অপাৰেশ্যন সিন্দূৰক লৈ সংসদত চলি থকা বিতৰ্কত অংশগ্ৰহন কৰি সদনত প্ৰধানমন্ত্ৰী মোডীৰ ভাষণ শুনাৰ পাছত কংগ্ৰেছ সাংসদ তথা লোকসভাৰ বিৰোধী উপ-দলপতি গৌৰৱ গগৈয়ে প্ৰধানমন্ত্ৰীক উদ্দেশ্যি সংবাদ মাধ্যমৰ সন্মুখত কয় , “প্ৰধানমন্ত্ৰী মোদী ডাঙৰীয়াই তেওঁৰ ২ ঘণ্টীয়া ভাষণত অপাৰেচন সিন্দূৰৰ সকলো শ্ৰেয় নিজে ল’বলৈ আপ্ৰাণ চেষ্টা কৰিলে। ভাষণৰ আৰম্ভণিত তেওঁ কৈছিল যে দেশবাসীয়ে তেওঁক সমৰ্থন কৰিছে। এইয়া তেওঁৰ সম্পূৰ্ণ ভুল ব্যাখ্যা। দেশবাসীয়ে ভাৰত চৰকাৰ আৰু ভাৰতীয় সেনাবাহিনীকহে আকুন্ঠ সমৰ্থন দিছিল।”
লগতে গগৈয়ে কয়, “এইটোও অত্যন্ত দুৰ্ভাগ্যজনক যে প্ৰধানমন্ত্ৰীয়ে যেনেদৰে অপাৰেশ্যন সিন্দূৰৰ সকলো শ্ৰেয় (Credit)লবলৈ আপ্ৰাণ চেষ্টা কৰিলে, ঠিক তেনেদৰে পেহেলগামৰ নাৰকীয় ঘটনাৰ বাবে নিজৰ বিফলতাৰ নৈতিক দায়িত্ব লোৱাৰ পৰা আঁতৰি থাকিল ৷ আমেৰিকাৰ ৰাষ্ট্ৰপতি ট্ৰাম্পে ২৮-২৯ বাৰ যুদ্ধবিৰতি সম্পৰ্কে উল্লেখ কৰিছিল, কিন্তু প্ৰধানমন্ত্ৰীয়ে ইয়াৰ প্ৰতিবাদত এটা টু শব্দও নক’লে । প্ৰিয়ংকা গান্ধী ডাঙৰীয়ানীয়েও প্ৰধানমন্ত্ৰীক উদ্দেশ্যি এই বিষয়টো আজি উপস্হাপন কৰিছিল।”
“ঠিক তেনেদৰে ৰাহুল গান্ধী ডাঙৰীয়াইও ৰাষ্ট্ৰপতি ট্ৰাম্প আৰু চীনৰ প্ৰসংগ উত্থাপন কৰিছিল। কিন্তু দুৰ্ভাগ্যজনক ভাবে প্ৰধানমন্ত্ৰীয়ে এবাৰৰ বাবেও চীনৰ নাম পৰ্য্যন্ত উল্লেখ নকৰিলে। ভাৰতীয় সেনাবাহিনীৰ জ্যেষ্ঠ বিষয়াসকলে অপাৰেশ্যন সিন্দূৰৰ সময়ত চীনৰ ভূমিকা থকাৰ সম্পৰ্কে মন্তব্য কৰিছিল। তেওঁলোকে কৈছিল যে পাকিস্হান সেনাবাহিনী আৰু বায়ুসেনাক চীনে সহায় কৰিছিল। কিন্তু, ইমান গুৰুত্বপূৰ্ণ আৰু স্পৰ্শকাতৰ বিষয় এটাত প্ৰধানমন্ত্ৰীয়ে এটা শব্দ উল্লেখ নকৰিলে ।”, গগৈয়ে কয়।গগৈয়ে লগতে কয়, “ইয়াৰ পৰিবৰ্তে প্ৰধানমন্ত্ৰীয়ে কংগ্ৰেছ দল আৰু পণ্ডিত নেহৰুক মিছা অভিযোগেৰে অপযশ বা কলংকিত কৰিবলৈ বিচৰা সেই পুৰণি অভ্যাসৰেই পুনৰাবত্তি কৰিবলৈ চেষ্টা কৰিলে। মই মাথো এইটোৱেই কবলৈ বিচাৰো যে – প্ৰধানমন্ত্ৰী ডাঙৰীয়া, আপুনি ২ ঘন্টা কিয়, ২০০০ ঘন্টা পণ্ডিত নেহৰুৰ বিৰুদ্ধে অপযশ আনিবলৈ চেষ্টা কৰিলেও সমগ্ৰ দেশবাসী আৰু বিশ্বই নেহৰুজীৰ অনবদ্য অৱদানৰ বিষয়ে সদায়েই শ্ৰদ্ধাৰে স্মৰণ কৰিব।”
