অসম প্ৰদেশ কংগ্ৰেছৰ সভাপতি গৌৰৱ গগৈয়ে ঘোষণা কৰে যে ভৱিষ্যতে এখন কংগ্ৰেছ নেতৃত্বাধীন চৰকাৰে মুখ্যমন্ত্ৰী হিমন্ত বিশ্ব শৰ্মা আৰু তেওঁৰ কেবিনেট সতীৰ্থসকলে “অবৈধভাৱে” দখল কৰা বুলি অভিযোগ উত্থাপন হোৱা ভূমি পুনৰ উদ্ধাৰ কৰি দুখীয়া লোকৰ মাজত পুনৰ বিতৰণ কৰিব।
গুৱাহাটীত অসম প্ৰদেশ কংগ্ৰেছ কমিটীৰ বৰ্ধিত কাৰ্যনিৰ্বাহক বৈঠকৰ পিছত সংবাদ মাধ্যমক সম্বোধন কৰি তেওঁ এই মন্তব্য কৰে।
গগৈয়ে বৰ্তমানৰ বিজেপি নেতৃত্বাধীন চৰকাৰখনক জনসাধাৰণৰ আস্থাক প্ৰতাৰণা কৰাৰ অভিযোগ উত্থাপন কৰি সমগ্ৰ অসমৰ জনসাধাৰণ ক্ৰমান্বয়ে অসন্তুষ্ট আৰু ৰাজনৈতিক পৰিৱৰ্তনৰ বাবে সাজু হোৱা বুলি দাবী কৰে।
গগৈয়ে কয়, ‘ভূমিৰ অধিকাৰ ৰক্ষাৰ নামত মুখ্যমন্ত্ৰী আৰু তেওঁৰ মন্ত্ৰীসকলে দখল কৰা মাটি পুনৰ ৰাইজৰ হাতলৈ যাব।‘
তেওঁ ঘোষণা কৰে যে, ২০২৬ চনত নিৰ্বাচিত হ’লে কংগ্ৰেছ চৰকাৰে ভূমি পুনৰ বিতৰণক শীৰ্ষ অগ্ৰাধিকাৰ হিচাপে ল’ব। প্ৰথমখন কেবিনেট বৈঠকতে কাম কৰাৰ প্ৰতিশ্ৰুতি দিয়ে। তেওঁৰ মতে, এই সিদ্ধান্তই অৰ্থনৈতিক ন্যায় আৰু তৃণমূল পৰ্যায়ৰ কল্যাণৰ ওপৰত নতুন মনোনিৱেশক প্ৰতিফলিত কৰিব।
প্ৰান্তীয় জনগোষ্ঠীসমূহক সহায় কৰাৰ লক্ষ্যৰে ভূমি আৰু অৰ্থনৈতিক নীতিৰ বিস্তৃত সংস্কাৰৰ পৰিকল্পনাৰ গগৈয়ে ৰূপৰেখা দাঙি ধৰে। তেওঁ কংগ্ৰেছৰ দৃষ্টিভংগী বিজেপিৰ বিপৰীত বুলি বৰ্ণনা কৰি শাসন ব্যৱস্থাত ন্যায় আৰু সমতা পুনৰুদ্ধাৰৰ প্ৰয়োজনীয়তাৰ ওপৰত গুৰুত্ব আৰোপ কৰে।
বেদখল কৰা বনাঞ্চল পুনৰ উদ্ধাৰৰ বাবে বিজেপি চৰকাৰে উচ্ছেদ অভিযান অব্যাহত ৰখাৰ দাবীত অসমত উত্তেজনা বৃদ্ধি পোৱাৰ সময়তে তেওঁ এই মন্তব্য কৰে। ২০২৬ চনৰ ৰাজ্যিক নিৰ্বাচন ওচৰ চাপি অহাৰ লগে লগে গগৈৰ এই মন্তব্যই ৰাজনৈতিক বিতৰ্ক আৰু অধিক তীব্ৰতৰ কৰি তুলিব বুলি আশা কৰা হৈছে।
