অসম প্ৰদেশ কংগ্ৰেছ কমিটিৰ সভাপতি গৌৰৱ গগৈয়ে সোমবাৰে মুখ্যমন্ত্ৰী হিমন্ত বিশ্ব শৰ্মাক তীব্ৰ আক্ৰমণ চলাই মুখ্যমন্ত্ৰীয়ে তেওঁৰ বিৰুদ্ধে আন এখন দেশৰ সৈতে সম্পৰ্ক থকাৰ দাবীৰ প্ৰমাণ দাঙি ধৰাত ব্যৰ্থ হোৱাৰ অভিযোগ উত্থাপন কৰে।
গুৱাহাটীত এখন সংবাদমেল সম্বোধন কৰি গগৈয়ে কয় যে মুখ্যমন্ত্রীৰ এদিন পূৰ্বে প্ৰায় আঢ়ৈ ঘণ্টীয়া সংবাদ মাধ্যমক সম্বোধনৰ সময়ত তেওঁৰ বিৰুদ্ধে উত্থাপিত গুৰুতৰ অভিযোগৰ সমৰ্থনত কোনো প্রমাণ দাঙি ধৰিব পৰা নাছিল৷
গগৈয়ে কয়, ‘কালি আঢ়ৈ ঘণ্টীয়া সংবাদমেলত মুখ্যমন্ত্রীয়ে মই যে আন এখন দেশৰ এজেণ্ট বুলি প্রমাণ কৰিব পৰাকৈ কোনো প্রমাণ উত্থাপন কৰিব নোৱাৰিলে, তেওঁ কেবল আবোল-তাবোল কৈ থাকিল৷’
এই অভিযোগৰ সময় সন্দৰ্ভতো প্ৰশ্ন উত্থাপন কৰি কংগ্ৰেছ সাংসদগৰাকীয়ে মুখ্যমন্ত্ৰীয়ে উল্লেখ কৰা বিশেষ তদন্তকাৰী দলৰ প্ৰতিবেদন বিগত ছমাহ ধৰি চৰকাৰৰ সৈতে থকা বুলি উনুকিয়াই দিয়ে।
গগৈয়ে সোঁৱৰাই দিয়ে কয় যে মুখ্যমন্ত্ৰীয়ে পূৰ্বেও বিগত বৰ্ষৰ ১০ ছেপ্টেম্বৰত প্ৰতিবেদন ৰাজহুৱা কৰাৰ প্ৰতিশ্ৰুতি দিছিল।
‘যদি সঁচাকৈয়ে এয়া ৰাষ্ট্ৰীয় নিৰাপত্তাৰ বিষয়, তেন্তে মুখ্যমন্ত্ৰীগৰাকীয়ে কিয় ছমাহ নিমাত আছিল? সত্যটো হ’ল তেওঁ গঠন কৰা এছ আই টিয়ে কোনো প্ৰমাণ বিচাৰি নাপালে।’
নিজৰ উদ্দেশ্য স্পষ্ট কৰি গগৈয়ে কয় যে তেওঁৰ সংবাদমেলখন কেৱল মুখ্যমন্ত্রীৰ মন্তব্যৰ প্রতিক্রিয়া নহয় বৰঞ্চ অসমবাসীক সম্বোধন কৰাৰ প্রচেষ্টাহে৷
‘মই ইয়াত মুখ্যমন্ত্ৰীক প্ৰত্যুত্তৰ দিবলৈ অহা নাই। সংবাদ মাধ্যম আৰু অসমৰ ৰাইজৰ প্ৰতি সন্মানৰ বাবেই মই ইয়াত আহিছো, ৰাইজৰ সমস্যাৰ বিষয় উত্থাপন কৰিবলৈ মই ৰাজনীতিত আছো। তেওঁলোকে সিদ্ধান্ত লওক।’
মুখ্যমন্ত্ৰীৰ সংবাদমেলৰ সময়ত তেওঁৰ সন্তানৰ সবিশেষ ৰাজহুৱাভাৱে প্ৰকাশ কৰাৰ অভিযোগ উত্থাপন কৰি কংগ্ৰেছ নেতাগৰাকীয়ে ব্যক্তিগত আক্ৰমণৰ কথাটোত তীব্ৰ অসন্তুষ্টি প্ৰকাশ কৰে।
‘তেওঁ ইমান নিম্ন গৈছিল যে মোৰ সন্তানৰ বিষয়ে তথ্য প্ৰকাশ কৰিছিল। তেওঁৰ সন্তানৰ বিষয়েও আমি জানো, কিন্তু আমি তেওঁলোকৰ বিষয়ে ক’ব নিবিচাৰো।
অভিযোগসমূহক ভিত্তিহীন আৰু মানহানিকাৰক আখ্যা দি গগৈয়ে কয় যে উচ্চতম ন্যায়ালয়ে বিষয়টোৰ প্ৰতি নিজাববীয়া গোচৰ ল’ব লাগে।
‘কিয় তেওঁলোকে ভুৱা তথ্য বিয়পাইছে?এইটোৱে সকলো সীমা অতিক্ৰম কৰিছে।’
গগৈয়ে লগতে দাবী কৰে যে এই দীঘলীয়া সংবাদমেলখনৰ আঁৰৰ আচল কাৰণটো হ’ল অসমত কংগ্ৰেছ দলৰ ক্ৰমবৰ্ধমান জনপ্ৰিয়তা। তেওঁ অভিযোগ কৰে যে কংগ্ৰেছে ১২ হাজাৰ বিঘা মাটি মুখ্যমন্ত্ৰীৰ পৰিয়ালৰ হাতত থকা বুলি অভিযোগ উত্থাপন কৰাৰ পিছতে মুখ্যমন্ত্ৰীয়ে উত্তৰ দিবলৈ বাধ্য হৈছে।
গগৈয়ে প্ৰশ্ন কৰে, “যদি সঁচা অৰ্থত ৰাষ্ট্ৰীয় নিৰাপত্তাৰ কথা আছিল, তেন্তে তেওঁ কিয় ছমাহ ধৰি অলসভাৱে বহি থাকিল?”
