ভীমা কোৰেগাঁও গোচৰত গ্ৰেপ্তাৰ হোৱা সত্তৰ বছৰীয়া সমাজ কৰ্মী গৌতম নৱালাখাক মুম্বাইৰ তালোজা কাৰাগাৰৰ উচ্চ সুৰক্ষা বেৰেক ‘আন্দা চাৰ্কল’লৈ স্থানান্তৰ কৰা হৈছে। এই কথা জানিবলৈ দিছে তেওঁৰ সহযোগী তথা নাৰী অধিকাৰ কৰ্মী শভা হুছেইনে।
এক বিবৃতিত হুছেইনে কয়, “মোক কৰা কলৰ উপৰিও, ফোন কলৰ জৰিয়তে উকীলসকলৰ নিয়মীয়া প্ৰৱেশাধিকাৰ বিচাৰাধীন বন্দীসকলৰ বাবে এক অত্যাৱশ্যকীয় সুবিধা। যিকোনো বিচাৰাধীন বন্দীক আইনী পৰামৰ্শ আৰু সহায়, বা পৰিয়ালৰ সৈতে যোগাযোগ কৰা এই কাৰ্যকৰী আৰু দক্ষ পদ্ধতিৰ পৰা বঞ্চিত কৰাটো হৈছে এক অন্যায়।”
তেওঁ লগতে কয় যে স্থানান্তৰৰ বাবে নৱালাখাৰ ইতিমধ্যে ভঙ্গুৰ স্বাস্থ্যৰ আৰু অৱনতি হৈছে।
উল্লেখ্য যে ভীমা কোৰেগাঁও গোচৰত গ্ৰেপ্তাৰ কৰা আন এজন সমাজ কৰ্মী ষ্টেন স্বামীৰ ইতিমধ্যে কাৰাগাৰতে মৃত্যু হৈছে।
হুছেইনে ষ্টেন স্বামীৰ বিষয়েও কয় যে অতি কৰুণ পৰিস্থিতিত ষ্টেন স্বামীয়ে মৃত্যুবৰণ কৰিছিল। এনে প্ৰাথমিক প্ৰয়োজনীয়তাৰ বাবেও তেওঁ তীব্ৰ যুঁজ দিব লগা হৈছিল।
নৱালাখা হৈছে ১১ জন কৰ্মী, শিক্ষাবিদ আৰু উকীলৰ ভিতৰত এজন যাৰ ওপৰত নক্সালৰ সৈতে সম্পৰ্ক থকা আৰু পুনেৰ এলগাৰ পৰিষদ সভাত উচতনিমূলক ভাষণ দিয়াৰ অভিযোগত গ্ৰেপ্তাৰ কৰা ১১ জন সমাজ কৰ্মী, শিক্ষাবিদ,অধিবক্তাৰ ভিতৰত নৱালাখা অন্যতম।
তেওঁলোকৰ ওপৰত ২০১৮ চনৰ ১ জানুৱাৰীত ভীমা কোৰেগাঁওত হিংসাত্মক ঘটনা সংঘটিত হোৱাৰ ক্ষেত্ৰত উচতনিমূলক ভাষণ দিয়াৰ অভিযোগ উত্থাপন কৰা হৈছিল। পুনে আৰক্ষীয়ে এই সকল ব্যক্তিৰ বিৰুদ্ধে বিতৰ্কিত বেআইনী কাৰ্যকলাপ (প্ৰতিৰোধ) আইন ১৯৬৭ ৰ অধীনত গোচৰ ৰুজু কৰিছিল।
অতি ক্ষোভেৰে শভা হুছেইনে কয়, “গৌতমে সাহস আৰু আত্মবিশ্বাসেৰে তেওঁৰ অযৌক্তিক কাৰাবাসৰ মোকাবিলা কৰিছে। তেওঁৰ মতামতৰ বাবে তেওঁক আৰু কিমান সময় অত্যাচাৰ কৰা হ’ব, আৰু কৰ্তৃপক্ষই কিমান পৰিমাণে তেওঁক দমন কৰিবলৈ চেষ্টা কৰিব ?”
মহাৰাষ্ট্ৰৰ ৰাজ্য চৰকাৰে ২ ছেপ্টেম্বৰত মুম্বাই উচ্চ ন্যায়ালয়ক জনাইছিল যে নৱালাখাক চিকিৎসা পৰীক্ষাৰ বাবে খাৰঘৰৰ টাটা মেম’ৰিয়েল চেণ্টাৰলৈ লৈ যোৱা হ’ব।
নৱালাখাৰ পৰামৰ্শদাতাৰ দ্বাৰা উত্থাপিত এক আবেদনৰ পিছত অধিবক্তা যুগ চৌধুৰীয়ে নৱলাখাৰ বুকুত এটা মাংসপিণ্ড বিকশিত হৈছে বুলি সদৰী কৰিছিল।
উল্লেখ্য যে যোৱা ২৩ অক্টোবৰত ভীমা কোৰেগাঁও গোচৰত গ্ৰেপ্তাৰ কৰা আন এজন সমাজ কৰ্মী তথা কবি ভাৰভাৰা ৰাওৰ বিৰুদ্ধে জামিন বিহীন চমন জাৰি কৰিছিল।