গুজৰাটৰ আহমেদাবাদত অনুষ্ঠিত ভাৰতীয় জাতীয় কংগ্ৰেছ দলৰ অধিৱেশনত এক উদাক্ত ভাষণ প্ৰদান কৰে যোৰহাটৰ সাংসদ গৌৰৱ গগৈয়ে।
ভাষণৰ আৰম্ভণিতেই সাংসদ গৰাকীয়ে ২০২৫ বৰ্ষতো কংগ্ৰেছ দলৰ “সংগঠন বৰ্ষ”হিচাপে ঘোষণা কৰাৰ বাবে ভাৰতীয় জাতীয় কংগ্ৰেছ দলৰ ৰাষ্ট্ৰীয় সভাপতি মল্লিকাৰ্জুন খৰ্গে, ছোনীয়া গান্ধী, ৰাহল গান্ধীকে ধৰি কেন্দ্ৰীয় নেতৃত্বক দলৰ এজন নিষ্ঠাবান সদস্য হিচাপে আন্তৰিক ধন্যবাদ আৰু কৃতজ্ঞতা জ্ঞাপন কৰে।
কেইদিনমানৰ পূৰ্বে সমগ্ৰ দেশৰে ভিন্ন প্ৰান্তৰ জিলা সভাপতি সকলৰ সৈতেও ৰাষ্ট্ৰীয় সভাপতি মাননীয় মল্লিকাৰ্জুন খৰ্গে, ৰাহুল গান্ধীয়ে ৪ দিনকৈ যিধৰণেৰে দলৰ তণমূল পৰ্য্যায়ৰ সাংগঠনিক দিশটোৰ বিষয়ে যি আলোচনা কৰিলে আৰু তেওঁলোকৰ মতামতক বিশেষ গুৰুত্ব প্ৰদান কৰিলে তাৰ বাবেও জিলা সভাপতি সকলৰ হৈ তেওঁ আন্তৰিক ধন্যবাদ জনায়।
ইয়াৰ লগতে দেশৰ বিভিন্ন ঠাইৰ পৰা গৈ আহমেদাবাদত উপস্থিত হোৱা কংগ্ৰেছ দলৰ নেতা কৰ্মী সকলক উদ্দেশ্যি তেওঁ কয় যে – “অলপ দিনৰ পূৰ্বে আমাৰ নেতা ৰাহুল গান্ধী ডাঙৰীয়াই গুজৰাটলৈ আহি কৈছিল যে যিসকলে এটা ভৰি কংগ্ৰেছত আৰু আন এটা ভৰি অন্য দলত থৈ কংগ্ৰেছ দল কৰি আছে সেই সকলক চিনাক্ত কৰি দলৰ পৰা বহিস্কাৰ কৰিব লাগে ।”
ৰাহুল গান্ধীৰ এই মতামতক সমৰ্থন কৰি সাংসদ গগৈয়ে কয় যে – যদি আমি আগন্তুক দিন বোৰত অনুষ্ঠিত হ’ব লগীয়া বিধানসভা নিৰ্বাচন সমূহ জয়ী হ’ব লাগে তেন্তে প্ৰথমেই আমি কট্টৰ আৰু নিষ্ঠাবান কংগ্ৰেছী সকলক চিনাক্ত কৰি আগুবঢ়াই নিব লাগিব। কট্টৰ কংগ্ৰেছ কৰ্মী সেইসকল,যিসকলে পুলিচৰ লাঠিৰ কোব খাইও কংগ্ৰেছ দলৰ নীতি-আদৰ্শ এৰি অন্য দললৈ যোৱা নাই, যিসকলে অহৰহ ভয়-ভাবুকি লাভ কৰাৰ পিছতো দল এৰি যোৱা নাই, যিসকলে প্ৰচুৰ লোভনীয় প্ৰস্তাৱকো নেওচি নানান বিপদৰ মাজতো কংগ্ৰেছৰ পতাকাখন সাহসেৰে খামুচি ধৰি ৰাখিছে।
সাংসদ গগৈয়ে জোৰ দি কয় যে – মোৰ দৃঢ়বিশ্বাস যে যদি আমি এনেধৰণৰ নিষ্ঠাবান আৰু কট্টৰ কংগ্ৰেছ কৰ্মী সকলক গুৰুত্ব প্ৰদান কৰি আগুৱাই নিওঁ তেন্তে আগন্তুক বিধানসভা নিৰ্বাচন সমূহত নিৰ্বিঘ্নে জয়ী হ’ব পাৰিম। সি লাগিলে আগন্তুক গুজৰাট, উত্তৰাখণ্ড, কেৰালা বা অসমৰ বিধানসভা নিৰ্বাচনেই নহওক কিয়।
সাম্প্ৰতিক কংগ্ৰেছ দল আৰু বিজেপি দলৰ ,সংগঠনৰ মাজত পাৰ্থক্য আঙুলীয়াই সাংসদ গৰাকীয়ে কয় যে বিজেপিৰ সংগঠন এটা Private Limited Company ৰ দৰে চলে আৰু আমাৰ কংগ্ৰেছ দল এটি পৰিয়ালৰ দৰে চলাব বিচাৰো। সেয়েহে আজি দেশৰ বিভিন্ন ঠাইৰ পৰা অহা কংগ্ৰেছ পৰিয়ালৰ নেতা কৰ্মী সকল আৰু সংগঠনৰ দায়িত্বত থকা সকলক এটি বিনম্ৰ অনুৰোধ জনাব বিচাৰো যে – আমি সকলোৱে আমাৰ মাজত এটি পৰিয়ালৰ দৰে সম্পৰ্ক গঢ়ি তুলিব লাগিব। আমাৰ কংগ্ৰেছ পৰিয়ালৰ সদস্য সকলে বিশেষ একো নিবিচাৰে। যদি জ্যেষ্ঠ নেতা এজনে পিঠিত হাতখন থৈ বিশ্বাস দিব পাৰে তেন্তে দলৰ আদৰ্শৰ বাবে জেললৈ যাবলৈও কুন্ঠাবোধ নকৰে। যদি এজন সদস্যক কোনোবা নেতাই ফোন কৰিও কুশল-বাৰ্তা লয় তেতিয়াও সেই কৰ্মীজনে প্ৰখৰ গৰমকো নেওচি কংগ্ৰেছৰ পতাকাখন ধৰি ৰাখি দলৰ কাম কৰি যায়। এইয়াই আমাৰ কংগ্ৰেছ পৰিয়ালৰ পৰম্পৰা আৰু সম্পৰ্ক ।
কংগ্ৰেছ দলৰ নীতি-আদৰ্শ আৰু সংস্কতিৰ বিষয়ে কবলৈ গৈ সাংসদ গগৈয়ে কয় যে – শতবৰ্ষ গৰকা আমাৰ কংগ্ৰেছ দলৰ নীতি-আদৰ্শ সংস্কৃতিয়ে আমাক কি শিকায় ? কংগ্ৰেছ দলৰ সংস্কৃতিয়ে আমাক শিকায় যে – আমি অতি গৰ্বেৰে “জয় হিন্দ” বুলিও ক’ব পাৰো আৰু তেলেংগানালৈ গৈ “জয় তেলেংগানা” বুলিও ক’ব পাৰো । আমাৰ সংস্কতিয়ে আমাক যেনেদৰে “জয় হিন্দ” বুলি গৌৰবেৰে কবলৈ শিকায়, ঠিক তেনেদৰে পশ্চিম বংগলৈ গৈ “জয় বাংলা” বুলি ক’বলৈও শিকায়। ঠিক তেনেদৰে অসমলৈ আহি “জয় আই অসম” বুলিও গৌৰবেৰে ক’ব পাৰো। এইয়াই হৈছে আমাৰ বিবিধতাৰ মাজত ঐক্যৰ সংস্কৃতি । কংগ্ৰেছ দলৰ সংস্কৃতি হৈছে দেশৰ ভিন্ন প্ৰান্তৰ বাৰেৰহণীয়া সংস্কৃতিক সন্মান কৰা। আমাৰ বাবে আমাৰ ৰাষ্ট্ৰবাদেই হ’ল আমাৰ দেশভক্তি। ইয়াৰ লগতে আমি দেশৰ বিভিন্ন প্ৰান্তৰ আঞ্চলিকতাবাদকো সন্মান কৰো। এইয়াই হৈছে জাতি-বৰ্ণ নিৰ্বিশেষে সৰ্বজনৰ কংগ্ৰেছ দল, দেশভক্তৰ কংগ্ৰেছ দল,সকলো ধৰ্মৰ জনগণৰ কংগ্ৰেছ দল,সকলো ভাষা-ভাষীৰ কংগ্ৰেছ দল,দেশৰ সকলো প্ৰান্তৰ কংগ্ৰেছ দল।
