কংগ্ৰেছ নেতা তথা সাংসদ গৌৰৱ গগৈয়ে অসমৰ মুখ্যমন্ত্ৰী হিমন্ত বিশ্ব শৰ্মাক দেশৰ ধনী মুখ্যমন্ত্ৰীৰ ভিতৰত স্থান লাভ কৰা বুলি সমালোচনা কৰে।
এছ’চিয়েশ্যন ফৰ ডেম’ক্ৰেটিক ৰিফৰ্মছৰ (এডিআৰ) এক প্ৰতিবেদন অনুসৰি প্ৰায় ১৭ কোটি টকাৰ সম্পত্তিৰে তেওঁ আটাইতকৈ ধনী মুখ্যমন্ত্ৰীসকলৰ ভিতৰত নৱম স্থানত আছে।
গগৈয়ে উল্লেখ কৰে যে শৰ্মাৰ ব্যক্তিগত সম্পদ আৰু অসমৰ বিকাশৰ মাজত এক বৈপৰীত্য আছে।
উন্নয়নৰ দিশৰ পৰা অসমক ভাৰতৰ শীৰ্ষ পাঁচখন ৰাজ্যৰ ভিতৰত অন্যতম হিচাপে গঢ়ি তোলাৰ প্ৰতিশ্ৰুতি সত্ত্বেও ইউএনডিপিৰ মানৱ উন্নয়ন সূচকাংকত ৰাজ্যখনে ৩১ নম্বৰ স্থানত আছে বুলিও গগৈয়ে লগতে কয়।
এডিআৰৰ প্ৰতিবেদনত এই কথাও প্ৰকাশ পাইছে যে উত্তৰ-পূব ভাৰতৰ চাৰিগৰাকী এনডিএৰ মুখ্যমন্ত্ৰী শীৰ্ষ ১০ গৰাকী ধনী মুখ্যমন্ত্ৰীৰ ভিতৰত আছে অথচ তেওঁলোকৰ ৰাজ্যসমূহ মানৱ উন্নয়ন সূচকাংক ৰেংকিঙত পিছ পৰি আছে।
উল্লেখ্য যে এডিআৰৰ তথ্য অনুসৰি, অন্ধ্ৰ প্ৰদেশৰ মুখ্যমন্ত্ৰী এন চন্দ্ৰবাবু নাইডু ভাৰতৰ আটাইতকৈ ধনী মুখ্যমন্ত্ৰী। তেওঁৰ সম্পত্তিৰ মূল্য ৯৩১ কোটি টকাতকৈ বেছি।
আনহাতে পশ্চিম বংগৰ মমতা বেনাৰ্জী আটাইতকৈ দৰিদ্ৰ মুখ্যমন্ত্ৰী। মাত্ৰ ১৫ লাখ টকা। প্ৰতিবেদনত ভাৰতৰ মুখ্যমন্ত্ৰীসকলৰ মাজত সম্পত্তিৰ বৈষম্যৰ বিষয়তো আলোকপাত কৰা হৈছে। উল্লেখ্য যে দেশৰ প্ৰতিজন মুখ্যমন্ত্ৰীৰ গড় সম্পত্তিৰ পৰিমাণ ৫২.৫৯ কোটি টকা।
