হৈছিল।
‘‘জে এন য়ুৰ শিক্ষক আৰু ছাত্ৰ-ছাত্ৰীৰ সৈতে আমি একতা প্ৰকাশ কৰিছো আৰু ঘটনাত আঘাতপ্ৰাপ্ত সকলৰ আশু আৰোগ্য কামনা কৰিছো। বিশ্ববিদ্যালয়খনৰ চৌহদৰ ভিতৰত আইন-শৃংখলা ৰক্ষা কৰাৰ ক্ষেত্ৰত আৰক্ষী সম্পূৰ্ণৰূপে ব্যৰ্থ হৈছে’’, গুৱাহাটী বিশ্ববিদ্যালয় শিক্ষক সংস্থাৰ সভাপতি অখিল ৰঞ্জন দত্তই কয়।
‘‘জে এন য়ুই গণতান্ত্ৰিকভাৱে আগবাঢ়ি যোৱাৰ বাবে স্থান প্ৰদান কৰে। বিশ্ববিদ্যালয়খনৰ কোনো নিৰ্দিষ্ট সীমাৰেখা নাই, বিশ্বৰ বিভিন্ন স্থানৰ পৰা অধ্যায়ণৰ বাবে ইয়ালৈ ছাত্ৰ-ছাত্ৰী আহে’’, দত্তই লগতে কয়।
বিশ্ববিদ্যালয়ৰ স্নাতকোত্তৰ ছাত্ৰ সন্থায়ো সমগ্ৰ ঘটনাক গৰিহণা দি শীঘ্ৰেই দোষীক কৰায়ত্ত কৰি উপযুক্ত শাস্তি প্ৰদান কৰাৰ লগতে ভবিষ্যতে যাতে এনেধৰণৰ ঘটনা সংঘটিত হ’ব নোৱাৰে তাৰ বাবে সুৰক্ষা ব্যৱস্থা কটকটীয়া কৰি তোলাৰ বাবে দাবী জনায়।